Scletece e umanitât a son lis primis peraulis che mi vegnin iniment a pene che o tachi a fevelâ cun Amato De Monte, il miedi che al à viodût di Eluana Englaro tai ultins dîs de sô vite. E la sogjezion, che mi à compagnât par oris prime dal nestri incuintri, si sfante a pene che si sentìn tal so studi, dulà che e fâs biele mostre une sô foto cun mari Teresa di Calcute «Le vin fate tal 1989 in Armenie dulà che o jeri volontari», mi dîs.
Dotôr De Monte, I displasial se o tachìn fevelant di cuistions judiziariis invezit che sanitariis?
Va ben, nissun probleme.
Nus disial alc sui fassicui che la procure e veve viert su di lui?
Prin di dut i fassicui in procure no mi rivuardavin dome me: al jere coinvolt dut il staff che al à lavorât cun me. E ancje Beppino Englaro, il papà di Eluana.
Cuale jerie la acuse?
Par me e il staff la acuse principâl e jere chê di omicidi volontari.
Adiriture al Ordin dai miedis un coleghe mi veve acusât ancje di torture tai confronts dal pazient, cuant che invezit il nestri compit al è stât chel di intervignî par che Eluana Englaro e podès finî di patî.
Beppino Englaro al è stât acusât di omicidi volontari agravât par vie che al jere il pari.
Ce fin àno fat chei fassicui?
Tal Zenâr dal 2010 o sin stâts ducj assolts.
Aial plui vude ocasion di confrontâsi cun cualchidun di chei che lu àn clamât «sassin»?
No, cun nissun. Par dî la veretât ducj chei che mi àn dât dal «sassin» o dal «boie» no mi àn mai dit in muse chestis peraulis: a àn dome berghelât in place o fevelât par daûr.
Aial cjapât cualchi iniziative cuintri?
Sì, o vevi presentadis sedi denunciis penâls sedi denunciis civîls.
A ce pont sono?
Lis causis penâls a son stadis cuasi dutis archiviadis: la motivazion e je stade che chei atacs a jentravin te casistiche dal «dirit di critiche»… e no zonti nuie altri…
Pes causis civîls al covente plui timp e duncje a son inmò viertis.
Ce fasarasial dai eventuâi risarciments?
Ancje se o ai vudis ricjadudis pesantis a nivel personâl e familiâr no tignarai nuie par me. O ai vude une profonde depression e no soi jentrât in cure ancje grazie al libri che o ai scrit («Gli ultimi giorni di Eluana» ed. Biblioteca dell’immagine – jessût ai 7 di Mai dal 2010, firmât adun cu la sô femine Cinzia Gori e curât di Elena Nave, ndr). Sedi ce che mi ricognossarà il tribunâl sedi ce che o tirarìn des venditis dal libri al larà a sostegn de associazion «Per Eluana».
Nus someave just partî propit des tapis legâls finâls parcè che in realtât dut al è partît di une sentence, vere?
La cuistion e je propit cussì: il nestri intervent al è vignût daûr di une sentence passade in Cassazion dopo di ats precedents fats de Cort di apel di Milan. O jerin cuvierts di un at formâl dal tribunâl che al ricognosseve la volontât di Eluana Englaro midiant di provis e testemoneancis. Il judiç al à ancje fat une analisi dal stîl di vite che e veve la paziente prime dal incident. Tes conclusions adiriture il tribunâl al scrîf «… la domande di autorizazion pe interuzion dal tratament di sostegn vitâl artificiâl, cussì come proponude dal tutôr di Eluana Englaro e condividude de curadore speciâl, e va acedade inevitabilmentri, di cheste decision no podint gjavâsi fûr i judiçs, par trop no cence partecipade personâl soference»: come a dî che ancje il judiç al à ricognossût e metût devant di dut la volontât di Eluana Englaro. E nus à imponût cemût fâ.
Il protocol sanitari?
Sì, une serie di normis atuativis pe sospension de nutrizion artificiâl dadis propit dal tribunâl: o vevin di puartâ Eluana intun hospice o intune struture similâr e no a cjase. O vevin di garantî il rispiet de femine, lis visitis de famee, l’ûs dome di medisinis che a vevin di controlâ i spasims di fin vite.
Ma no jerial so il protocol sanitari?
