Sfuei Mensîl Furlan Indipendent
Archivi de Patrie

140 agns fa al sierave i voi Jacopo Bartolomeo Tomadini: mestri e vuide internazionâl de musiche liturgjiche

Alessio Screm
Jacopo Bartolomeo Tomadini (Cividât 1820-1883)

A son un biel pôcs i inovâi, chest an, di musiciscj e di compositôrs furlans. O contarìn di lôr dilunc dai prossims numars dal nestri gjornâl. Par calâ subite un as di chei bogns, o fâs il non di un tant cognossût: Jacopo Bartolomeo Tomadini. Propite lui, nassût ai 24 di Avost dal 1820 e muart ai 21 di Jugn dal 1883, ven a stâi 140 agns fa. Cividât la sô cjase, indulà che al è nassût, muart e indulà che al à operât, scrivint musiche, sunant l’orghin dal Domo e tant che mestri di capele e canonic de Colegjade de citât ducâl. E no di mancul, al è stât ancje diretôr dal Museu Archeologjic e inmò sore catechist des scuelis feminîls e confessôr des maris Ursulinis dal munistîr maiôr, li che al veve ancje la incarghe di diretôr. E esist une targhe in so onôr e dal 1921 ai è tumulât tal Domo, dongje dal so mestri Giovanni Battista Candotti. A Tomadini e je dedicade la scuele elementâr e a Udin i è intitulât il Conservatori, ancje par vie che in chel timp al jere academic dentri di chel ent che chê volte si clamave Istitût Filarmonic Udinês.
◆ Insume, un predi e compositôr cognossût e stimât, no dome ca di nô, ricuardât tra lis figuris plui impuartantis inte storie musicâl sacre taliane e foreste dal secul XIX. In particolâr par vie che al è stât un dai protagoniscj de riforme de musiche liturgjiche clamade “ceciliane”, che e voleve ripuartâ la musiche intai criteris di une funzionalitât ai rîts de Glesie catoliche, cirint di slontanâle di une cierte teatralizazion che si stave simpri di plui insinuant dentri de liturgjie, dentri dai cjants e des musichis di ispirazion religjose. Al è stât par chest in prime file tai comitâts e tai congrès di musiche sacre, tra i fondadôrs de Associazion taliane di Sante Cecilie; dongje di un altri iluminât, pari Guerrino Amelli, al à fondat la riviste “Musica Sacra”, si è impegnât pal consolidament a Rome di une Capele Gregoriane par preparâ i cjantôrs come che Diu comande. Al è inmò sore stât president di comissions permanentis pal esam di progjets pai orghins liturgjics e al à fat zirâ il so non a Vignesie, Milan, Arezzo, Rome e in altris citâts. Tal forest si è fat valê a Nancy, a Parîs e in altris capitâls midiant de sô produzion musicâl, premiât diviersis voltis tai concors di composizion. Si lui ricuarde ancje par vê vût rapuarts epistolârs cul famôs pianist Franz Liszt e cognossincis cun musiciscj e musicolics di nomee tant che Luigi Ferdinando Casamorata, Raimondo Boucheron, Edmond de Coussemaker, Jean-Baptiste Fétis.
◆ Tomadini, di no confondi cul nevôt omonim nassût tal 1861 e atîf a Gurize, Çarvignan e Zara, al à scrit sietcent e passe composizions, soredut di musiche sacre, tra motets, graduâi, imnis, salms, messis, litaniis e responsoris. Tra lis oparis plui significativis si ricuarde la “Messa ducale” (1868), la “Messa di Santa Cecilia” (1870), il “Te Deum” (1879), il motet “Anima Christi” (1879), il “Miserere in mi minore” (1881), i “Missus” pe novene di Nadâl e la cjantade “La resurrezione del Cristo” (1864), a cuatri vôs e orchestre su test di Vincenzo Meini. Al jere ancje sagjist, tant che al à scrit tal 1882 “Dell’antica tonalità” e “L’accompagnamento del canto fermo”. Tra lis curiositâts sul so cont, al va dit che i plaseve sunâ ancje la arpe e il violoncel. Largje e je la bibliografie su di lui e lis produzions discografichis. Duncje, leiêt e scoltait. ❚

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +