Seconde part. Esemplis e considerazions conclusivis
Inte prime part a son stâts descrits in curt un pâr di intervents fats intes gleriis de Fele e dal Dean. Cjapin cumò in considerazion un altri câs.
◆ Intes fotos 4 e 5 si viôt un esempli di ce che al ven clamât “biolât” e che al è stât realizât intal Pas di Cjamparòs. Chestis oparis, clamadis ancje “ecolâts” (a dimostrazion de confusion terminologjiche), a vegnin indicadis e publicizadis tant che “rispietosis” dal ambient e des dinamichis naturâls, e a sotlineâlu al è l’element “bio” (o “eco”). In realtât, di naturâl a àn ben pôc e, se inserîts in contescj ambientâi tant che chel de plane di Cjamparòs, a rapresentin un cuarp estrani e perturbatîf. A son invezit di considerâ par ce che a son, o ben bacins doprâts pe balneazion e pes ativitâts colegadis cun tant di fabricâts e infrastruturis imbinadis come disvistidôrs, stradis di acès, tubaduris e vie indevant, che a rapresentin un afâr pes ditis che ju fasin.
◆ Si podarès pensâ che un dai motîfs, a part chel di spindi bêçs, al sedi chel di favorî il turisim ma, considerant che si vûl fâlu passâ par un “lât”, parcè inte Valcjanâl – cun lâts tant che chei di Fusinis (Foto 6) e di Rabil – cualchidun varessial di preferî lâ intune struture dal gjenar, tra l’altri artificiâl in maniere evidente e che si pues cjatâ, cu lis stessis carateristichis, in cualsisei puest? Cun di plui, il turisim al à miôr puescj che nol cjate di altris bandis e in chest câs o sin propit intun di chei. Il Pas di Cjamparòs al è un dai pôcs puescj dentri dai atuâi confins dal Stât talian che a metin in comunicazion il bacin dal Mâr Mediterani cun chel dal Mâr Neri. Di chest no je olme, nol esist nancje un cartel (cui che al varès di metilu, cognossial la impuartance dal sît?). In chel lûc bisugne puartâ a spiegâ e a fâ capî aes personis (cjapâts dentri i turiscj) la realtât fisiche cun dut ce che chest al compuarte, sedi par animâi e plantis che pal om, e no incidi cun altris costruzions che tra l’altri a son in maniere evidente un element estrani al contest e che, eventualmentri, a varessin vût di jessi fatis in altris zonis par minimizâ il lôr impat.
◆ Un dai siums di diviers aministradôrs publics al è chel di urbanizâ ducj i pidivals. Intal timp, al podarès sucedi chest ancje intal Pas di Cjamparòs. Se nol ves di sucedi nol sarà par intents conservatîfs o pe sensibilitât pal ambient ma parcè che e je une piste di schi di fonts (par cheste un cartel al esist) ven a stâi une altre “realizazion” dal om.
◆ Intai paîs plui avanzâts de Italie a àn bielzà capît che il consum di teren al è une des plaiis che e va combatude e fermade il prin pussibil e lu stan limitant ancje tirant vie oparis e infrastruturis e, in ciert câs, cirint di ripristinâ (par chel che al è pussibil) l’ambient origjinari. Tra l’altri, se si fevele di turisim, un pidival dal dut cimentificât al varès di sigûr une atrative plui basse di un cun prâts e ativitâts leadis al mont agricul: chest ultin al varès di jessi chel che si cîr di tignî in mont parcè che lant indevant a saran simpri mancul pidivals libars di costruzions e a saran chei che il turisim al cirarà. Se, da pît, si ten cont ancje di dut ce che lis ativitâts leadis al mont agricul a puedin produsi, al è clâr che la sielte di mantignî ambients che lu sostegnin dongje dai paîs no je in discussion.
◆ Cierts lavôrs, par esempli chei dilunc dai flums, a vegnin definîts tant che urgjents e necessaris e duncje si puedin justificâ intervents di cualsisei gjenar stant che e je une “emergjence”.
Al vûl però tignût in considerazion che se e fos fate une gjestion dal teritori basade su planificazion e programazion reâls e no nome su la cjarte, events (par esempli meteorologjics) ancje di une cierte puartade no provocaressin problemis cussì grancj e si sarès in “emergjence” dome in maniere saltuarie e no simpri, cemût che nus vuelin fâ crodi. Chest al jude, in plui che a justificâ intervents une vore incisîfs, ancje a pilotâ bêçs viers di chei, e a moltiplicâju in mût che a puedin jessi proponûts intun ciert mût (ancje doprant lis peraulis che o stin discorint) e deventâ cussì “ben viodûts”, fasint passâ in secont plan dut il rest.
◆ Lis robis a son di clamâ inte maniere corete e no mistificant il lôr significât par mostrâ che o sin ducj biei e brâfs, cemût che a al è stât bielzà relazionât inte prime part, o par vendi (sensu lato) alc.
Il dualisim fra la peraule e la realtât al pues dome creâ problemis, massime intal ambit ambientâl e in chest periodi dulà che l’om, par vie des sôs azions, al à inviât un insiemi di procès che a stan incidint sul ecosisteme cun fuarce e cun implicazions imprevedibilis.
◆ La facilitât che a vegnin pronunziadis ciertis peraulis cuant che si fevele di ambient e cjate fonde ancje sul fat che dificilmentri l’om al pense che ce che al sucêt intal ambient naturâl, par esempli a miârs di chilometris, al puedi vê consecuencis su di lui e duncje, in fin dai conts, e je robe di “pocje impuartance”. Chest al è esemplificât dal fat che l’om al reste impressionât des imagjins che a rivin di zonis di vuere, dulà che si viodin distruzion e muart, ma pocjis voltis al à la stesse reazion devant di imagjinis che a mostrin la stesse robe in ambients naturâi, parcè che no son colpîts individuis de sô specie.
◆ Su la fonde de realtât di ce che in gjenerâl al ven fat, si pues dî che la “rivoluzion verde” che nus ven nomenade in mût continui e che al bisugnarès capî ce che e vûl dî esatementri, o no je ancjemò tacade o e je bielzà falide. Tancj intervents e oparis che a vegnin fats a varessin di jessi caraterizâts dal element “tanato” (dal grêc “thanatos”, “muart”) plui di chel “bio”, par vie de soference e de muart che a provochin ai vivents e de distruzion dai ambients che ju caraterize.
◆ Cuant che si trate di Nature, però, si à di tignî in considerazion che a cheste no i interessin lis nestris peraulis e il significât che o din o che o volìn dâ a chês, ma i nestris fats, e che cualsisei fat che i vadi cuintri nus compuarte problemis. In relazion a chest, i presumibii bêçs publics che a varessin di jessi dâts in “abondance” pe “resilience”, a àn di jessi doprâts in maniere razionâl sfrutant lis competencis di cui che si ocupe di problemis ambientâi e no dome par fâ altris oparis che a laressin a incidi inmò plui sul ambient, diminuint di fat lis capacitâts che chest al à di fâ cuintri ai fenomens contraris che si stan presentant (e duncje lant de bande contrarie di ce che al è sostignût cu lis peraulis) e che dispès a son cause dal om. Ven a stâi: se no si indrece la direzion intai confronts dal ambient che l’om al à cjapât, al è dibant doprâ “peraulonis” che a coventin dome par dâ aiar ai dincj e par sintîsi in pâs cu la cussience. ❚
