Un libri su la storie dai taramots in Friûl nol esisteve. Il libri «Di scjas in scjas, i taramots inte storie furlane» di Agnul/Angelo Floramo al ripasse in mût clâr e cronologjic la storie dai taramots in Friûl, mostrant tant che il pericul sismic al sedi une presince costante inte nestre storie. La pene fortunade di Floramo e acompagne il letôr cun stîl apassionant, bon di fâ someâ chestis vicendis dolorosis cuasi un romanç, pûr restant ancoradis saldo al rigôr storic. Dal mît dal taramot dal an 998, a chel dal 1348 che al cambie adiriture il paisaç, ai siet taramots dal 1700, a chei dal 1900 che si siere cul 1976.
In ocasion dai 50 agns dal taramot dal 1976, La Patrie dal Friûl e publiche «Un libri impuartant, che al varès di jentrâ tal nestri dna di furlans», al dîs il curadôr Andrea Venier.
Une memorie, di fat, che e à di coventâ a frontâ ancje il futûr: inte prefazion Sandro Fabbro, za professôr di Planificazion Teritoriâl li de Universitât dal Friûl, al riflet su chel che al è st fat dopo dal taramot dal 1976 e su ce che o vin preparât par frontâ futûrs avigniments dal gjenar.
Il libri al à dentri infografichis sui taramots in Friûl e tal mont, e al è ilustrât cun pituris e fotos che a fasin une piçule storie visive de rapresentazion dal taramot vie pai secui. Une opare dute di gjoldi, agjile e divulgative che nol pues mancjâ tes libreriis dai furlans.
IL CALENDARI DES PRIMIS PRESENTAZIONS
Si scomece cul apontament di Sant Tomâs di Majan, Place S. Giovanni, 11 tal HOSPITALE DI SAN GIOVANNI, Lunis ai 13 di Avrîl 2026, ae vot e mieze di sere.
Il diretôr de La Patrie dal Friûl Walter Tomada al dialogarà con l’autôr ANGELO FLORAMO, le assessore a lis Financis de Regjon F-VJ Barbara Zilli e Andrea Valcic, president de associazion Clape di culture Patrie dal Friûl editore dal libri. E mail par prenotâsi (conseât): amicidellhospitale@gmail.com.
Si viodìn Vinars ai 17 di Avrîl 2026, ae vot e mieze di sere a LUMIGNÀ al CENTRI DI AGREGAZION di Via della Libertà, 2. Par il cunvigne di ANGELO FLORAMO «Il taramot prime dal taramot, lis olmis dal orcolat in Friul intai secui» e presentazion dal libri «Di scjas in scjas» di Angelo Floramo cun pre Romano Michelotti di Glesie Furlane.
E pe presentazion di Lunis ai 20 di Avrîl dal 2026, aes 6 sore sere tal Salon di Palaç Belgrado, place dal Patriarcjât 3 a UDIN.
Il curadôr dal libri Andrea Venier e il diretôr da La Patrie dal Friûl Walter Tomada dialogaràn cul autôr ANGELO FLORAMO e cul autôr de prefazion Sandro Fabbro.
Conclusions di Andrea Valcic, president de associazion Clape di culture Patrie dal Friûl editore dal libri. Cul patrocini dal Comun di Udin e in colaborazion cun la Banca 360 Credito Cooperativo FVG.