No, chest mi è stât imponût de autoritât judiziarie. Jo e il gno staff si sin zontâts ulteriôrs regulis par tutelâsi inmò di plui cuintri di eventuâls acusis. Ma a jerin semplicis regulis di operativitât come cjapâ note di dut ce che o varessin fat in aplicazion dal protocol sanitari dal tribunâl.
E simpri su la cuistion de leç, il Parlament al someave che al ves tante premure di comedâ il vulnus legjislatîf su la cuistion: a ce pont sino?
Al pont di prime, ma cul vantaç che cumò tante int e fevele. A proposit dai ats des istituzions cumò e je in vie di discussion la propueste di leç clamade «Calabrò», ma par chel che o sai jo al è di sperâ che lis robis a restedin cussì pluitost che al vegni aprovât chel decret.
Parcè?
No jentri tai detais ma o met in evidence un aspiet fondamentât: chel decret nol considere la alimentazion artificiâl come «intervent sanitari».
In ce sens?
Si paragone la «alimentazion sanitarie» midiant sondin come se al fos un «imboconâ» un frut o un anzian. Invezit chest al è un tratament sanitari, no une semplice assistence come che a volaressin fâle passâ i sostignidôrs dal decret Calabrò. Chest al covente par schivâ l’articul 32 de Costituzion che al dîs che nissun al pues jessi obleât a un tratament sanitari se no par disposizion di leç, che però no pues in nissun câs violâ il limit dal rispiet de persone. Se duncje la alimentazion artificiâl no sarà plui considerade «tratament sanitari», nol sarà plui il miedi a decidi daûr dal articul 32 de Costituzion. In sostance si gjave al miedi la titolaritât de sience, lassant a une autoritât no sientifiche il compit di decidi: al è come tornâ a la ete di Mieç prin di Galileo Galilei che al à introdot il metodi sperimentâl pe sience.
In Europe cemût vegnial frontât l’argoment?
Sedi lis plui grandis associazions sientifichis mondiâls sedi buine part de Europe a considerin la alimentazion artificiâl un intervent sanitari e il testament biologjic al è une realtât. E no je in contrast cui principis religjôs. Par chest tra i nestris consulents o vin clamât ancje il prof. Giandomenico Borasio, un catolic praticant che al lavore in Gjermanie e che al è stât consulent sedi pe Glesie catoliche bavarese sedi pal Guvier di Berlin, scrivint il testament biologjic che cumò al è in vore tal stât todesc.
Si rivarial a cjatâ une soluzion ancje chi di nô?
Il testament biologjic al è une conseguence dal principi dal consens informât: se un pazient al à di vê un intervent chirurgjic ancje piçul al à di jessi informât e al à di manifestâ la sô volontât. Se no chel intervent sanitari nol pues jessi fat. No si capìs parcè che un tratament sanitari come la alimentazion artificiâl al vedi di jessi imponût se il pazient nol à voie.
E la acuse di «eutanasie passive»?
Ocjo a doprâ lis peraulis justis: la eutanasie e je une altre robe. Prin di dut e je un at atîf che si realize cuntune soministrazion di une medisine che e fâs murî. E gjavâ la alimentazion artificiâl no pues jessi nancje considerade «eutanasie passive»: e je une contradizion in tiermins e duncje no esist. O vin fat finî une agunie lungje 17 agns: Eluana Englaro e jere intun stât vegjetatîf, une condizion che no esist in nature e che no esisteve prime des tecnichis di rianimazion avanzade. La ment e je muarte. Eluana Englaro cence lis curis che a àn fat vivi il so cuarp, e sarès muarte subit dopo dal incident.
Nol significhe che il pazient ta chel stât al sedi come un vegjetâl: il non al ven dal fat che il cuarp al à chês sôs funzions controladis dal sisteme neurovegjetatîf: il batit dal cûr, il respîr, ancje lis mestruazions…
Varessie podût vê fîs?
Cuntune tecniche assistide si varès podût fâ une fecondazion: ma si puedie clamâ «mari» un cuarp dome parcè che al pues tignî dentri un ovul fecondât? E sarès stade un incubatôr biologjic… E no stin a dismenteâsi che e sarès une operazion cence consens: une sorte di violence carnâl!
E cemût comential il câs di chel pazient che in Gjermanie nol veve vudis sperancis e invezit al somee recuperâ cumò che lu àn puartât a Udin?
