Prime part – Aspiets introdutîfs e esemplis
In timps resints, l’aument e la consecuente visibilitât dai problemis ambientâi, dutune cul cressi de culture e de sensibilitât, e cu la difusion dai mass media e de lôr pervasivitât, a àn fat in mût che un numar simpri plui grant di personis e cjapàs cussience che la direzion che l’om al à cjapât intai confronts dal ambient e je di indreçâ. Chest al à fat nassi dibatits, discussions, manifestazions e altri che a àn tant che obietîf declarât la protezion dal ambient. In chest ambit a son “saltadis fûr” peraulis, cjapadis ancje dal lengaç tecnic sientific, che dopradis di une masse di personis estraniis ae sience e ae tecniche a àn tacât a cjapâ un significât che nol è chel origjinari ma che, riferintsi a peraulis che a àn une “origjin” sientifiche, al somee che al vedi tant valôr.
◆ Di timp ducj a doprin la peraule “ecologjie” che e ven metude dentri dapardut, massime se si vûl dimostrâ che la ativitât in cuistion e ten cont dal ambient, anzit, lu “valorize”. Ecologjie al ven dal grêc “oikos”, “cjase” (intal sens di puest dulà che si vîf, no di fabricât) e “logos”, “discors, studi”, di chi la “sience de cjase”, ven a stâi la sience che e studie lis cundizions di esistence dai organisims vivents e lis interazions fra i organisims e l’ambient e fra organisims e organisims. Duncje, se o tignìn in considerazion il significât coret, doprâ la peraule “ecologjie” tal discors di ogni dì nol à nissun significât, stant che a son ben pocjis lis personis che a fasin studis in chel setôr o che a tratin problemis che a tocjin chel cjamp di studi.
◆ Su la fonde, però, di ce che e al è ripuartât parsore, l’ûs comun che e al à cjapât pît al à fat meti dentri la peraule in diviers contescj, i plui varis: cussì a son nassûts, par esempli, “operadôr ecologjic” o “transizion ecologjiche” che a vegnin doprâts par dâ un tono, un valôr aes ativitâts a lôr inerentis che, però, in pratiche no significhin nuie: ce vuelial dî “operadôr ecologjic”, che al è un che si impegne a fâ studis di ecologjie (?) o dî “transizion ecologjiche”, che la int o alc si sta spostant (no si sa di dulà) viers indagjins di caratar ecologjic?
◆ Chest mût di esprimisi al è fi di une vision superficiâl dal mont e de realtât naturâl, e de mancjance di une educazion adeguade, e al va daûr des modis che, in chest moment storic, a vuelin mostrâ che o sin ducj biei e brâfs e che o agjìn in maniere corete intai confronts de Nature.
◆ In plui di ecologjie, a vegnin dopradis altris peraulis, sedi derivadis dal lengaç sientific e tecnic tant che “biologjie” (soredut l’element “bio” dal grêc “bios”, “vita”) o “resilience” (une des ultimis rivadis), che di altris divignincis tant che “vert” o ancjemò miôr “green”, “sostignibil” e altris che dopradis bessolis o in cubie (par esempli, “ecogreen”, “ecosostignibil”, “rivoluzion verde”) a vegnin metudis dentri intai contescj plui varis.
◆ Chest mût di trasmeti un messaç si è tant sparniçât che fintremai un partît politic al veve intal so non la peraule “ecologjie”. Cheste e je une contradizion intai tiermins parcè che, par definizion, la sience si fonde su la obietivitât, un partît si fonde su la subietivitât.
◆ Clâr che dut chest al ven fat par vê un tornecont, pensant che il doprâ chês peraulis al indichi un rispiet pal ambient che, intal sintî comun, al è positîf e duncje di premiâ cuntune sielte, un vôt o, in gjenerâl, cuntune aprovazion.
◆ In cheste suaze, i talians a àn clamât un ministeri “de transizion ecologjiche”: dut chest presumût interès pes tematichis – clamìnlis – “ambientâls”, al à l’obietîf di fâ pensâ che dut, fintremai lis direzions governativis, a sedin in funzion dal rispiet dal ambient e de vite, ancje di chei altris vivents.
◆ Passant cumò des peraulis ai fats, viodìn cun cualchi esempli ce che dut chest interès al previôt in tiermins di misuris adotadis pe tutele (sensu lato) ambientâl e dai vivents.
◆ La foto 1 e mostre la glerie de Fele inte zone dal puint da la Cjargne. O sin in plen periodi riprodutîf dai uciei, e i intervents a jerin bielzà scomençâts ancje intal periodi riprodutîf dai anfibis. La glerie e je stade splanade, la diversitât morfologjiche e je stade azerade, la complessitât struturâl e je diminuide a fuart, no si viôt vegjetazion ma a son evidents i “segns” dal passaç di mieçs mecanics, la aghe e à scugnût cjapâ la direzion consecuente aes modifichis che a son stadis fatis. Une strade e un puint che a permetin di passâ la aghe a àn favorît il passaç di personis ancje cun mieçs a motôr in zonis di glerie che, se no, no saressin frecuentadis e dulà che, viodude la scjarse sensibilitât gjenerâl a son stâts fats lâ indevant e indaûr cjans no peâts che, duncje, a puedin fâ grancj dams. Par esempli, a puedin eliminâ nidiadis interiis di uciei di speciis che, magari, a son prioritariis pe conservazion su la fonde da normative europeane, e che duncje a varessin di jessi interessadis des misuris conservativis che dutis lis peraulonis dopradis a varessin di rapresentâ.
◆ La foto 2 e mostre la glerie dal Dean dongje dal puint pal Cjanâl Pedarç. Ancje in chest câs, al è evident ce che l’intervent al à provocât, massime se si cjale la foto 3 che e mostre la glerie prin dal intervent; cheste foto e jere stade fate in ocasion di un indagjin metude adun par studiâ cemût e in ce timps che ciertis speciis di uciei che prin no jerin in chei lûcs si stan espandint dilunc de vegjetazion des rivis e de glerie. Naturalmentri (tiermin doprât par fâ capî la sostituzion dal om intai confronts de Nature in ciertis dinamichis che aromai a àn pôc di “naturâl”) al à pensât l’om a blocâ la espansion.
◆ No jentrant intal merit dal motîf dai doi intervents, cualsisedi che al sedi stât, al è evident che, intai câs ripuartâts, di ciert tra i indreçaments doprâts nol è chel conservatîf. Cun di plui, si pues afermâ che, dal sigûr, se a fossin stâts tignûts in considerazion ancje i aspiets biologjics e ecologjics, doprant lis justis atenzions, i intervents a podevin vê un impat diviers. Al è clâr però, che par podê lavorâ e programâ i intervents intun mût diviers si varès vût di cognossi lis relativis problematichis ambientâls.
La seconde part a sarà publicade sul numar di Jugn. ❚
