Finanziarie 2013 e lenghis minoritariis: lis cifris a fevelin bessolis…

Lis conferencis regjonâls resintis su furlan e sloven a son stadis la ocasion par vê indiment la impuartance di chestis lenghis e la lôr centralitât pe difese e pe ricualificazion de autonomie dal Friûl – VJ, za di timp sot atac. Che lis declarazions fatis in chest sens di esponents di prin plan de aministrazion regjonâl di cumò a fossin lontanis in ogni câs dai fats al someave za palês chê volte, ma la leç finanziarie regjonâl pal 2013 e sclarìs ancjemò miôr la distance tra peraulis e fats. La leture dai belançs regjonâi, par tant che e puedi jessi aride e dificoltose par chei che no son pratics de materie, e ufrìs di fat il cuadri esat dal valôr che la Zonte vuidade di Renzo Tondo e assegne aes lenghis propriis dal Friûl – VJ.
***
Risorsis pe comunitât linguistiche furlane
Par ce che al tocje la lenghe furlane, l’invistiment plui consistent presint intal belanç di prevision pal 2013 si riferìs ai 950 mil euros pal ûs curicolâr de lenghe proprie dal Friûl intes scuelis e al presente une riduzion di 50 mil euros a pet des risorsis stanziadis pal 2012.
Ben altre entitât a àn invezit i fonts pal furlan gjestîts dal assessôr Elio De Anna. A vegnin anuladis di fat lis risorsis pai programs radiotelevisîfs in lenghe furlane (-150 mil euros) e chês pes ativitâts dedicadis a cheste lenghe de biblioteche Joppi (-30 mil), intant che riduzions pesantis a interessin i stanziaments pe Agjenzie Regjonâl pe Lenghe furlane (-370 mil), pe Societât Filologjiche Furlane (-90 mil) e pai ents ricognossûts di impuartance primarie pal furlan (-60 mil). Al è un tai dal 49,6% a pet dal 2012, che al lasse a pene 710 mil euros a disposizion dai subiets publics e privâts principâi che a operin pe promozion de lenghe furlane.
In totâl, cjapât dentri l’insegnament, la Regjon e à stanziât pal furlan un milion e 660 mil euros, il 45% in mancul dal an passât, e pôc plui dal 0,02% di dut il belanç regjonâl. Chest, al net des declarazions e dai sprocs, al è il valôr assegnât ae lenghe proprie di plui di 600 mil citadins dal Friûl-VJ. Efiets de crisi, si disarà: duncje, dome a titul di confront, o visìn che inte stesse finanziarie regjonâl si previôt une spese di un milion e 840 mil euros pal ent autonom dal teatri comunâl Verdi di Triest (di no confondisi cul milion assegnât ae Fondazion Teatri Liric Verdi di Triest)…
Un câs emblematic par capî miôr la situazion al è chel de Cooperative di Informazion Furlane, societât editore di Radio Onde Furlane. Tra lis realtâts che a operin par e cu la lenghe furlane, e je chê cun plui puescj di vore e chê cuntune ativitât costante, di podê verificâ cun facilitât (diviersis oris di programazion radio par furlan ogni dì, organizazion di avigniments sul teritori, produzions musicâls e editoriâls, e v.i.). Cundut de promesse di sostignî cun plui decision lis realtâts che a dan ocupazion, la cooperative si cjate cuntun stanziament in finanziarie di 40.100 euros, plui dal 40% in mancul dal an passât, e cul enesim azerament des risorsis pai programs radiotelevisîfs par furlan (il tierç operât in finanziarie de Zonte Tondo). Dut chest intant che, passant lis vôs che a componin la finanziarie, si cjatin contribûts straordenaris pai subiets plui svariâts che mâl si conciliin cu lis puaretâts di belanç; e che no si trati dome dai efiets de crisi si lu dedûs ancje dal fat che de finanziarie dal 2009 a chê atuâl la cooperative e à patît tais continuis che a rivin aromai a cuasi il 60% de cifre iniziâl.