Ancje chi al è il pericul di lâ fûr argoment: une robe al è il stât vegjetatîf, che nol à plui pussibilitât di interazion cu la realtât. Invezit intun stât di disabilitât grivie, il pazient ancje se cun grandis dificoltâts, al pues vê une interazion cul esterni (viôt i câs dal Pape e di Welby). Se chest zovin al à recuperât alc, al significhe che nol jere in stât vegjetatîf come Eluana.
Ce coment fasial de stampe?
Ta chei dîs trements o ai evitât il plui pussibil di lei e scoltâ i media par no colâ te tentazion di rispuindi. Fin che no si è sierade la vicende judiziarie tal 2010, no ai dade nissune interviste dopo chês dôs che o vevi fat (pe Rai cun Marinella Chirico e pal Messaggero Veneto cun Tommaso Cerno). E dal nestri staff nissun al à fevelât o dât materiâl: a son jessûts articui e servizis che a descrivevin particolârs che no son mai esistûts te realtât dai fats. Disìn che tante stampe e à lavorât di fantasie…
Nus fasial cualchi non di persone publiche che lu à deludût e parcè?
No fâs nons parcè che a son tancj e di ducj i colôrs politics chei che a àn doprât il cuarp di Eluana come «cjamp di bataie» par finalitâts che no jerin i interès di Eluana. E di fat no si jerin movûts prin, come che no si son movûts dopo.
E un che invezit al à voie di ringraziâ?
Chei che si son spindûts pe difese di un dirit: une azion trasversâl che e à sostignût une bataie di civiltât. E soredut o ringrazii dut il grup che cun me al à lavorât par tignî fede a chel dovê deontologjic che al à il miedi di compagnâ il malât ancje a la muart te maniere plui dignitose.
Cemût si ise compuartade la int cun lui?
O continui a jessi fermât par strade e a jessi ringraziât e sostignût di personis che pe plui part no cognòs. Di dutis lis mails e letaris che o ai ricevût, mancul dal 5% a son stadis cuintri. E come che o ai za dit, nissun mi à frontât di persone par criticâmi, simpri par daûr.
Tropis voltis si isal cjatât a fâ i conts cu la morâl e la etiche denant de muart?
Ogni an a muerin 300 personis che a jentrin tal repart di Terapie intensive. In 30 agns di cariere (5 sul elisocors) o ai viodût murî passe 10.000 personis e ogni volte al è un fâ i conts cu la muart. No tu puedis usâti.
Esistie secont lui une morâl furlane?
O pensi di sì: la nestre int e à un fuart sens di solidarietât, e sa il significât de soference. Di altris bandis forsit lis reazions a saressin stadis difarentis: no a câs tancj contestadôrs a rivavin a Udin di altris bandis di Italie. E nol è nancje un câs che cuant che o soi vie par conferencis spes mi disin: “Voaltris furlans o vês dimostrât inmò une volte di jessi int che e fevele pôc, ma che e fâs tant”. E chestis manifestazions di stime mi fasin sintî braurôs di jessi furlan.
Tal so libri al conte de dificoltât emotive tal frontâ la linie fine fine che e divît la vite de muart, ancje in rapuart cu la famee dal malât… ce puedial dînus?
Cuant che un malât al jentre in Terapie intensive, cu la famee o soi “trist”: o prepari al piês e no doi sperancis parcè che o preferìs jessi smentît pluitost che creâ ilusions. Cuant che tu âs di comunicâ un decès ti pese e tu riscjis il coinvolziment emotîf. Se tu rivis a fevelâ ben, a costruî un leam, la int e rive a acetâ miôr l’event.
O fevelìn duncje ancje di comunicazion tra miedi e malât, miedi e famee… ce funzion pensial che e vedi la lenghe proprie ta chescj moments?
O dopri la lenghe furlane cui malâts e i parincj: ti permet plui intimitât, la famee e viôt il to sfuarç e lu presee. Ancje dut il personâl dal repart al è atent a chest aspiet.
Lui le dopre no dome par fevelâ: tal so libri a son diviers passaçs in lenghe furlane…
E je vere, anzit, lis primis peraulis che o ai scrit di chest libri a son stadis par furlan e a son chês dal incipit di chel che al è deventât il tierç cjapitul: e je la clamade che o ai vût cun Beppino Englaro cuant che al jere di lâ a cjoli Eluana. O scuen ameti che la idee di mantignî la lenghe furlane par scrivi chê telefonade e je stade de mê femine Cinzia Gori che e je toscane.
