Seconde part – Il sît al è menaçât e al va protet
Stant che ducj i intervents che a àn causât un aument de antropizazion e un impat evident sui habitats e su lis lôr speciis che a son stâts ripuartâts inte prime part dal articul a son stâts fats cun bêçs publics, bisugnarès viodi se, prin di fâju, a son stadis fatis indagjins adatis par viodi ce che a varessin compuartât tant che impat e cui che a son i tecnics che ju àn sotscrits.
◆ Dut chest intant che a van indenant a cressi lis personis che a frecuentin il lât e che, voie o no, a àn un impat simpri plui fuart sul ambient massime intune situazion come chê atuâl, dulà che ducj a puedin fâ dut intun messedot di maleducazion e arogance. In cheste suaze, o vin ancje il bandon di speciis esotichis fat di int che, dopo vêlis compradis, si stufe di lôr. Par esempli o vin la copasse di palût americane Trachemys scripta, che cumò si cjate in numar grant e che inte ignorance gjenerâl e ven calcolade un segnâl preseabil pe biodiversitât.
◆ La mancjance di rispiet pal ambient (e pal om stes), la maleducazion e la arogance a son dimostradis di ce che si cjate ator (scovacis e in particolâr cjichis di spagnolets) e di ce che si lasse fâ ae int: fûcs, molâ cjans ator, tirâ bots, taiâ sterps e arbui, parcâ la machine e fâ camping su lis rivis. Dut chest al à di jessi improibît e la improibizion si scuen fâle rispietâ midiant di une vigjilance (e sanzions) justis che in dì di vuê no esistin.
Il “turisim” (se si pues definî cussì ce che si viôt sul Lât di Cjavaç) nol pues jessi une scuse par distruzi e incuinâ, cun di plui cence nissun che al pai i dams.
◆ Po dopo, il fat di dâ la “gjestion” des rivis in man a personis che a “sistemin” metint grave (ancje miscliçade cun elements estranis), taiant arbui, dispedant, fasint alc un pôc ca e un pôc là, cence criteri ma cjalant dome aes necessitâts che a calcolin imediadis, nol puarte a nuie di bon. Nissun arbul al ven tornât a plantâ e nissune situazion e ven sanade ai fins dal mantigniment di un ambient che al puedi dâ acet ancje a chês altris speciis, a part l’om, condanant il lât, a pôc a pôc, a murî dal pont di viste biologjic.
◆ Stant che l’impat sul ambient al è fi ancje dal no savêsi contentâ par divertîsi (carateristiche dal nestri timp che e puarte cun se problemis grancj ancje personâi a tancj di lôr), copiant ancje ce che a fasin chei altris e dal clientelisim (ents publics che a domandin finanziaments par cualsisei robe e i politics che ur ai dan), si pues pensâ che lis oparis ator dal lât no sedin finidis. Chest parcè che fin cuant che al è puest par meti alc o par simiotâ ce che a fasin magari localitâts turistichis “a la mode”, alore bisugne fâlu. Intal mût di pensâ dal aministradôr public medi e je une opare che no je ancjemò stade fate e che e cole propit intes modis dal moment: la piste ciclabile, che dal sigûr e larès a interessâ ancje lis rivis Est e Nord. Bisugne pensâ però che il lât al à bielzà une strade asfaltade dilunc la rive Ovest, dulà che a puedin cori lis bicicletis. Ancjemò, fasint une opare tant che une piste ciclabile, in cierts trats si eliminarès buine part de vegjetazion di rive. Chest ancje parcè che se si ves di fâle, dal sigûr si volarès puartâ la int propit sul lât (“parcè che lant cu lis bicicletis, bisugne gjoldi de aghe” a disaressin). In chest câs i progjetiscj a sostignaressin che se si à di fâ stâ sù la opare dongje de rive cence che e coli intal lât, bisugne fâi fondis adatis e un sostegn viers il stes lât (cemût che al è za stât fat in altris lâts aromai distruts de furie dal om). Chest parcè che la idee e je chê di podê rivâ sul lât e fâ in maniere che si viodi, come che e fos dome la aghe impuartante cence capî la diference intal vê un ambient che al à ancje la fasse di vegjetazion ripariâl (il bosc di rive dal Lât di Cjavaç al è un dai pôcs restâts inte zone di mont), duncje une vore plui naturâl. Ma, se chest al è l’interès, al è compagn vê un lât naturâl o un bacin artificiâl cun beton e asfalt tor ator.
◆ A son bielzà stadis fatis “provis tecnichis” di ce che al è a pene stât ripuartât: par esempli cuntun intervent fat dilunc la rive Est une desene di agns indaûr e je stade metude une bancjute sul troi che al cor intal bosc ma, stant che intal sintî di progjetiscj e realizadôrs de “opare” un no si pues sentâ e cjalâ il bosc, ma al à di podê “spaziâ” sul lât, e je stade taiade la vegjetazion devant causant la erosion de rive. Sa la erosion e fos plui grande, e clamarès palanchis pe realizazion di oparis di stabilizazion che a finiressin par incidi malementri su la vegjetazion e su la rive.
