La nestre “cuintristorie” de prime vuere mondiâl memoreade chest an. Une grande tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf. O contìn lis storiis che la retoriche dai Stâts nazionâi no à mai contât. (6e pontade)✒ Redazion
No si conte mai, in nissune vuere, il numar dai fruts che a restin striçâts di chê machine orende che ju glot cence misericordie. Pal solit a muerin di fam. O pûr a fasin il bot zuiant cun cualchi bombe restade platade. Mutilât, strupiâts, vuarps. A pain il cost plui alt. Ur mûr il pari in trincee. O il fradi. Ur violentin la mari, o ur puartin vie la sûr. Chest colp o vin voie di contâ une storie che pal solit no ven mai ripuartade: i fruts che si pierdin, che a vegnin puartâts vie dal aiarat neri di cualchi bataie, che no cjatin plui la strade di cjase cirint di scjampâ. Une aventure che e à il savôr de liende. In cualchi câs la disperazion di une tragjedie cence pussibilitât di riscat. Tignint cont dome de provincie di Udin, il numar dai piçui sdrumâts dai events militârs, chei sot dai cuindis agns, al è pardabon impressionant: une ricercje cetant scrupolose, puartade indevant in chescj ultins agns di Daniele Ceschin, nus conte che a forin 48.172. La plui part di lôr pierdint il contat cu la famee, i amîs, i parincj. In tancj a rivarin adiriture in Sicilie, plens di fam, malatiis, disperâts. Nissun nol veve proviodût vivars par lôr. Dispès a finivin in cualchi orfanotrofi, o in cualchi convent. Ma e jere la soluzion plui fortunade. Centenârs di fruts, a partî di trê agns, la plui part di lôr e veve cinc o nûf agns al massim, investîts de int che è scjampave, sburtâts parsore di cualchi tren o di cualchi cjar, a rivarin a Milan tal 1917 e a vignerin smistâts di un istitût a chel altri. A son cence famee, che magari e je rivade a Napoli sepidiu in ce maniere. Di une bande e di chê altre cence savê ce che al jere capitât a di chei altris. Vîfs o muarts? In pericul o metûts in sigurece? No si pues nancje imagjinâsi la pôre, il marum, la disperazion dal sigûr dai plui picinins, ma ancje des maris. I documents esaminâts nus contin storiis di pôre. Centenârs di chescj frutins no forin nancje mai plui reclamâts. Forsit a jerin restâts vuarfins, o forsit la disperazion, in cierts moments, e je cussì grande che e oblee a pensâ ai fruts che a son dongje, che tu puedis ancjemò salvâ e controlâ, pluitost che meti il cûr in ansie daûr di chei che si son pierdûts pe strade. Par ironie dal destin i fruts spierdûts, rispiet a chei che a restarin dispatriâts cu lis lôr fameis, a poderin gjoldi di un minim di assistence e di custodie, a poderin studiâ e mangjâ e protezisi sot di un tet. Chei altris invezit a forin doprâts par judâ a lavorâ lis impresis di vuere, scjampâts ae furie dai scombatiments ma ae fin consumâts di une vite di fadie e di strachetât. Cussì tantis fameis che a vevin puartât in sigurece i lôr fruts lontan dai pericui ae fin a preferivin lassâju tai istitûts e tai orfanotrofis, par permetiur une vite almancul in aparence plui decente e sigure. Aes volte e lave ben. Come par esempli il câs de Colonie di Città di Castello, là che tancj frutins furlans a forin consegnâts, cu la precedence pai vuarfins di vuere, o pai fîs di gjenitôrs dispierdûts, e ancjemò pai vuarfins di mari cul pari al front. Il progjet al jere chel di fâur studiâ economie agrarie dongje de pratiche di vite sui cjamps: a imparavin a molzi, a tignî cure dal ort e dai cjamps. Chei che a tornarin a cjase dopo cualchi an a poderin sei integrâts intal setôr de agricolture. Ma no stin a pensâ che la situazion psicologjiche e morâl dai piçui ospits e fos tant biele. Simpri Ceschin nus puarte la testimoneance di frututs plens di miserie, di pôre, simpri a cori daûr cul pinsîr ae cjase sbandonade, ai afiets; cussì sbrendolâts tai vistîts e sporcs di pulçs e pedoi. Dispès, nus contin lis cjartis e i documents, no vevin scarpis, a scugnivin cjaminâ discolçs; ancje par chest a vignivin cjapâts di mire di chei abitans des comunitâts là che a vignivin ospitâts. Al conte un memoriâl cjatât simpri di Ceschin che al ripuarte la testimoneance di un di chei fruts: “i fantats sicilians nus jemplavin di pachis, nus clamavin “Rossi del Nord”. Par câs, cuant che o rivarin nô, pe prime volte al neveâ. E chê int che no veve mai viodude la nêf nus sbeleave. I fruts nus cjolevin vie disint che se al veve neveât e jere colpe nestre, che la nêf le vevin puartade nô dal Nord”. Di Istat lis robariis di cualchi miluç o di cualchi cjariesie, di Autun di un rap di ue, di Invier di cualchi len, e salvave de fam. Il bosc al garantive di vivi: cjastinis, cualchi trapule pai ucieluts. Oviementri une condizion che e veve di sedi platade, scuindude, contade par lidrôs, come che spes al à fat il spirt nazionalist talian cuant che al veve di fâ i conts cu la sô memorie.
Ancje par chest la propagande nazionalistiche taliane e à pensât ben di profitâ dai fruts pierdûts par une reson politiche evidente: cussì tal Istat dal 1918 su la stampe taliane e fo difondude la storie di un frutut di S. Denêl, un piçul vuarfin, che si sarès volontariementri unît a une compagnie di ardîts par judâju intes operazions militârs: al montave sui fîi dal telegraf par justâju, al faseve cualchi servizi ai soldâts. Al veve di nassi un mît, une storie gloriose tant che chês contadis tal “Libro Cuore”, là che si fondave tal patriotisim e tai sintiments talians nazionaliscj e militarizâts un sens di identitât che di li a cualchi an al varès cuintribandât ancje il Fassisim cui siei Balilla. La veretât, come che si pues capî, e je une vore diferente. Chescj fruts robâts dal stât talian e sbandonâts a vignivin sù come salvadis, ae buine, e je vere, ma ancje a scuvierzevin un sens identitari straordinari tra di lôr. No vevin nuie ce spartî cu lis comunitâts là che a jerin stâts sdrumâts vie pe basse Italie. E che ju cjalavin cun difidence, ju tratavin cun tristerie. A fevelavin une lenghe che no si capive, se no tra di lôr. A jerin “chei ros dal nord che a puartin la nêf”. A vivevin tal salvadi. No, propite no jerin talians come chei altris. A saran ancje stâts dispatriâts, dismenteâts, cence pan e cence scarpis, ma a vevin fuart chel sintiment di identitât, platât tal cûr sot i smuarseons de fam, che dispès al nas ledrôs, par diference, e si fâs solidarietât, union di fradis, voie di riscat. Rabie. Forsit la sperance di libertât e di autonomie dal nestri Popul, se no je passade intes trinceis, tal svintulâ retoric di bandieris insanganadis e no voludis, le àn sgarfade chescj fruts pierdûs, sot de nêf, cjatantle biele e intate, tant che une cjastine incocolade tal so riç. ❚
Angelo Floramo
