La nestre “cuintristorie” de prime vuere mondiâl. Une grande tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf. Lis storiis che la retoriche dai Stâts nazionâi no à mai contât. (7e pontade)✒ Redazion
Prime vuere mondiâl e psichiatrie: un teme pardabon gnûf di studiâ, un troi di ricercje che dome in chescj ultins agns al ven considerât aspiet interessant par podê capî lis dinamichis plui scuris e nereosis che a ruvinarin par simpri la vite di chei soldâts che a vevin la fortune di tornâ a cjase ma paiant une vore cjare e par simpri la lôr esperience militâr. I numars a fasin impression: si fevele di plui di 40.000 câs di malatie mentâl provocade de vuere. E il numar al è plui bas di chel vêr, dal moment che chescj 40.000 a rapresentis dome i câs sogjets a censiment. Chei ricoverâts. No son comprendûts ducj chei puarets che, ancje se malâts, a son stâts considerâts simuladôrs e tratâts di conseguence, o chei altris, ancjemò plui numerôs, che si son tignûts dut dentri par sclopâ fûr dome cualchi an plui tart, tal disasi e te disperazion lôr e di dute la lôr famee. Dispès dismenteâts di ducj, considerâts une vergogne de parintât, un disonôr pal esercit, un pês par dute la societât. No vevin pierdude une gjambe, chei soldâts, o un voli, o une man. No jere stade une granade, o une sclopetade a mutilâju. Che intes paradis militârs dal dopo, sglonfadis di retoriche patriotiche e ingomeante, al pareve cetant bon fâ viodi in public chescj erois ridusûts a tocs, plens di medaiis par taponâ munçûi e croçulis. Ju piturave Beltrame intes cuviertutis da la “Domenica del Corriere”. A lôr lis infermieris de Crôs Rosse ur puartavin lis rosis, lis mestrutis ju onoravin cun dute la mularie de scuele.
Ma se tu tornis a cjase mat? Fûr di cjâf, stupit, cui voi scocolâts, il cuarp che al treme cence une reson; se tu tachis a vaî di un moment a di chel altri, cussì, come un frut plen di pôre; se no tu sês plui bon di tignîle e tu ti pissis intor, o piês. Une vergogne. Dal sigûr, no di esibî intune parade ma al contrari di no fâ plui lâ fûr di cjase. Tu pierdis il lavôr. Tu pierdis la famee. Infamie, derision a son lis tôs medaiis. E ce fasaraie mai di te la femine? In ce maniere podarâstu judâ in cjase? Miôr lâ vie tal manicomi. Dismenteât. Pierdût intune buse nere che ti glotarà par simpri. E la muart tal pantan di une trincee e devente un privileç in paragon a une vite stranide di mat.
Il disturp al jere insidiôs, e al nasseve simpri in trincee, pe pression psicologjiche tremende, une misture di pôre, malinconie, rabie furiose, une spiete infinide che ti condane a une vite sospindude sul precipizi de muart. Cence contâ i litris di sgnape butâts jù par fâsi coraç prime di cori cuintri lis metraiis dal nemì, che dal sigûr a àn comprometût plui di cualchi cerviel. Cualchidun al pierdeve lis capacitâts sensoriâls: vuarbetât, sorditât o che al deventave mut.
Gino C., juste par citâ un câs su ducj: eroi inte vuere di Libie dal 1911, ingaiât volontari a dome disesiet agns, al fâs une biele cariere. Al è tenent colonel tal 1918, cuant che la sô personalitât si creve. Al ven puartât a Udin, a Sant Svualt. Ma po dopo, al ven discjamât su la gobe de famee. Al zire crot par cjase, al berle, nol rive a durmî. Al mûr di sclopecûr di li a cualchi mês. Il so non, come chel di ducj chei altris muarts parcè che “stupits di vuere”, no si cjate sui monuments.
I miedis militârs, intes cartelis clinichis, ju clamin “uomini infami”, dal moment che daûr di un compuartament cussì stramp a volevin intindi o une simulazion viliache o une debilece che no i faseve onôr a un om vêr, al mascli coragjôs e fuart che al varès vût gust e plasê di murî sdrumât dal nemì.
Dute cheste umanitât che e sofrive e che e varès vût bisugne di un jutori sanitari e vignive depuartade in struturis che no vevin la capience par tignîju ducj, e il lôr numar, secont la stime di chei storics che si son interessâts dal probleme, al aumentave simpri di plui, di an in an, dal 1915 al 1918. Il destin dai malâts al jere duncje chel di vivi intune cundizion di promiscuitât, in stanzons e in curtîi, cence la garanzie di un jet par podê polsâ, cence cambi di vistîts, sporcs, plens di pedoi, simpri plui intorteâts jenfri chel malstâ nassût in trincee, che ju roseave di dentri. La cjamese di fuarce e la curint eletriche dal eletroshock a jerin la uniche medisine par contignî la violence che dispès e je fie di cheste cundizion. Miedis e infermîrs in chest contest a deventavin plui dispès vuardians pluitost che presidis sanitaris.
I prins manicomis di emergjence a vignivin tirâts sù dongje de prime linie. Clamâju “lager” al sarès un compliment. Fîl spinât, sbaris di fier, cjamaris di contenzion. Un lûc trement par fâ esperiments su oms che aromai pal stât talian no vevin plui nissune impuartance. Stant che no podevin jessi doprâts come cjar di becjarie dai gjenerâi, almancul a podevin jessi utii ai miedis militârs che cussì, cence il pericul di nissune contestazion o di cualchi control, a podevin vuadagnâsi cualchi pagjine di publicâ su lis rivistis specializadis.
O pûr ,il destin di chescj disperâts a jerin i lavôrs sfuarçâts, dome che ju clamavin “ergoterapie”. Un mût par sfrutâ la int che di plui e varès vût bisugne di jessi sostignude: sgjavâ galariis, rompi claps, taiâ lens, preparâ trois e stradis utilis aes necessitâts militârs.
Al principi di chest an selerât di celebrazions militârs, il psicolic gurizan Rudy Piccin al à inmaneade une prime cunvigne che e puarte la atenzion su cheste tragjedie. La Gurize di Basaglia. Un mût dut furlan di resisti aes celebrazions di une uficialitât che intes sôs pompis si è dismenteade dai ultins. Di chei disgraciâts che, vitimis come chei altris, non son mai stâts degnâts di une memorie.
Onôr duncje a di chei mats e ae lôr dolorose, involontarie diserzion di une Patrie sassine e lare. ❚
✒ Angelo Floramo