***
Risorsis pe comunitât linguistiche slovene
E somearès miôr la situazion pe comunitât slovene, dulà che pai ents e lis organizazions de minorance si previodin 2 milions e 745 mil euros (-300 mil a pet dal 2012), intant che altris 516 mil euros a laran ai Ents locâi pal disvilup dai teritoris de comunitât slovene. In realtât, si fevele di fonts statâi che la Regjon si limite a zirâ ai direts interessâts. Simpri leâts ae leç statâl 38 dal 2001, a son dopo i 300 mil euros pes organizazions di riferiment de comunitât e i 28 mil pal Comitât paritetic.
Di divignince no specificade a son invezit 50 mil euros pal istitût bilengâl di Sant Pieri al Nadison e 40 mil pe paritât scolastiche, intant che des risorsis regjonâls a vegnin dal sigûr i 165 mil pal Teatri Stabil Sloven di Triest e 40 mil pal rosean e chês altris varietâts slovenis fevelis in provincie di Udin (vôs di spese ativade plui par resons ideologjichis che di dibisugne, viodût che par chestis  varietâts si podevin za doprâ lis risorsis de leç statâl e di chê regjonâl pai slovens). Duncje, pe comunitât slovene dal Friûl-VJ l’esecutîf regjonâl al à metût a disposizion (calcolant ancje lis vôs di spese di divignince incierte) in dut a pene 295 mil euros, une vore di mancul di chel che al è stât concedût ae Promotur pe acuisizion dai dirits des tapis dal Zîr di Italie in program inte nestre regjon intal 2013 e 2014.
***
Risorsis pe comunitât di lenghe todescje e altris fonts
Pes comunitâts là che si fevelin varietâts todescjis, la cifre in belanç e je di 150 mil euros. Cifre che, calcolât il rapuart tra risorsis e numar di feveladôrs, e podarès someâ plui “gjenerose” a pet di chel che al è stât stanziât par chês altris dôs comunitât minorizadis, ma che in realtât e je tant lontane dal garantî politichis linguistichis degnis di chest non.
Intal belanç di prevision pal 2013 a son ancje un milion e 300 mil euros assegnâts ai Ents locâi par garantî ai citadins une serie di servizis intes lenghis minorizadis tuteladis de leç statâl 482/99, ma in chest câs nol è pussibil rimontâ ni ae percentuâl di fonts statâi che a contribuissin a cheste vôs, ni ae ripartizion interne di chestis risorsis tra furlan, sloven e todesc. In ogni câs, dal sigûr pôc par cambiâ il cuadri ilustrât fin culì.
***
Cualchi (amare) conclusion
In conclusion, ancje sumant fonts regjonâi e di divignince statâl, l’esecutîf vuidât di Renzo Tondo al à metût in belanç par furlan, sloven e todesc – unic lincin aromai par difindi la autonomie e la specialitât dal Friûl – VJ – une cifre che no rive nancje al 0,1% des risorsis a disposizion. Al è un dât che nol à bisugne di coments e che, cjapant in prestit propit lis peraulis dal president de Regjon intun coment su lis politichis metudis in at dal so esecutîf pal furlan, al lasse che a fevelâ a sedin i fats.
Lis elezions regjonâls però a son dongje e, intal sgurlament di peraulis che dal sigûr si spindaran ancje su chest teme, al sarà mût e ocasion di visâ plui e plui voltis i citadins di lenghe furlane, slovene o todescje su cuâi che a son i fats – chei vêrs – che la Aministrazion Tondo ur à risiervât. A fâ ancjemò plui amare la bocjade e je che cheste politiche miope e autolesionistiche e va a pericul di distruzi l’unic lincin che al reste al Friûl – VJ par difindi e ricualificâ la proprie specialitât e autonomie, cun consecuencis che a saran paiadis di ducj i citadins de nestre regjon, ancje chei che no fevelin furlan, sloven o todesc.
✒ prof. Gianfranco D’Aronco e Carli Pup