In Cine e puarte chei che par jê a son i valôrs furlans: jessi testarts, la lealtât e la cjaviestriarie. E inte valîs e met ancje il persut di Sant Denêl. “Lu plati ben, sperant che no mi fasin storiis” – e dîs, confessant che no pues fâ di mancul di mangjâlu. Chiara Cainero, udinese doc, 30 agns, e je la altlete di tîr al svol che e rapresente la Italie a lis Olimpiadis di Pechin, in program dai 8 ai 24 di Avost. E à cjapât l’avion ai 31 di Lui e e je svolade a Singapore par la “climatizazion”, ven a stâi par ambientâsi al cjalt orientâl, e par smaltî il fûs orari. Al vilaç olimpic cinês, Chiara, e rive ai 11 di Avost, doi dîs prin da la sô gare.
Jê e je une da lis campionessis di “skeet” plui fuartis dal mont. Ce isal? Un sport di sigûr pôc cognossût ma che, di ce che o vin capît, al domande une vore di smicje e di precision. No si salte, no si cor e no si va daûr di un balon. Si spare. Dite cussì al pues fâ pôre ma no bisugne preocupâsi. A fâsi mâl a son dome platuts. Si à di trai di 8 pedanis metudis dilunc di un cercli dal rai di 19,20 metris. A lis dôs estremitâts si metin “mark” e “pull”: il prin in bas a drete e chel altri, invezite, a çampe. A son doi imprescj ca mandin fûr i cussì clamâts “piatuts”. Il tiradôr al spiete la jessude dal platut in posizion di spiete, daspò al imbraçe la sclope e al spare. Al à a disposizion dome un colp par plat. L’atlete, in cheste specialitât, al cognòs la altece e la direzion dai platuts: la dificoltât e je rapresentade da lis 8 diviersis posizions dal tiradôr rispiet a lis machinis. E ancje dal timp dal lanç che al pues variâ dai zero ai trê seconts da la clamade dal tiradôr.
Un zûc un tic complicât ma che Chiara à capit a la perfezion. E à vint il campionât european 2007 di Granada e chel dal 2006 di Maribor. Ta chel an e à puartât cjase ancje il prin puest a la finâl da la cope dal mont (zuiade a Granada), la medaie di arint al campionât dal mont di Zagrabria e a è rivade tiarce, al Cairo, a lis garis par la cope dal mont. Tant par segnalâ i sucès plui resints. Tal so curriculum sportîf ancje cualchi piçule delusion: poc timp indaûr, a Lui, e à partecipât ai campionâts europeans di Cipro, ma no je lade masse ben. “Mi displâs – e conte la tiradore nassude e cressude a Udine e che cumò e fâs part da la forestâl – ma cussì o ai ancjemò plui grinte par lis olimpiadis”.
Nancje tornade da la isule sfurtunade e jere za al poligon di Cjampfuarmit a tirâ. Une vite, la sô, fate di tantis oris di alenament, trasfiertis ator pal mont, cu lis valîs simpri in man. No cate dut, Chiara e à ancje cjatât il timp di sposâsi. Tal 2004 e à dit di sì a Filippo, un sicilian che par amôr si è trasferît vulintîr a Udin. Ma lui cel disial che tu sîs simpri ator?, i vin domandât. “Il gno om al è straordenari – e dîs – . Se al pues al ven cun me al poligon e mi jude tai alenaments e ancje se spes o sin lontans lui al è simpri presint”. Un an, il 2004, che Chiara si visarà simpri ancje parcè che à partecipât a lis olimpiadis di Atene. A Pechino, duncje, e sa za cemût compuartâsi: “O ai di fâ i ponteç tecnic plui alt. O sin dutis bravis, no ai pôre di une aversarie in particolâr”.
Lis polemichis su chistis garis in Cine a son stadis tantis, ancje se cumò a somein sparidis tal nuie. Dut câs su chist argoment Chiara à la bocje cuside. O miêr, e scuen sierâle. «Il Coni nol permet a nô atletis di esprimi opinions a rivuart – e dîs – . La sole robe che o pues dî e je che il sport al puarte adalt valôrs come la solidarietât e la amicizie e no viôt parcè che nô sportîfs o vedin di sei metûts in mieç a cuistions politichis”.
No je scaramantiche ma un puartefortune lu à. Jal da sô mari ogni volte prime di une competizion impuartante. O varessis voie di savê ce che al è, vere? Metêtsi la anime in pâs: “No lu disarai mai a nissun” – e à dit. E va ben, o tifìn par jê distès.
______________________________________________
I Zûcs ai furlans
Lis primis olimpiadis da la ere moderne si son zuiadis tal 1896 a Atene. Dilunc di chisç 112 ains di sport (i zûcs olimpics si son fermâts dome tal 1916, 1940 e 1944 a cause da lis vueris mondiâls) a son tainç i atlets furlans che an rapresentât l’Italie a lis diviarsis edizions. No duç a son tornâts in patrie cun une medaie. Un par un, però, a mertin ricognossince. Sa ju vin contâts ben a son, in dut, 257: masse par pensâ di ricuardaiu duç. Ma provin amancul a tirâ fûr cualchi non.
Scomencin cu la atletiche: Udin a si cjate in teste cun cuatri fîs ca an fat la storie di chiste dissipline. Alessandro Talotti e Paolo Casarsa a son stâts a Atene tal 2004, Luca Toso a Seul tal 1988 e Mario Vecchiato a Monaco tal 1972. E no si pues dismeteâ il “cjargnel di Paluce” Venanzio Ortis cal à partecipât a lis olimpiadis di Montreal tal 1976.
Passìn a la bale tal zei. Lis edizions di Sidney 2000 e Atene 2004 a àn viodût ben trê furlans in azion: l’udinês Giacomo Galanda, il cividalês Roberto Chiacig e l’aquileiês Michele Mian. A Atene a àn vint la medaie di arint. A lâ sul scjalin plui alt dal podi a son stâts soredut i campions furlans da lis specialitâts invernâls: baste pensâ ai doi fradis Di Centa, Manuela e Giorgio (7 medaiis jê, 3 lui) e a Gabriella Paruzzi (5). Un bronç e un arint ancje par Matteo Bisiani, monfalconês, campion di tîr cul arc a Atlanta e a Sidney e un arint par il gurizan Matej Cernic al à vint cu la nazionâl di bale a svol cuatri agns za fa a Atene.