La smanie di puartâ personis fin su la aghe e di permeti un acès comut (che si viodin i pontîi che son bielzà stâts fats) e podarès comprometi ancje la rive Nord (chê Sud e je bielzà stade cuinçade), lant a incidi ancjemò di plui su la biodiversitât di un ecosisteme che, almancul in Friûl, al è unic. Intal setôr setentrionâl di fat, pûr in presince di intervents no realizâts sigûr cun intenzions conservativis, in graciis di un gjenerâl “bandon” e ae rinaturalizazion consecuente, si è formât un mosaic ambientâl, incentrât su cjanêt e vencjarêt, favorevul a diviersis speciis.
◆ Cundut de antropizazion, il Lât di Cjavaç al à ancjemò rivis naturâls in cierts setôrs, in graciis ancje de morfologjie. A son chês che a àn di restâ cemût che a son, cence pensâ di intervignî cun oparis che, magari, a sostituissin la tiere e la grave cun beton e asfalt. A part evitâ la incressite de antropizazion, bisugne ridusi il nivel dal disturp ancje limitant l’acès in ciertis areis sensibilis massime intai mês di riproduzion dai animâi. Chescj procediments no domandaressin masse par aumentâ la protezion che, par ciertis zonis, e varès di jessi totâl in maniere di evitâ che, intal futûr, cheste sioretât e resti dome un ricuart.
◆ Un bon mût di svicinâsi ae realtât al sarès chel di meti cartei che a spieghin che si è valutade la impuartance dal lât pe biodiversitât e che si à vût miôr blocâ la antropizazion e mantignî ce che al è restât (magari previodint ancje azions di miorament e/o “ricostituzion” dal ambient). Sigûr al sarès preseât di tancj e al puartarès tante int, contentant cussì ancje cui che al vûl viodi int sul lât, dimostrant ce che si pues fâ doprant il cjâf in maniere positive. In chest sens l’autôr al da la sô disponibilitât a cui che al vûl cjapâ cheste strade.
◆ Dutis lis azions di conservazion ambientâl a son necessariis par permeti il mantigniment di une rêt di zonis caraterizadis de aghe, dulà che il Lât di Cjavaç al à un rûl fondamentâl. Chestis a permetin ancjemò a diviersis speciis di cjatâ habitats idonis ancje dentri de mont furlane. Azions di cheste fate a puedin dal sigûr judâ speciis che si cjatin intun stât di conservazion sfavorevul, che a son protetis a nivel european, e che in cierts câs si son ancje riprodotis intal nestri lât.
Lis previsions di conservazion si scuintrin però cuntune vision dulà che la mont furlane e je intindude no come un patrimoni ambientâl e culturâl particolâr di impuartance fondamentâl pal om, ma come un teritori di sfrutâ par divertîsi cence nissun vincul, dulà che il lât al rapresente la pissine di chest luna park.
◆ I ponts di viste biologjic e ambientâl a son chei di fonde pal avignî dal lât, ancje par disvilupâ une forme di turisim no pocât de ignorance e de voie di rapine ma de voie di cognossi e di gjoldi de naturalitât di un lûc. Chest ancje par mantignî ce che al è stât preservât par cui che al vignarà dopo di nô. Dut chest al somee grivi denant di tancj che si disin a pro de “protezion” dal lûc, ma che dut câs si ativin cun chê di doprâ il lât pe fruizion, balneazion e un turisim falât. Altris lûcs che a àn vuê lâts cun rivis betonadis e fabricâts dut intor, ridots a pissinis, a cjalin cun invidie un lât tant che il nestri. Cun di plui, crodi che puartâ di fûr dal lât la aghe scjamade de centrâl idroeletriche par che “nol deventi une palût” al significhi “rinaturalizâlu”, al è sbaliât in primis parcè che struture e funzionalitât dal ecosisteme no si ricostituissin dome cul gjavâ un element estrani, e dopo parcè che, pûr jessint un intervent che al pues jessi fat, se al à di jessi fat dome par dâ la pussibilitât di sfrutâ il lât (duncje aumentant la antropizazion), la “naturalitât” e larès in mancul e, dal sigûr, al è miôr vê un ambient cun plui vegjetazion che un lât sierf dome dai “bisugns” dal om, dulà che si rivarès ancje inte aghe magari cun garis di motoscafs o robis similis.
◆ L’autôr, in plui di une ocasion, al à fat cognossi il nestri lât a nivel sientific (e no nome) in dut il mont in cunvignis o tabaiant cun altris studiôs di cualsisedi bande. Cuant che al à palesât la situazion dal lât e la mancjance di tutele, si è sintût rispuindi variis robis che no si puedin scrivi suntun sfuei come La Patrie, ma che si puedin sintetizâ in cheste maniere: “Se o sês tant monis di no capî e preseâ ce fortune che o vês a podê vivi in dì di vuê in puescj dal gjenar, e se o volês continuâ a ruvinâju, no stait a lamentâsi de stupiditât che e je ator parcè che o fasês part di jê”. Chest nus fâs capî la necessitât di blocâ la antropizazion dal lât e di metilu sot un regjim di protezion che al mantegni un nivel acetabil di naturalitât e di biodiversitât in mût che chei che a vignaran dopo di nô, che par fuarce a varan capît il valôr de vite ancje di chês altris speciis (se no lu varan capît, no saran nancje lôr parcè che l’om nol pues restâ di bessôl pene ancje la sô muart), a podaran frecuentâ un lât e no une poce sporcje di cremis cuintri il soreli e plene di confusion. ❚
