SAGHE FURLANE – 1. Il Friûl al è nassût cussì

«Saghe», dal todesc, al volarès dî: racont, leiende. O pensín che tantis leiendis dal Friûl, studiadis a font, a puedin pandinus alc sul passât de nestre çocje che tes leiendis tramandadis di nono in nevôt e ten cont alc di etis lontanis e di gjernaziis tant diferentis che, cul lâ dal timp, a àn dât dongje chest spetacul di miscliç ch’al é il popul furlan.
***

Il Friûl al è nassût cussì.
Cheste leiende us e conti chel istès, ancje se no sai s’e je vere come chês altris, stant che dome pôcs a sigurin di vê vût stât a viodi cui lor vôi.
Sicheduncje, cuant che il Signôr al creà chest mont, dopo di vê sfladassât par sîs dîs, si cjatà avonde content di ce ch’al veve metût in stât. Al stave par lâ a polsâ come che i spiete a ogni bon cristian dopo de vore, cuant che si nacuargé che te sô farie al jere restât un tic di matereâl. No migo grandis robis, ma peró un sclip di dut: bocons plui o mancul grancj, e di ogni sorte. No ’nd jere tant di meti adun un altri continent, ma nancje une cagnere di strassâ, cussì l’Eterni Pari al jere su lis spinis par vie che i displaseve di lassâ pastanade la vore.
Di bot, i vegnì sù la pensade juste!
Al cjapà un par un chei bocons, ju parà dongje, ju disponè cun ande ognidun al so puest, e, prove che ti prove, al rivà adore di cumbinâ sù, parie, une gnove tiere.
Al é cussì – a vuelin dî, simpri chei che a jerin a viodi – ch’al é nassût il nestri Friûl: une Patrie no tant grande e nancje masse piçule, ma ce ch’al baste par ch’al vivi dentri, cence pierdisi, il nestri popul furlan; un sît che nol à dut, ma ben un tic di dut: lis monts a spice des Dolomitis, chês tarondadis e boscosis de Cjargne e il Cjars discrodeât, po la plane dute verde, po i flums imburîts e salvadis cul gravâr largjonon a uso il Tiliment, o come chei strents e plens di aghe cuiete come la Livence. E lis ruvîs spaventosis de Celine, e lis clevis vonguladis dai cuei de Miezane. E là jú dapît lis lagunis cui cjasons, lis barcjis, i pes, il mâr, i cocâi e l’ôr dal cîl che si piert…
Chest al é il Friûl, fantats; e come la tiere, cussí al è il stamp de sô int; ch’e jê buine di girâ il globo tor ator, ma e reste peade d’anime al so blecut di mont là che prin o dopo e torne e si cjate di Diu; vivarose e cjalde come chei di venti jù, epûr serie e di caratar come chei di chenti sú; libare e dure di lassâsi pleâ e meti in rie, epûr ordenade drentivie, te sô fonde, cence che nissun le sfuarci…
Come se Chel là sú i ves metût, cence pratesis, ma ancje cence dismenteâ nuie, un sclip di chei dons ch’al à spartîts, sorte par sorte tra chês altris gjernaziis.
Parcè che il Friûl al é propit un struc dal univiers.
✒ pre ‘Sef Cjargnel