1914-2014 CUINTRISTORIE DE GRANDE VUERE. Glesie mari par un popul invadût

La nestre “cuintristorie” de prime vuere mondiâl. Une grande tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf. O contìn lis storiis che la retoriche dai Stâts nazionâi no à mai contât. 9e pontade ✒ Redazion

Al è cuasi un destin chel dal impast strent tra la Glesie Furlane e il so popul, di gjenerazion in gjenerazion. Un respîr ancestrâl e antîc, che al cjape dentri dute chê sdrume di secui dal prin moment di une evangjelizazion complicade, eretiche, speciâl, dute nestre, fin al dì di vuê, ai profetis di chenti, dai nestris timps, chei za plui voltis nomenâts e mai dismenteâts: Biasut, Marchet, Placerean e Beline che – cuntun voli al Antîc e chel altri al Doman – a àn tirade sù une fuarte convinzion identitarie. Cul esempli, plui che cul insegnament. Chê stesse Glesie che e tignive dongje la sô int cuant che Rome si sfantave devant dal sburtâ dai Barbars (ma jerino pardabon cussì cence storie i Gots o i Langobarts?) no si è dismenteade de sô mission intant de prime vuere mondiâl. Cuasi che e fos la vie segnade dal so destin. Une direzion di ricercje interessante e je chê che tai ultins agns e cîr di studiâ cemût che i predis e i vescui dal teritori furlan si sedin metûts, di une bande, cu lis istituzions (il guvier, i siei rapresentants, l’esercit e i siei uficiâi) e, di chê altre, cu la int. Ven a stâi, oms, feminis, vecjos e fruts che a subivin une situazion tragjiche e spaventose tant che chê de vuere, de invasion, de fam, de injustizie. Bisugne dî prin di dut che i predis furlans a son simpri stâts viodûts cun suspiet de autoritât che e rapresentave il podê centrâl talian. I studis bielissims e cetant gustôs di Furio Bianco a dimostrin, documents di archivi ae man, che bielzà ai timps de invasion di Vignesie (1420) e tai secui daspò, in particolâr tal Sîscent, lis sagristiis dispès a deventavin un bon ripâr par chei che il rapresentant dal Doge al considerave brigants, bandîts e cuintribandîrs, e che invezit dispès a judavin lis comunitâts di paîs a vivi e a resisti ai soldâts e ai capuçats de “Serenissime”, dividint chel che si vuadagnave fûr vie robant ai siôrs che a vevin robât ai puars. Plui di cualchi predi al fo acusât di jessi de bande dai laris parcè che ju visave sunant lis cjampanis cuant che si riscjave une ispezion di soldâts. Al stes mût, là che il Stât talian inte prime vuere al fâs la part dal orcolat che al ocupe, al recuisìs, al confische, al depuarte, cuant che no ti cope obleant la miôr zoventût a lâ in trincee, la Glesie e vierç lis puartis: e no dome chês dal cûr, ma ancje lis canonichis, i orts, i cjamps, lis cantinis, metint a disposizion dal Popul ce che e à par judâlu. Cjalâts cun grant suspiet tant che “austriacants” dai governadôrs talians o dai nazionaliscj iredentiscj di chenti, i predis furlans in efiets no àn mai vude pôre di pandi il lôr pinsîr in timp di vuere, che al jere pe plui part simpatizant dal periodi imperiâl. Come che ben si sa, il Friûl al devente talian dome in tal 1866. Chest al vûl dî che un predi zovin che al vignive fûr dal seminari in chel an alì, e che al veve plui o mancul vincj agns, tal 1914 a ’nt veve mancul di setante. Duncje al podeve jessi un bon vecjo bonsignôr di paîs. Formât di une gjenerazion che e veve servît sot de Austrie. Studiant il catechisim in lenghe furlane, dal moment che Viene e permeteve che ognidun dai siei popui al podès preâ inte lenghe di sô mari. E duncje al jere vignût sù, tai agns de “cuistion furlane” – come che si varès di clamâle, tant che la cuistion Meridionâl e che Romane -, intun clime trement, là che la Italie e voleve dî repression, control, negazion di une identitât e di une libertât che i “cusins” – chei che a jerin a stâ di là di Cormons o parsore Pontebe – a podevin ancjemò gjoldi liberementri, cence vincui e cence pôris. Chescj predis, dal 1914 al 1918, a firmarin letaris, petizions, a alçarin la lôr vôs cuintri il stât maiôr talian che al faseve fente di nuie cuant che i siei soldâts si compuartavin tant che invasôrs e barbars, robant, brusant, violant. Nissune vôs si è alçade cussì fuarte e sclete tant che chê di chei predis. Che no si limitavin a scrivi il lôr sdegn o il lôr corot intes pagjinis intimis e privadis dai diaris, ma a tonavin dal pulpit, a clamavin in cause il vescul, par che al cjapàs proviodiments imediâts a pro dal popul cuintri chei siôrs che lu striçavin. Purtrop dispès il vescul, tant che autoritât, al veve miôr la vie diplomatiche, il compromès, l’acomodament, ubidient e servîl tal omagjâ i plui fuarts e pront a punî chei “fradis” rivoluzionaris che no volevin rindisi mai. Clâr, in tal non di une prudence politiche che si dismenteave de urgjence de Caritât. Tant che dispès a punivin i lôr predis, invezit di incoragjâ la lôr pratiche evangjeliche. Emblematic, al contrari, il cas di bonsignôr L. Pellizzo, vescul di Padue ma di clare origjin furlane, che al condane in maniere vierte chel che a fasin i ardîts talians, la lôr prepotence, la violence nazionalistiche di ogni lôr azion e di dute la propagande che si puartin daûr: “L’esercit talian che al ocupe il Friûl nol à mai patide ostilitât e pûr, cuasi pardut, i predis a son stâts acusâts di vê stiçât dal altâr la popolazion cuintri l’esercit ocupant (al è clâr che al fevele di chel talian, n.d.r.), e di vê mandât segnâi al nemì cu lis cjampanis. Ma chestis acusis a son dome che une arme dai anticlericâi […] e dal moment che i acusadôrs no poderin provâ nuie che al ves un valôr intun procès par une condane, a adotarin la soluzion dal internament, che tal teritori governât dal Secont Cuarp di Armade al fo trist, par no dî barbaric”. Peraulis scletis. Onestis e claris, che a clamin une precise e fuarte responsabilitât de Italie di une bande, e al contrari a pandin un ategjament limpit e libar di chei predis di paîs, armâts di nuie altri che nol fos il Verbum dal Vanzeli, coragjôs e pronts a doprâ dut ce che a podevin che al fasès un grant scjas, obleant il comant militâr a intervignî par cirî di capî ce che al steve sucedint. Pelizzo al cognosseve ben i predis furlans. Inte straordenarie maiorance, cussì lontans dal vuacâ dai capelans militârs talians tant che il pastôr al è diferent dal lôf, simpri pronts a benedî canons e bandieris e pluitost smemorâts di chel comandament che al dîs di no copâ il fradi! In chest an, che si celebre l’inovâl di Glesie Furlane, ricuardâ la sô mission ancje intal scûr di une gnot grivie e pesante come chê de prime vuere mondiâl nus regale chel tic di lûs che nus permet di lâ indenant a sperâ. Ad maiorem gloriam Domini. ❚
Angelo Floramo