AUSTRIE. Inaugurât il gnûf centri “termis Cartintie” a Warmbad

La Austrie e à montagnis, grancj lâcs, paisaçs coltivâts, citâts bielis come Salisburc o Viene, al puest dal mâr però e pues proponi un gran numar di centris termâi modernis.
La plui part dai implants si cjatin su la linee termiche che e cor a sud di Viene. Li dulintor a son nassûts za lûcs storics tant che Baden, Bad Vöslau, Bad Fischau dut a tachin cu “Bad”, par furlan “bagn”.
Centri dal turisim tes aghis cjaldis e je la Stirie meridionâl dulà a son 9 implants, invezit in Carintie “dome” cuatri: 2 a Bad Kleinkirchheim e un a Bad Bleiberg e un a “Warmbad”. A Bad Bleiberg e Bad Kleinkirchheim lis termis a son tal cûr di valadis alpinis a passe 900 m, ven a dî che si pues fâ il bagn in aghe cjalde intant che di fûr al è un ambient invernâl.
Lis termis di Warmbad a pôcs chilometris dal Friûl a spietin i furlans_ Ai 11 di Lui al è stât inaugurât il gnûf centri “termis Cartintie” a Warmbad Vilac cuntune fieste dulà che a jerin presints une vore di celebritâts dal mont de politiche, sport e culture tant che la stele nadadore Mirna Juki, il schiadôr Christian Mayer e il governadôr Gerhard Dörfler. “O sin une vore braurôs di vê screât chest progjet regjonâl: cumò Vilac al ufrìs ai vicins de Slovenie e dal Friûl ancje termis pardabon ugnulis” al à declarât Dörfler.
Il gnûf Carintie spa, un progjet di 47 milions di euros, al rapresente une piere miliâr te storie dal turisim carintian. Il gnûf complès cun pissinis dentri e fûr, 3 sgliçui di aghe, un parc acuatic interatîf e la pissine sport di 25 metris, fitness, aree spa al sostituìs l’implant di prin.
O vin contatade la responsabile dal marketing de struture, Doris Pehr.
Ce rindial interessants i lûcs turistics de Carintie infûr di une visite spa?
Nature maraveose, ciclisim, alpinisim, rilassâsi intune ostarie comude e plasevule o morestâ e sclipîsi dongje di un dai lâcs – e simpri tu ti cjatis cuntun pît in Friûl o Slovenie.
Si spietaiso presincis des regjons dongje il confin furlan-sloven?
Sì, o sperìn di vê un grum ospîts de regjon Alpis Adrie, in particolâr dal Friûl ancje par vie dal bon colegament stradâl.
Parcè a pôcs km no sono struturis termâls?
La posizion dai bagns e dipint soredut de gjeologjie de zone. La aghe termâl e je dome dilunc vie des liniis di faie: une e va de direzion di Salisburc viers Friûl e propit su cheste si cjate Warmbad Villach.
Fasêso publicitât in Friûl e vêso decidût di doprâ ancje messaçs publicitaris par furlan?
Il Friûl al è un segment di clientele impuartant par nô. O sin daûr a fevelâ cun partners comerciâi potenziâi su la cooperazion e sul marketing. Tal nestri complès termâl adun cul sô albierc “Thermenhotel Karawankenhof” o fevelìn par todesc, inglês e talian. Il furlan al è une lenghe pardabon une vore biele, ma, magari cussì no, no lu tal nestri repertori.
Grancj invistiments di scuasit 46,7 milions e une cerimonie di viertidure di dusinte mil euros puartarano a une cressite dal turisim te regjon di Vilac?
Il centri benstâ “KärntenTherme” cu la sô ufierte di bonvivi e benstâ, saune, SPA, fitness e atrazions pai fruts, si presente tant che une grande atrazion par dute la regjon tor di Vilac, ma ancje al di là dal confin. E je une ufierte bielonone soredut cuant che chenti al è brut timp.
Trop costie une zornade ae termis par une famee cun doi fruts? Vêso abonaments salacor pai ospîts de regjon di confin, p.e. di Tarvis?
Un biliet famee par doi grancj e un frut al ven 45 euros. O vin il biliet zornalîr e il biliet par trê oris, tant che abonaments o biliets anuâi e mensii. O sin in particolâr braurôs de ufierte MEMBERSHIP Kärnten Therme: i membris a puedin fâ plen ûs dal centri complet, dutis lis trê areis FUN, FIT & SPA 356 dis al an. Informazions e prenotazions al numar: +43 (0) 4242 3001-2750 e www.warmbad.at
Ce isal di gnûf e di difarent, stant che si lei su la stampe che il gnûf centri al è il plui moderni in Austrie tal cjamp FUN / FIT / SPA ?
La peraule clâf “Medical Wellness”, la cumbinazion dai trê “FUN, FIT & SPA”. Formazion, bagn turc, massaç, aghe termâl, bielece, nadâ te pissine di 25 metris, spinning su la terace panoramiche. Ogni membri al cjape il so propri plan di alenament cun conseis individuâi. La tecnologjie e je inzornade, o volìn che i nestris ospîts si podedin rilassâ intant che i lôr fruts si divertissin sul sgliçul lunc 85 m.
Isal ancjemò alc che no si cjate inaltrò?
Une des nestris atrazions princilpâls e je il hammam cui siei massaçs orientâi a pinel savon.
Dal dut gnove e je la nestre linee cosmetiche “Videa”, disvilupade in esclusive dome pal nestri Resort Spa cu la nestre aghe termâl. O ufrìn trataments cui prodots “Videa” tal nestri centri SPA. (Prenotazions: spa@kaerntentherme.at). ■
JANEZ ERAT