La nestre “cuintristorie” de prime vuere mondiâl memoreade chest an. Une grande tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf. O contìn lis storiis che la retoriche dai Stâts nazionâi no à mai contât. (3e pontade) ✒ Redazion
Une tragjedie spaventose. Pari a vincjecinc taramots dal 1976: ven a stâi vincjecinc mil soldâts furlans muarts in vuere. Vincjecinc mil! E daur di lôr, fîs, maris, feminis, fameis bandonadis te miserie, paiadis cul dispaç di muart puartât a man in cjase dai carabinîrs. Chest, il debit di sanc paiât de nestre int.
E jenfri di chei, sîs mil a son stats chei che a vevin la monture austriache – par vie che a jerin nassûts a Acuilee o a Grau -, dismenteâts dal dut e di ducj. Scancelâts dai memoriâi de Storie. Il lôr non nol è mai stât sculpît in nissun monument, ni imperiâl ni regnicul. Parcè che a son une di chês aberazions politichis provocadis dal stes nazionalisim che al veve provocât dut il grant scjas dal conflit. Il lôr destin al fo chel di jessi stâts copâts di mucs e diventâts talians daspò che a forin muarts, cuant che aromai a jerin inte tombe. Une vergogne tant pal re che pal imperadôr, che a àn fat fente di no ricognossi chei lôr fîs sfortunâts e bastarts. Cun di plui, sore, il tacon tragjic di une famee che no pues gjoldi nancje de misare consolazion di une pension di vuere, stant che pai comants gjenerâi e pal Stât Maiôr di ogni paîs, chei soldâts no son mai esistûts!
Sîs mil ombris che in chest moment di celebrazions, pompis e bandis, a berlin infamie su ogni bandiere maglade dal lôr sanc. Cence contâ chei furlans che a forin fats presonîrs in Galizie dai Rus, dal 1914 al 1917, e sdrumâts in presonie fin insom la Siberie, a lavorâ sui binaris de Transiberiane, o sburtâts sù a fuarce su la cueste dal mâr glaciâl Artic, o in Crimee, a vivi sepi Diu ce tantis storiis e aventuris e miseriis e pôris, che bisugnarès ancjemò contâlis.
Tal so libri resint “Giovanni Alessandro Polidoro, un affluente della grande storia”, il professôr Renato Damiani, preseât inteletuâl furlan – no a câs vicepresident de Cjase pe Europe di Glemone -, studiant lis memoriis di chel protagonist obleât de storie, al met in evidence dute le matetât di cheste situazion, esprimint dute une schirie di motivazions e di pinsîrs che a meretaressin di jessi pandûts pe lôr veretât crudêl, massime in cheste baldorie nazionalistiche che nus puartarà a incjocâsi di trinceis e di medaiis almancul fin al 2018. E forsit ancje plui in là.
E simpri Damiani, in efiets, al ponte il dêt su le vergogne dal Stât Maiôr talian, che al ordene di tacâ lis operazions militârs cence spietâ che e fos e pronunziade la declarazion di Vuere, juste par cjapâ di sorprese i paisuts de furlanie sparniçâts inte Basse: cui sa, cu la stupide sperance di rivâ drets a colpî adiriture Lubiane! Ce àno mai fat i fants gloriôs de Tierce Armade, ocupant Cormons, Verse e Çarvignan? O a Pieris e Paparian? Parcè che nissun nol conte di dute la violence fate ae popolazion civîl, des feminis sdrumadis e violadis, dai casins pai siôrs uficiâi talians là che ancje lis frutinis a vignivin obleadis a vendisi. E mentri che ai 9 di Avost dal 1916 la Italie e proclame l’eroisim dai siei soldâts, chei, massacrâts sul cjamp dal onôr a cjantin: “Gurize che tu sedis maledete par ogni cûr che al cognòs la cussience, dolorose e fo la partence, e in tancj no poderin tornâ!”. Ma, clâr, se ti sintivin a cjantâle, tu vignivis mandât dal moment e cence procès devant dal ploton di esecuzion, cu la colpe di “disfattismo e vilipendio”.
E cemût si compuartavie cheste Italie buine di pandi la braùre patriotiche, liberadore di ducj i popui talians che a pativin sot dal talon de Austrie? Tal Mai dal 1917, nus conte simpri Damiani, il sindic di Bagnarie Arse si lamente disint che i cinc reziments di fantarie talians a àn fiscadis dutis lis risiervis de popolazion civîl, obleant ae fam lis fameis, ruvinant lis culturis, puartant vie dut ce che a podevin robâ. Robant “allegramente” dut ce che cjatavin tai orts, e i lens, la ue ancje garbe. E mentri che la popolazion e pative la fam e la miserie, i refudums produsûts de mense dai “Signori Ufficiali” – che nissun al podeve tocjâ – a causarin une fuarte epidemie di tif. E se cualchidun al protestave, si lagnave, al comentave, i devin dal todesc e dal traditôr. A pâr, come ofese, cui soldâts talians che a varessin vût di jessi liberadôrs e che invezit si compuartavin come trupe di ocupazion, odeâts, mâl sopuartâts, considerâts un grup di bandîts che no vevin nissune creance, nissune pietât par chei stramps talians che no fevelavin talian, o ancjemò plui stramps mucs che no fevelavin il todesc. Come chel soldât todesc che – ai 25 di Otubar dal 1917, tal plen de sdrumade di Cjaurêt – al brinche un uficiâl talian e i fevele cussì: “Ufficiale?” – “Sì, e tu parli italiano? Di dove sei?” – “Sono di Aiello” – “Alore tu sês furlan. Jo o soi di ’Sevean, dongje Palme”. E cussì, a continuin a fevelâ par furlan, i doi “nemîs” dividûts dome di une bandiere imponude e sigurementri mai cirude. E cheste testemoneance nus e regale ancjemò Damiani, tal so straordenari contribût. Le lenghe di cetancj soldâts asburgjics e jere duncje la stesse di chei soldâts arolâts a Udin o a Tumieç, o a Sant Denêl. E pûr, a vevin di copâsi.
Insome, a jerin furlans. Furlans sot de Austrie. Furlans sot de Italie. Furlans sot! Sigurementri une sgjarnassie miscliçade, imbastardide, pericolose. Int di liberâ? No, di tignî sot, apont, par insegnâur cui che al comande, cul baston e cu la baionete, in non dal Imperadôr o dal Re e de Bandiere, chê dal Tricolôr, “che è fra tutti la più bella. Noi vogliamo solo quella noi vogliam la libertà”. ❚
Angelo Floramo
