Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl
3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite de Patrie dal Friûl.
E je une ricorence une vore sintude di ducj i furlans, tant che i è stade dedicade une manifestazion che ogni an si fâs intal mês di Avrîl e che si clame “Fieste de Patrie dal Friûl”.
◆ La prime edizion di chest event e je stade fate a Aquilee intal 1977 par volontât di Pre Checo Placerean – om di glesie e di culture, in plui che un dai ispiradôrs dal partît autonomist “Moviment Friûl” che al screà la fieste – par celebrâ i 900 agns de Patrie. Cul passâ dai agns, la Fieste e je deventade pardabon une tradizion, tant che chest an si celebrarà la edizion numar cuarantesîs.
Ma cuâl isal stât l’event precîs che in chel lontan 3 di Avrîl dal 1077 al à puartât ae creazion de nestre storie, culture, lenghe e identitât?
◆ La nassite de Patrie dal Friûl e je leade ae costituzion, de bande dal imperadôr Indrì IV, dal Stât Patriarcjâl furlan – clamât ancje “Patriarcjât di Aquilee” –, che subit si è mostrât tant che une des istituzions politichis plui significativis de Italie de epoche: rezût dal Patriarcje di Aquilee, al deve adun il Friûl e diviers altris teritoris intun unic organisim indipendent che al è rivât a formis di organizazion civîl cetant ae avanvuardie par chei timps.
La formazion di chest gnûf Stât Patriarcjâl e à pardabon rapresentât une espression di ricognossince di Indrì IV pal Patriarcje Siart, che i veve permetût al imperadôr di passâ pai siei feuts par rivâ in Gjermanie e risolvi cuistions politichis di massime impuartance.
◆ Volint premiâ la sô fedeltât, ai 3 di Avrîl dal 1077 l’imperadôr i à concedût a Siart il titul di Duche dal Friûl, fissant duncje la nassite dal gnûf Stât Patriarcjâl. Chest Stât al è vignût ae lûs sot forme di principât eclesiastic dal Sacri Imperi Roman e al è restât in pîts fin al 1420 (cuant che al è stât concuistât di Vignesie), par dopo condurâ tant che orghin di rapresentance politiche (Parlament) fin tal 1805.
Il Stât Patrarcjâl al fissave e al rispietave leçs propriis, al bateve monede e al veve un Parlament, caraterizât di aspiets che lu rindevin une vore “moderni” e che dal sigûr i davin un ciert lustri.
◆ Il Parlament furlan al jere un dai plui antîcs di Europe e al previodeve une rapresentance assembleâr no dome dai nobii e dal clericât, ma ancje dai Comuns: chest al è un dât no secondari, parcè che al indiche che za in timps antîcs in Friûl al esisteve un orghin politic che al permeteve a dute la societât di esprimisi, e no dome a une sô part privilegjade.
◆ La Fieste de Patrie dal Friûl e rapresente une ocasion preziose no dome par celebrâ i valôrs identitaris de nestre regjon par come che e je vuê, ma ancje par rifleti su lis basis politichis e istituzionâls li che e à fondât lis sôs origjins e secui intîrs de sô storie; e ancje une ocasion par ricuardâ e – volint – par interpretâ in clâf moderne lis formis di autoguvier e di rapresentativitât che par secui le àn caraterizade.
◆ Al è un event itinerant, che duncje ogni an si fâs intun Comun diviers: chest an, par celebrâ i 946 agns de costituzion dal Stât patriarcjâl furlan, si fasarà a Caprive domenie ai 16 di Avrîl.
De sô organizazion si ocuparan la Regjon autonome Friûl-Vignesie Julie e la ARLeF- Agjenzie Regjonâl pe Lenghe Furlane, sostignudis de colaborazion preziose dal Istitût Ladin Furlan “Pre Checo Placerean”.
◆ L’event al tacarà aes 9.30 cu la esposizion de bandiere dal Friûl li dal monument ai muarts di vuere in vie Dante Alighieri, cul acompagnament de bande “Città di Cormons” che e sunarà l’Imni uficiâl dal Friûl “Incuintri al a doman”.
Po dopo il corteu si movarà bande la glesie parochiâl, dulà che aes 10.00 si celebrarà la Messe in lenghe furlane, che e cjaparà dentri leturis e preieris ancje par sloven e todesc.
◆ La fieste e larà indenant in centri, dulà che aes 11.15 si esibiran grups folcloristics dal paîs, prime che e tachi la cerimonie civîl de Fieste de Patrie. Po dopo, il grup storic “Città di Palmanova” al leiarà la bole imperiâl, e a saran il scambi de bandiere dal Friûl e i salûts des autoritâts.
Si gustarà a Vile Russiz, e po dopo si podarà partecipâ a dôs visitis vuidadis, une ae Fondazion Vile Russiz e une al Cjistiel di Spesse.
Al è impuartant marcâ ancje che sabide ai 15 di Avrîl, tant che iniziative colaterâl, si davuelzarà un moment impuartant di riflession che il Teatri Stabil Furlan e la Associazion Teatrâl Furlane a àn decidût di organizâ te sale Civiche di Place Vittoria: la cunvigne “Teatri furlan: il stât da la art”, che e metarà dongje autôrs, artiscj, aministradôrs, organizadôrs, public, inteletuâi par discuti su lis prospetivis di chest setôr, pardabon strategjic pe culture di chenti. ❚
