AUSTRIE. I austriacs braurôs di vê un gnûf eroi mondiâl

Intai ultins timps, i austriacs si jerin lamentâts che ator pal mont la Austrie no si cognòs vonde ben, anzit a jerin câs dulà che tal forest no fasevin diference tra la Australie e la Austrie. Magari cussì no, la Austrie si riferìs dispès par events negatîfs: Hitler cressût in Austrie, la storie dal pari mostri Fritzl, il scandul dai predis acusâts di pedofilie che al à metût la glesie austriache intune crisi che e dure ancjemò. Tai ultins mês si è formât un moviment di predis ribei che a domandin riformis profondis te glesie austriache su temis come il rûl des feminis, il celibât obligatori. La ultime rispueste tal Setembar di chest an dal gardenâl Schönborn e je stade negative. Tal mont politic a rivin notiziis dal scandul di coruzion che al cjape dentri ancje i rapresentants plui alts. Il câs che al à vût rivoc plui grant te societât al è stat la condane a cinc agns e mieç di reclusion al ex leader dal partît conservadôr austriac de Carinzie Josef Martinz.
Midiant dal gnûf idul, la Austrie si lee a un event ecezionâl
Cul lanç de stratosfere di Felix Baumgartner – almancul par un pôc di timp – dapardut pal mont la Austrie si lee a un event ecezionâl o, tant che a titulin i media in Austrie, a un event eroic.  Soredut tal timp di prospetivis neris – ancje se in Austrie la crisi economiche no je cussì evidente e no fâs part de vite cuotidiane – a mancjin propit chei sucès positîfs. Par plui di une setemane, il gnûf idul al è restât in prime pagjine tai gjornâi.
Daûr di chest progjet e jere la societât “Red Bull” che e à sostignût ancje ducj i coscj de mission di 50 milions di euros. Prudelâ progjets di marketing tal mont dal sport estrem – ducj a cognossin la sô scudarie di formule 1 cul pilote Sebastian Vettel – al à judât un grum il sucès internazionâl di cheste marcje. La societât e investìs te publicitât cirche il 30% dal faturât. Il concet di marketing nol è tipic pal caratar consevadôr austriac: nus somee a chel de Coca Cola. Pôcs prodots austriacs a son cussì cognossûts pardut il mont come cheste bevande energjetiche.
Red Bull, la marcje austriache plui cognossude
Chei 50 milions di euro investîts tal progjet a àn gjenerât un valôr tai media di sîs miliarts di euros, ven a stâi un rindiment di 12.000%. Ancje chel un record, anzit ”la vere dimension no je ancjemò valutabile”, a disin i ricercjadôrs dal marketing. Il produtôr de bevande energjetiche al à superât tal 2011 i numars dai agns precedents cuntun aument dal 12,4%.
Critiche: pericui masse alts?
L’undis di Novembar dal 2009, il svuizar Ueli Gegenschatz che al jere considerât un pionîr de sene dal sport estrem mondiâl al è saltât, intune campagne publicitarie de Red Bull, dai 88 metris dal Sunrise Tower a Zurì. Cjapât di une svintade di aiar, al à pierdût il control e al è colât par tiere denant dai voi dai spetatôrs. Gegenschatz al è muart doi dîs dopo tal ospedâl. Dome pocjis setemanis prime, ai 28 Avost, Eli Thompson – une altre stele de sene – al jere muart intant de esecuzion di un salt a wingsuit tes Alps svuizaris, intune riprese di un filmât di promozion pe Red Bull.
Dopo chei events, la Red Bull e je stade criticade di zuiâ cun pericui masse alts.
Cui isal Felix Baumgartner?
Doi agns indaûr al à presentât a New York il so gnûf progjet plui ardît: rompi la bariere dal sun in colade libere, cence nissun avion. Nassût a Salisburc, Baumgartner al à tacât come mecanic une vite dal dut normâl. Tal esercit al à imparât pe prime volte a fâ salts complicâts. Ma dopo al è vignût dut chel che no si pues imparâ in nissun puest di vore dal mont: al à petât un salt cul parecjadudis de man diestre de statue dal Crist Redentôr a Rio de Janeiro e des Petronas Twin Towers a Kuala Lumpur: il plui bas e il plui alt dai salts previodûts tal base jumping. Dut daûr il so sproc di vite: “imparâ a amâ chel che ti fas pôre”. Il sô progjet plui spetacolâr al è stât tal 2003, cuant che al à saltât cun piçulis alis di carboni di un avion di une altece di 9.150 metris sore Dover, traviersant in colade libere la Maniche.
Il salt di 36 chilometris di altece al è stât une vore plui pericolôs. “Sigûr che o ai pôre, come simpri prin di ogni salt”, al à dit Baumgartner. E je stade ancje la mission plui dificile e salacor al è rivât al so limit: nol fasarà plui gnûfs progjets.
E ce isal il Base Jumping?
Base jumping si clame il sport estrem di Baumgartner: lançâsi cuntun parecjadudis di variis superficiis, edificis, puints. Propit il fat che si salte di une altece basse al è ancje il pericul plui grant. Stant che un grum di parecjadudiscj a àn cjatât la muart, chel sport al è stât improibît in diviers paîs dal mont. Tant che prin “base jumper” si ricuarde il vienês Franz Reichelt (che lu clamin ancje “nono di Baumgartner”) che si jere butât jù ai 4 di Fevrâr dal 1912 dal prin plan de tor Eiffel (60 metris), cuntun parecjadudis di sô invenzion. Si butà, ma il so paracjadudis no si vierzè e si sfracaià par tiere. La autopsie e mostrà che Reichelt al jere muart prin di tocjâ tiere par un atac di cûr. ■
JANEZ ERAT