1914-2014 IL CENTENARI DES BAUSIIS E DE VERGOGNE. Simpri de bande dai traditôrs!

E scomence cun chest numar la nestre bataie cuintri des manifestazions dal centenari de prime vuere mondiâl. O pensìn che e sedi une vergogne spindi bêçs par celebrazions retorichis di cheste Grande Tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf.
Une rubriche par no dismenteâ e par contâ la veretât viodude cui voi dal nestri popul, che e larà indevant par dut l’an presentant storiis e aspiet de cuistion che la retoriche dai Stâts nazionâi no à mai contât. (1e pontade)

✒ Redazion
_________________________
Cualchi colp di pistole e in pôcs istants, insiemi cun Franz Ferdinant, arciduche di Austrie e di Ongjarie, al cole il mont. Al è il 28 di Jugn dal 1914, sul puint latin di Sarajevo, par man di Gavrilo Princip, serp. O almancul, lui al à sbarât, ma l’ordin al vignive dal alt. Cent agns fa. Chê sclopetade e sarà dome la prime di une vuere bielzà preparade di timp, intes stanziis là che si decît il destin dai popui. E je la Europe des bancjis, des fabrichis, dal Capitâl che à sêt di sanc, che e stice il nazionalisim, di ogni colôr al va ben, pûr che al puedi justificâ il maçalizi. E cuasi par coionâ il mont, come che simpri e à fat, e progjete la muart di un om che invezit al crodeve inte libare afermazion di ogni nazion, dal so sacrisant dirit di esisti, di fevelâ, di scrivi inte lenghe dai siei vons. Sì, parcè che l’arciduche al jere un sostignidôr ferbint de libertât dai popui europeans, de lôr dignitât; al sostignive che sclâfs, latins e todescs a varessin vût di podêsi autodeterminâ in base al principi nazionâl, promovint azions une vore concretis (come i parlaments popolârs nazionâi) là che la storie, la lenghe, la culture di ongjarês, gjermanics, boems, polacs, cravuats, slovens, serps, furlans e talians a varessin podût jessi preservadis cu la scuele, la universitât, i gjornâi, lis bibliotechis. Scrivint in dutis lis lenghis e in ducj i alfabets dal Imperi. Ce biele ironie, che une vuere nazionalistiche e imperialiste e podès sbrudiâ fûr il so velen propite passant pal omicidi di un om come chel li! Il risultât in struc? Sessantesîs milions di oms a saran arolâts, e di lôr plui di trentesiet milions a muraran: ven a stâi cuasi il 58% de “miôr zoventût” de Europe. E chest, tignint cont dome dai soldâts. Parcè che il belanç al è une vore plui pesant, se si passe a considerâ i “efiets colaterâi” che a àn simpri une muse, un non, un cognon, une storie. Ma nol baste: la gjeografie politiche dal mont e sarà dal dut savoltade, e no simpri in miôr: i tratâts di pâs dal ’18 e dal ’19 – che al al sarès plui just clamâju “di vuere” – a laran a stiçâ svindics, atrocitâts, pulizie etniche, profugancis, deportazions, soflant odi su lis boris de umiliazion subide. Une disperazion gjenerâl che dome une vuere cussì inutile, sassine e love a varès podût puartâ. E cumò, chê stesse piçule Italie che tal 1914 e preferìs spietâ, come che à simpri fat, par viodi dulà che l’aiar al va a poiâle, jentrant a combati dome un an plui tart – e, par di plui, cun sorprese gjenerâl, sposant la cause no dai siei aleâts, ven a stâi Austrie e Gjermanie, ma dai lôr aversaris -, e clame adun storics, inteletuâi, scritôrs, artiscj, spindint un frac di beçons par celebrâ l’aniversari. Celebrâ! E je vere che la malatie dai aniversaris e je une mode dute taliane. E àn pûr pensât di inmaneâ miârs di fufignis par ricuardâ tal 2011 chê “unitât” dai 17 di Març dal 1861, cu la solfe dai 150 agns, cuant che in chê epoche no jere stade decretade nissune unitât! No