Ce pensial dal insegnament dal furlan a scuele?
Jo o soi dacuardi: la lenghe furlane e je un patrimoni che o vin di mantignî come element di culture e identitât, in armonie cun chês altris lenghis che la scuele e à di insegnâ. O soi bilengâl e lu riten un vantaç.
Lui jerial tal moviment des tendopolis dal taramot?
Sì. In chei agns o jeri ancje simpatizant dal Moviment Friûl e i disarai di plui: mê none e jere une Placereani, cusine di pre Checo e une des ultimis voltis che lu ai viodût dopo tancj agns al è stât in ospedâl cuant che o ai scugnût intervignî suntune sô vene pôcs dîs prime che al murìs.
Aial partecipât ai moviments culturâi post taramot?
O soi stât un dai nûf fondadôrs di «In uaite» cun Mauro Tosoni e o ai partecipât a lis manifestazions di chei agns: o jeri tra chei che a àn fermât Andreotti cuant che al leve sù a Glemone tal Autun dal 1976 e i ai dât un volantin.
La Universitât aie di restâ a Udin?
Ancje jo o ai firmât pe facoltât di medisine a Udin. No ai ricetis ma o pensi che la universitât e vedi di jessi part integrant e paritarie dal teritori. E à di jessi leade a fuart cu la realtât dulà che e lavore e no pues jessi une caste sierade intune tor di avori, ma e à di vê une integrazion funzionâl cence pôre di slargjâsi inmò di plui. Anzit e varès di ramificâsi inmò di plui e no jessi incuarpade.
Nus fasial un coment sul sisteme sanitari regjonâl?
No dîs che si à di sierâ dal dut i ospedâi periferics ma, massime pai intervents di chirurgjie e ostetricie, si à di tignî presint che intun ospedâl piçul si à mancul garanzie di sigurece pal sempliç fat che si à mancul casistiche. Cierts reparts a puedin restâ tes struturis periferichis ma za cumò pai intervents plui delicâts e je la int stesse che e domande di lâ ta chês plui grandis.
Trop aial influençât il fat di jessi stât in Friûl tal frontâ lis dificoltâts de vicende che e à rivuardât Eluana Englaro?
La mê part le ai fate intune situazion di condivision. E je stade necessarie la colaborazion di plui personis e ducj a son stâts essenziâi. O vin vude une azion Sociâl, Politiche e Civîl «cu la iniziâl maiuscule» tal rispiet de leç e de volontât dal malât esprimude dal pari che al à scugnût fâsi nomenâ ancje tutôr di Eluana.
Il rapuart cun Beppino Englaro cemût vadial indevant?
Si sintìn dispès ancje pal fat che o fasìn tantis conferencis e lui al è president de associazion «Per Eluana».
Cemût ise lade la serade cun Povia a Enemonç?
E je stade une serade particolâr: o vin vude une biele rispueste de int e e je stade ancje la prime volte che o ai viodût Beppino Englaro a ingropâsi; o scuen però ancje dî che Cristina Martinis e Armando Englaro (il fradi di Beppino), che si son dâts di fâ par cirî la sede, a àn zirât tancj comuns prin di cjatâ la disponibilitât di Enemonç, l’unic paîs che al à acetât.
Ce aie lassât al Friûl la vicende di Eluana Englaro?
O scuen ameti di vê une vision di part ma o pues dî che o vin vût une riscuvierte di furlanetât, cun tante int impegnade cumò a sostignî cheste bataie di civiltât che e eredite il stes spirt che al à animât Loris Fortuna e il so impegn su la cuistion dal divorzi; Franco Basaglia e la sô lote par sierâ i manicomis; la ricostruzion dal taramot e la tradizion des donazions di sanc e di orghins che o vin in Friûl.
Si siere l’an, dulà vadial il Friûl?
No fâs previsions ma o speri pal Friûl che e cressi la sô visibilitât. O sin int che e sa dimostrâ ecelencis in dut il mont ma no sin tant brâfs di autopromovisi: mi auguri che i Furlans a vedin mancul pôre di dî che a vegnin dal Friûl.
Christian Romanini
