SLOVENIE. In cercje dal benstâ li des termis

CENTRIS_ 87 sorzints termâls naturâls cun temperadure de aghe che e va dai 32 ai 73 grâts, plui uns 20 centris termâi innomenâts ancje a nivel internazionâl che a ocupin passe 43 mil metris cuadrâts di spazi cun albiercs, pissinis, saunis, zardins e zûcs cu la aghe. Une ufierte nuie mâl tun paîs di pôc plui di 20 mil chilometris cuadrâts, ma cuntune lungje storie peade ae cure dal cuarp e dal spirt traviers lis termis.
SSNZ_ La Skupnost slovenskih naravnih zdravilišč (vâl a dî “Socie dai centris termâi naturâi slovens”, sît internet: www.slovenia-terme.si par sloven, talian, todesc, cravuat, serp, rus e inglês) e cjape adun 15 termis jenfri lis plui cognossudis, sparniçadis (viôt la mape) te aree centri-orientâl dal paîs. Ducj i servizis proponûts di chescj centris, in ativitât par dut l’an, a son gjestîts di bande di esperts de salût, dal benstâ e dal straviament dai ospits, che a rivin di bessôi o adun cu la famee o cun amîs. Culì si pues vignî a curâsi dal reumatisim, dai problemis ae respirazion, ae circolazion dal sanc, aes articolazions e vie indevant.
ROMANIS_ Lis termis te Slovenie dal dì di vuê a jerin sfrutadis bielzà dai antîcs romans: un esempli a son lis Rimske Toplice (“Termis Romanis”), centri dongje de citât di Laško, sul flum Savinja, li che vie pal Sietcent e il Votcent a son stâts cjatâts mosaics, monedis e vâs di ete romane. La sô prime olme suntun document scrit e je dal 1486, prime che al vignìs fiscât dai Turcs tal 1529. Il so grant svilup al tacà tal 1840; dopo la Seconde Vuere Mondiâl, fintremai ae indipendence de Slovenie tal 1991, il centri al fo doprât dal esercit jugoslâf pe riabilitazion dai siei soldâts. No cate la lôr impuartance, lis Termis Romanis no fasin part de Socie dai centris termâi slovens.
STORIE_ La prime citazion scrite des aghis termâls des Termis di Dobrna e je dal 1403, ma la font che e furnìs aghe a 36 grâts e jere bielzà cognossude tal secul XII, e e ven doprade ancjemò in dì di vuê.  Des Dolenjske Toplice si scriveve za tal 1228; il prin atestât sientific de lôr validitât pe salût dal om al è invezit dal 1658. Lis trê fontanis che a dan fûr la aghe cuntune temperadure di 36 grâts a àn la lôr sorzint a uns 1000 metris sot tiere.
PORTOROŽ_ Tes termis di Strunjan/Strugnano e di Portorož/Portorose si pues sfrutâ la aghe dal mâr Adriatic e il sâl che al ven tirât dongje di secui in ca su la cueste istriane a Sečovlje/Sicciole. Za tal Tresinte i munics benedetins dal vicin munistîr di Sant Laurinç a cognossevin lis cualitâts de aghe termâl dal puest; po dopo, ae fin dal Votcent, lis termis di Portorož/Portorose a tacarin a jessi sfrutadis ad in plen, cu la presince di regnants e nobii dal Imperi asburgjic di chê volte, e cumò a dan acet a ospits che a rivin di mieze Europe.
DONAT_ A risultin jessi dopradis tal Tresinte ancje lis termis di Rogaška Slatina, secont ce che al conte un scrit di chê epoche dal arcivescul di Salisburc. Il prin studi su lis cualitâts de aghe di Rogaška al è dal 1572; tal 1685 al jessè un libri cuntune ricercje sientifiche su lis proprietâts di cheste aghe, une copie dal volum origjinâl si le cjate tal museu di Celje. Di chestis termis e rive la aghe minerâl naturâl Donat Mg, la aghe plui siore di magnesi tal mont cun 1030 miligrams par litri; e ven tirade sù di sorzints che a van dai 280 ai 600 metris sot tiere.
RADENSKA_ Chê altre aghe minerâl naturâl de Slovenie e rive des Termis di Radenci, li che la sorzint e je stade scuvierte dome tal 1833; dopo 50 agns al è stât pussibil fâ il prin bagn, dopo altris 15 agns e je stade jemplade la prime butilie cul simbul tant innomenât dai “Tri srca” (“Trê cûrs”).
CASSIS_ La cure cu lis aghis des termis e je zovevule ancje pes cassis dal Stât: di fat, si stime che ogni an lis 15 termis slovenis a vuadagnin 200 milions di euros. Ce che al mancje par fâ inmò un altri salt di cualitât, secont il president de Socie des termis naturâls slovenis, Iztok Altbauer, e je la specializazion, par vie che ducj i centris a ufrissin po sù po jù i stes prodots ai clients. L’obietîf al è chel che lis termis plui grandis a sigurin servizis di alte cualitât, intant che chês piçulis a cirin di specializâsi in ufiertis une vore specifichis, ancje individuâls. Intant, ai 25 e ai 26 di Otubar li des Termis di Zreče, si tignarà une conference cu la partecipazion di 20 centris termâi di Slovenie, Cravuazie, Ongjarie e Slovachie par scambiâsi informazion e par frontâ la crisi adun. ■
ALESSIO POTOCCO