pai furlans, almancul. E nancje pai romans! Che a saressin deventâts a fuarce talians, i prins dome tal 1866, e che altris tal 1870. E nancje dal dut: parcè che il tratât di Cormons al proviodeve che dute la Val Cjanâl e il Friûl Imperiâl a restassin sot di Viene. E il pont, la magagne, la strambetât curiose, se no fos pardabon tragjiche e dolorose, al sta propit achì. In cuâi libris di storie si contial che un confin imponût di un tratât cincuante agns prime al varès metût furlans cuintri furlans, une volte sclopade la Grande Bote? Sì, parcè che jessi nassûts a Gradiscje o a Malborghet al voleve dî “Viene”; jessi nassûts su chê altre rive dal Judri invezit, o a Piere Taiade, “Rome”. Fradis cuintri fradis. Cusins cuintri barbis. E chei scarpelins di Vît, o di Forgjarie, o pûr i fornasîrs di Buie, chei che di gjenerazions a jerin lâts a vore in Cravuazie, o in Baviere, che si jerin fats amîs là sù, o pûr si jerin sposâts, a vevin fîs, feminis, vie pes Gjermaniis, e cumò a varessin vût di trai cu la sclope a chei che ur vevin dât il pan! Celebrâ une vuere no pues jessi une azion etiche. Se ogni cuatri di Novembar o scugnìn parâ jù l’ingomi di bandieris e bandierutis, monturis, paradis e cjants, no si rive a imagjinâsi ce che al sarà di chi al 2015. E nol è nancje dignitôs metisi sù i vistîts di un “pacifisim” pelôs, sglonfât ancje chel di une retoriche masse dolçose e fraide. Stant che chi no si trate di ricuardâ une Grande Tragjedie, e nancje di provâ a inmaneâ une riflession su la mancjance di ogni valôr intun conflit che al met ducj i popui che lu àn scombatût sul stes plan. Si trate pluitost di evidenziâ cun grande luciditât e scletece ce tant laide e sporcje che e je stade cheste disastrose venture. Che nol è mai esistût un cjamp dal onôr, che la int – massime la nestre, furlane – no lu podeve concepî, ni pensâlu, ni imagjinâlu, stant la sô storie, il so jessi lontane di ogni adesion a bandieris e patriotisims imponûts di lontan. Come che al è capitât a chel soldadut cjantât intune maniere straordenarie di Zorç Ferigo, che al fevele a Nadâl cul caporalut muc, e al pense che tradî la porche Italie, che no i da nancje il pan di mangjâ, e scombati cuintri la Gjermanie, dulà che invezit al è lât a vore, nol è une viltât. Ma une fuarte voie di ribelâsi a di un sisteme bon dome di masanâ i oms. Che ti da la medaie di eroe se tu copis i siei nemîs, cuant che invezit ti impon di deventâ un sassin. E alore vie ancje nô cun lui, a promovi il tradiment, come uniche, vere, grande afermazion di libertât!
Da “Un soldadut” di Zorç Ferigo:
[…] La luna e jo i erin a Nedâl / di vuardia a chel fossâl ch’a clamin trincea / al spiava chê luna, ma da un ati pruc / un caporalut muc, encje lui di vea / “Taliano, hai tu paura di parlare?” / “Jo no, ma vosâ massa a nol conven. / Ti faccio il mio augurio per Nedale / e po di jessi in pâs chest Nedâl cu ven”. / La patria a è chel amîc cjatât tal scûr / cença musa, bon cûr, il so pac di trinciato, / la patria a è il lavôr, la dignitât / a è la libertât dal proletariato. / E jo par vuadagnâmi un carantan / i ai scuignût fâ mês e mês su pa Gjermania / e cumò i varès di murî in bataglia / par chesta porca Itaglia / che no da nencje il pan. / Cuestion domo di termins e cunfins / copa un di ca: tu sês sassin; copa un di là: tu sês eroe / ma i parons nestris e lôr son simpri chei / tal sigûr dai cjastei a decidin pâs e vuera. / E alora bignarès voltâ sui tacs / sbarâ ai parons di chesta becjaria / a di chei che di chesta coparia a àn il monopoli / como il sâl e i tabacs […] ❚
✒ Angelo Floramo