Par une economie blu simpri plui sostignibile
Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.
◆ Il pes, i moluscs, i crustacis e lis alighis a son part ad implen des dietis, des ereditâts culturâls e des tradizions culinariis di une vore di personis in ogni bande dal mont (intal nestri câs, de diete mediteranie). I pescjadôrs artesanâi e i pissicultôrs a produsin la grande part di cheste mangjative, e il Iyafa 2022 al è une oportunitât par rimarcâ la impuartance dai piçui pescjadôrs artesanâi e de acuiculture intai nestris sistemis alimentârs (che, aromai, e rapresente il 46% de produzion totâl e il 52% dal pes destinât al consum uman), intai mieçs di sostent, inte culture e intal ambient. I pescjadôrs artesanâi, i pissicultôrs e i lavoradôrs dal setôr a àn un potenziâl grandonon inte promozion di un cambiament intal “cemût”, intal “cui” e “par cui” che il pes e i prodots itics a son prodots, lavorâts e distribuîts, cun efiets positîfs su dut il sisteme alimentâr globâl.
Il rapuart de Fao
Stant al rapuart de Fao sul “Stât de pescje e de acuiculture mondiâl” dal 2020, intal 2017 il consum di pes al à rapresentât il 17% de assunzion di proteinis animâls de popolazion mondiâl e il 7% di dutis lis proteinis consumadis. Il pes al à furnît a plui di 3,3 miliarts di personis il 20% dal lôr apuart medi pro capite di proteinis animâls. Cun di plui, il 34,2% dai stocks itics al ven pescjât a nivei no sostignibii di un pont di viste biologjic. Cheste percentuâl e je masse alte e no je daûr a miorâ. La pescje mancul sostignibile si regjistre intal nestri Mediterani e intal Mâr Neri (62,5% di stocks soresfrutâts).
◆ Il consum globâl di pes al è cressût a un tas medi anuâl dal 3,1%, dal 1961 al 2017. Un tas cuasi dopli a pet de cressite anuâl de popolazion mondiâl (1,6%) intal stes periodi, e plui alt di chel di ducj chei altris aliments animâi proteics, che al è cressût dal 2,1% ad an. Il consum pro capite di pes alimentâr al è cressût di 9,0 kg intal 1961, a 20,5 kg intal 2018, di cirche l’1,5% ad an.
Intal 2018, la produzion itiche mondiâl de acuiculture e je rivade a 82,1 milions di toneladis, 32,4 milions di toneladis di alighis e 26.000 toneladis di capis e perlis ornamentâls, puartant il totâl a un massim storic di 114,5 milions di toneladis. La Italie e je il decim Paîs tal mont pe produzion di moluscs bivalvis arlevâts. La acuiculture e larà indevant a jessi la fuarce che e sburte la cressite de produzion itiche mondiâl, slargjant une tindince vecje di decenis. Si previôt che la produzion de acuiculture e rivarà ai 109 milions di toneladis intal 2030, cuntun aument dal 32% a pet dal 2018.
◆ Intal setôr de pescje e de acuiculture, si stime che, ogni an, il 35% de racuelte globâl al ledi pierdût o straçât. Si calcole, infin, che la pescje su piçule scjale e furnissi il 90% de ocupazion intal setôr de pescje maritime.
◆ L’obietîf de Iyafa 2022 al è chel di sensibilizâ i consumadôrs e i operadôrs sul rûl dai piçui pescjadôrs artesanâi e de acuiculture, rinfuarçant la interazion fra sience e politiche, incoragjant i invistidôrs a agjî e a costruî gnovis colaborazions e a consolidâ chês esistentis. ❚