La Associazion Glesie Furlane, no nas a câs. Al è di daûr un humus, un teren fertil di storie aquileiese, di lenghe furlane, di predicazion e dutrine par furlan, di cjants liturgjics patriarcjins, che a àn compagnade la int par secui e secui. Ma ancje la storie di une nestre liturgjie e patristiche, dal Scisme dai Trê Cjapitui, dal Patriarcjât… ancje se lontans tal timp dut chest al à lassât tal profont de int, predis e fedêi un savôr, une sensibilitât, un sintî interiôr cetant diferent rispiet a altris realtâts. Bisugne cognossi il contest storic, par capî cemût che Glesie Furlane e fâs i prins pas. O sin sul scomençâ dai agns 1970, subit dopo de brute figure de jerarchie eclesiastiche in ocasion de Mozion dal Clero dal 1967 e dal Congrès Eucaristic Talian cu la visite dal Pape Pauli VI dal 1972, cuant che si à celebrât liturgjiis in dutis lis lenghis fûr che par furlan. Cun pre Checo Placerean in teste, si scomence a tirâ dongje dutis chestis aspirazion di identitât proprie; si da filusumie a chê cussience, a chel sens di partignince che di simpri al jere presint tal popul e in buine part dal clericât; si tache a meti in vore in forme concrete iniziativis come la Messe de Sense a Sant Pieri di Cjargne, la Messe di Sant Ermacure e Furtunât in Aquilee, la Messe dai 3 di Avrîl, date di fondazion de autonomie dal Friûl. Ricorencis che vuê a son uficializadis e celebradis ancje dai sorestants civîi e religjôs.
Sore dut si scomence a tradusi la Bibie, a tradusi il Messâl, a publicâ il libri des Cjantis di Glesie dal popul furlan, cun musichis patriarcjinis recuperadis de tradizion orâl.
Chest grop, tal prin scuasit dome di predis, al à vût publicât libris e opusculuts ancje cul non di “Cjargnei cence dius”. Tai agns 1980 – pal fat che Glesie Furlane e vignive di plui bandis indentificade e colegade dutune cul Moviment Friûl – si firmavin come “Grop di Studi Glesie Locâl”. Po, cui prins agns 1990, cun tant di statût il grop al torne a clamâsi in maniere definitive cul so non origjinâl: “Glesie Furlane”.
Dispès nus domandin trops che o sin: salacor plui di cualchidun al varès voie di contânus. Cence dâ i numars, o podìn dî che di simpri te associazion al è un grop plui atîf; altris a dan une man di volte in volte che al covente; un grum a son i simpatizants che nus stan daûr, che ur plâs ce che o produsìn. Chei che a àn gole di cariere nus stan a la largje! Tal grop a son, come che al è te nestre mentalitât, ancje laics. La lôr presince nus jude ancje nô predis a vê une vision plui davierte al mont, a la vite e mancul clericâl, ancje se il nestri operâ si realize plui specificatamentri tal setôr religjôs e eclesiâl, come che al proviôt il statût.
Di plui bandis si sint a dî che in Friûl la Glesie e à fat un grum a favôr de promozion de culture e de lenghe.
A jessi sincêrs la glesie uficiâl, chel pôc che e à fat, lu à fat plui par sante scugne, parcè che sburtade e parcè che no veve resons seriis che a justificassin une contrarietât. Di fat no vin mai rivât a viodi une profonde convinzion e une grande passion par cirî di inculturâ il Vanzeli e la fede te nestre storie, vite, culture e lenghe.
Dant a Cesar ce che al è di Cesar e a Diu ce che al è di Diu, si scuen dî che a sburtâ cun insistence e a impegnâsi cence padin tal cjamp culturâl, religjôs, eclesiâl al è stât il nestri grop. Un grop tignût di voli de jerarchie, cjalât cun suspiet, pluitost emargjinât, se no ancje considerât sul ôr de eresie.
Lu disìn cun scletece e cun amarece tai confronts de jerarchie che masse da râr e à viodude la nestre passion e afiet pe Glesie, pal Vanzeli, pal popul. Ma lu disìn ancje cun braure pensant che il resisti e il tignî dûr (Lc 21,19) nus à judâts a fâi fâ biele figure ancje a la stesse Glesie. Di fat, se vuê il popul furlan al à la Bibie, il Lezionari, il patrimoni musicâl, se, come che si spere, al rivarà ancje il Messâl, dut al è partît in gracie dal nestri grop.
Chest al è stât fintore il nestri contribût in difese e pe promozion de lenghe e a favôr de inculturazion de fede e dal Vanzeli te vite dal nestri popul (Evangelii nuntiandi); e o continuarìn sun cheste strade, se Diu nus darà salût e sintiment.
No volarès vê dade la impression che cumò dut al sedi risolt ancje tal cjamp eclesiâl – in veretât i predis e je la raze plui dure di convertîsi! – e che la bataie pal ricognossiment dai dirits dal popul furlan e sedi ormai vinçude.
Magari! Al di là des leçs scritis dal stât e des promessis eclesiastichis, la “cuistion furlane” e ven ancjemò emargjinade o escludude par preconcets e prejudizis vieris e gnûfs.
Cjalant indaûr tant al è stât fat; scrutinant l’avignî, tant al reste di fâ. ❚
pre Roman Michelotti
Presentazion / La Patrie dal Friûl e presente il libri “Fûc su Gurize” di Ferruccio Tassin e Gianni Nazzi
Redazion
La Patrie dal Friûl e presente il libri “Fûc su Gurize”.“La Patrie” e je la cjase dai furlans che no si rindin: e par chest e à volût meti dongje un libri zontant insiemi lis peraulis che chescj doi inteletuâi a doprin par descrivi ce che e jere cheste culture di cunfin e ce che […] lei di plui +
Cungjò / Mandi, Bruno.
Redazion
Al declarave “che nol è dificil fâ telecronachis in marilenghe e che il furlan al à peraulis e espressions di pueste par fâlu”. lei di plui +
L’EDITORIÂL / La lezion de bandiere par dismovisi dal letarc
Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +
La piçade / Fevelìn di autonomie pluio mancul diferenziade
Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +
Grant suces di “Stin dongje ae Patrie”, la tierce edizion de fieste dal nestri gjornâl
Redazion
Pe rassegne Avostanis, li dai Colonos a Vilecjaze di Listize, il mont des associazions, de culture, dal spetacul, dal sport si è strenzût intor dal gjornâl dut par furlan fondât tal 1946 A an partecipât: Glesie Furlane, i Bakan, Claudio Moretti – Elvio Scruzzi – Fabiano Fantini (Teatro Incerto), Serena Fogolini e Raffaele Serafini (Contecurte), […] lei di plui +
L’EDITORIÂL / No stin a colâ inte vuate de indiference
Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +