CONCORS FOTOGRAFIC – REGOLAMENT. Prin Concors internazionâl di fotografie “LA (TÔ) PATRIE DAL FRIÛL… INTUN CLICK”

::::::::::::::::::::::::::::::::::::::::::::::::::::::::::::::::::::::::::::::::::::::::::::
La Patrie e pant l’invît a partecipâ al Fotoconcors “LA (TÔ) PATRIE DAL FRIÛL… INTUN CLICK”. A saran premiadis lis oparis che a rifletin il patrimoni tangjibil e intangjibil de nestre Patrie, il Friûl, cu la intenzion di promovi il disvilup de art fotografiche, di insaldâ il sens di apartignince a la nazion furlane celebrant il Friûl midiant des imagjins, e di inviâsi sui diviers percors che a potenziin i valôrs dai indicadôrs culturâi e la nestre identitât.
Regolament
L’invît al è par un public diletant in gjenerâl, di cualsisedi popul, dacuardi cun chest regolament:
1- Si fisse une categorie uniche di interpretazion LIBARE sul teme “LA (TÔ) PATRIE DAL FRIÛL… INTUN CLICK”.
2- A podaran partecipâ autôrs che a vedin plui di 10 agns (i minôrs di etât tra i 10 e i 18 agns a varan di inviâ une autorizazion dai gjenitôrs o tutôrs), vie e-mail.

3- La partecipazion al concors e je gratuite e e impliche la acetazion integrâl e la osservance di chest regolament.
4- Lis fotografiis a àn di jessi ineditis e no àn di vê partecipât a altris concors fotografics. Candidant lis imagjins, il fotograf al declare di vênt ducj i dirits e che la opare no prejudiche i dirits di tierçs e no va cuintri di nissune leç in vore.
5- Cu la partecipazion a chest concors, l’autôr des fotografiis al concêt a La Patrie dal Friûl e ai Ents che a patrocinaran il concors ogni dirit di doprâ dutis lis imagjins par mostris, publicazions, pal sît internet www.lapatriedalfriul.org e par ogni ocasion istituzionâl e comerciâl, cence vê ricognossût nissun compens, ma specificant simpri il non dal autôr stes.
6- Lis fotografiis a puedin jessi a colôrs o in B/N, in formât digjitâl o analogjic digjitalizât cun estension .jpg o .jpeg (no son ametûts altris formâts), lis dimensions a varan di jessi di 1024 x 768 pixel, in 72 dpi. Ogni autôr al podarà candidâ un numar massim di 3 (trê) fotografiis par ogni mês. Si consee di fâ lis fotografiis di dimensions tra i 2 e i 6 Megapixel. Par sclarî cualchi dubi e ricevi informazions sul concors, scrivi un messaç di pueste eletroniche a: concorspatrie@gmail.com.
No son ametudis elaborazions digjitâls des fotos, se no dome piçulis corezions di lûs, contrast e colôr. Su lis fotos no varà di jessi nissune scrite.
7- No podaran partecipâ al concors chei che a son de jurie, ni lis lôr fameis
8- Lis fotografiis si varan di inviâ, specificant tal ogjet de mail “concors fotografic LA (TÔ) PATRIE DAL FRIÛL… INTUN CLICK”, ae direzion di pueste eletroniche concorspatrie@gmail.com, mês par mês dentri di ogni zornade segnade ta chest calendari des scjadincis:
LA MIÔR FOTO PAR FEVRÂR: consegne dentri dai 15 di Zenâr 2013
LA MIÔR FOTO PAR MARÇ: consegne dentri dai 15 di Fevrâr 2013
LA MIÔR FOTO PAR AVRÎL: consegne dentri dai 15 di Març 2013
LA MIÔR FOTO PAR MAI: consegne dentri dai 15 di Avrîl 2013
LA MIÔR FOTO PAR JUGN: consegne dentri dai 15 di Mai 2013
LA MIÔR FOTO PAR LUI: consegne dentri dai 15 di Jugn 2013
LA MIÔR FOTO PAR AVOST: consegne dentri dai 15 di Lui 2013
LA MIÔR FOTO PAR SETEMBAR: consegne dentri dai 15 di Avost 2013
LA MIÔR FOTO PAR OTUBAR: consegne dentri dai 15 di Setembar 2013
LA MIÔR FOTO PAR NOVEMBAR: consegne dentri dai 15 di Otubar 2013
LA MIÔR FOTO PAR DICEMBAR: consegne dentri dai 15 di Novembar 2013
LA MIÔR FOTO DAL AN: e sarà sielte tra chês chi parsore.
9- Intal messaç di pueste eletroniche a àn di jessi segnâts chescj dâts: cognon, non; document di identitât, direzion di cjase, etât e une piçule descrizion dal sogjet fotografât (par esempli: il comun dulà che e je stade fate la foto, il non dal sogjet e la date che e je stade fate la fotografie).
Ogni file al varà di jessi nomenât cu la secuence: numar di document dal autôr (es. Cjarte di identitât) – numar di ordin de fotografie – titul de fotografie. Par esempli: CJARTE DI IDENTITÂT AA15685903 – foto n.2, titul “Aquilee”, la secuence e sarà: “AA15685903-2-Aquilee.jpg”.
10- L’autôr nol podarà mandâ plui voltis la stesse foto o fotos masse similârs a chês che al à za mandadis.
La comission organizative e nomenarà un grup interdissiplinâr di trê components de jurie: da La Patrie dal Friûl, dal cjamp fotografic e dal cjamp artistic. Il lôr judizi finâl no si podarà sindicâ, e si rivarà a une risoluzion mês par mês dentri de publicazion di ogni numar mensîl de riviste La Patrie dal Friûl pal 2013. Il vincidôr assolût al vignarà sielt tra lis 11 miôr foto dal mês, dentri dai 31 di Dicembar dal 2013.
La valutazion de jurie si fondarà suntune proiezion di alte risoluzion intal formât di 1024×768 pixel.
La premiazion si fasarà dopo de definizion de classifiche finâl tal mês di Zenâr dal 2014.
Partecipâ al concors al impliche la acetazion e la osservance integrâl di chest regolament.
Premis
PREMI MENSÎL: publicazion de miôr foto mensîl su la riviste La Patrie dal Friûl, come segnât sul calendari des scjadincis dal concors + abonament anuâl a La Patrie dal Friûl.
CLASSIFICHE FINÂL TRA LIS MIÔR 11 FOTOS SIELTIS MÊS PAR MÊS:
PRIN PREMI ASSOLÛT: 300 EUROS di valôr
SECONT PREMI ASSOLÛT: 200 EUROS di valôr
TIERÇ PREMI ASSOLÛT: 100 EUROS di valôr
La jurie e aplicarà tant che criteri di fonde di valutazion la percezion dal spirt dal concors che il fotograf al sedi rivât a formâ midiant de imagjin. ■
________________________________________________________________
REDAZION