Renzo Tondo, 56 agns, di Tumieç. President de Regjon in cjarie, al cor par un altri mandât; al è sostignût di Lega Nord, Partito dei pensionati, Autonomia resposabile, Popolo delle Libertà per Tondo presidente, Unione di Centro e La Destra.
Tondo, ce isal il Friûl par lui?
Al è une tiere cuntune storie tormentade e stimolante. Cetancj esercits, cetancj podês e cetantis culturis si sono alternadis tal spazi di vincj secui su chest teritori? Il Friûl al è il risultât di cheste storie e la sô popolazion e à madurît la sô identitât braurose di int salde e laboriose, in cjase e – cuant che la puaretât le à obleade ae emigrazion – ancje fûr. Al è duncje naturâl che la autonomie e sedi tes aspirazion plui profondis dal nestri mût di jessi. Ma autonomie di esprimi te massime responsabilitât. Parcè? Par vivi inrocjâts o par vê un control tal svilup des economiis e dai rapuarts sociâi e culturâi jenfri Est e Ovest, Centri Europe e Mediterani? A son achì lis sfidis che il Friûl al à denant di se: cemût che al à di cressi par vê un rodul in chest contest. Se o pensìn a chestis sfidis, alore si capissin miôr i contignûts di peraulis tant che infrastruturis pe energjie e pai traspuarts, macro e euroregjon, Italie e Europe, inovazion, ricercje e internazionalizazion. No podìn cressi dentri, difindi la cualitât de vite e dai servizis, cence dialic, confront, viertidure cun dut ce che o vin tor ator e, prime di ducj, cu la Vignesie Julie che e à dramatichementri vivût esperiencis analighis a chês dal Friûl. La nestre specialitât e sta inte storie, sintesi di scuintris e di incuintris, che no si ferme e e domande ae nestre volontât di autonomie la responsabilitât di gnûfs progjets, par une regjon inovative, laboriose, al servizi dal Paîs e vierte ae Europe e al mont. Colocazion gjeografiche, etniis e storie a puedin jessi ancjemò ae fonde de nestre specialitât. Nus sta a noaltris fâ capî cui fats che la nestre autonomie e je un vantaç par dut il Paîs e no un privileç che o tignìn par nô.
Esistie une cuistion furlane?
Jo no viôt une “cuistion furlane”, se cun chest si riclame il vieli concet assistenzialist di difese di une identitât. La identitât furlane e à cjapât pît cuant che no esistevin leçs di tutele, parcè che la vite cuotidiane di un popul e à fat de lenghe fevelade la espression dal propri mût di viodi se stes e il mont. Vuê, intun contest di globalizazion, lis leçs a puedin judâ a no pierdi il passât ma il futûr al dipent ancjemò di cemût che nô cjargnei e furlans o savarìn meti dongje il vivi cuotidian cui valôrs de nestre identitât. E stin atents: la identitât, cussì come la specialitât, no sono acuisîts une volte par simpri. A àn dibisugne di cressi, di svilupâsi, di cjalâ indevant in confront cuntune realtât che e cambie intor di nô e che nus propon simpri gnovis disfidis. Inalore, se o volìn, une “cuistion furlane” e pues jessi: cuale saraie la identitât future dal Friûl? Rivaraie adore ancjemò di jessi un motîf fondant de specialitât che la storie e à ufiert a chescj teritoris? Jo o pensi che o vin lis cualitâts par fâje, baste che no si pleìn su nô stes e o coltivìn la costance, la capacitât di inovazion imprenditoriâl, il sens de coesion sociâl che nus àn fat superâ in passât ancje lis situazions plui dramatichis e dificilis. ✒ Oscar Puntel
__________________________________________________________________________
Saverio Galluccio, 42 agns il mês di Lui. Nassût a Udin al vîf a Çarvignan e al è il candidât dal Movimento 5 Stelle.
Al premet un concet di fonde par un moviment, chel des 5 Stelis, che al à tant che principi chel di pandi dome concets e pinsîrs che a son stâts metûts adun e discutûts jenfri i ativiscj: “Tai grups di vore la cuistion furlane no je mai stade tratade. E no par vêle volude lassâ di bande di pueste, ma par vie che il teme nol è stât mai ponût di nissun”.
Saverio Galluccio, candidât ai presidence de Regjon pe formazion politiche che a nivel nazionâl e à tant che leader Beppe Grillo, al met cussì lis mans indenant par vie che ce che al dîs al è in cont so e no la risulte di un confront coletîf, ma ancje par rifleti che “al sarà di capî parcè che la cuistion furlane, de lenghe e de culture furlanis, no je mai saltade fûr, no je sintude”.
Sclet, Galluccio al è lui par prin a ricuardâ che cul so non e cognon si capìs che “no soi un furlan patoc” (la espression e je propit sô), ma la lenghe le fevele par vie che cuant che “o lavoravi in bancje i miei compagns di vore mi an dit: spessee a imparâle, che se di no tal to sportel nol ven nissun”. Il leam cul Friûl, “la mê tiere”, al è cussì fuart che “cuant che o feveli di jê mi comôf. No par nuie o ai lassât di fâ l’uficiâl dai Carabinîrs purpûr di tornâ a impastanâ la mê vite chenti, che se di no o sarès stât simpri ator pe Italie”.
Sclarît il rapuart personâl cun lenghe e Patrie, Galluccio al tache a meti su la taule i criteris par frontâ a nivel politic e aministratîf la cuistion de pupilance de lenghe e de culture furlanis. “Intune situazion di crisi come chê che o stin vivint – al dîs – prin di dut i bêçs publics pe pupilance dal furlan a van dâts a chei sogjets che a puedin dimostrâ di vê storichementri lavorât, e di vê lavorât ben, par prudelâ lenghe e culture. Bisugne stâ in vuaite rispiet a chei che invezit a doprin il furlan par fins clientelârs”.
In merit po dal furlan insegnât tes scuelis, “la nestre linie e je che, prin di dut, a scuele tocje sburtâ sul inglês – al zonte il candidât president dal M5S. Cheste sielte no intint di dî che si è cuintri la marilenghe e no intindìn di dî nancje che e à di jessi gjavade dai bancs di scuele dal dut, ancje se o crodìn che nol è a scuele che si impare il furlan”. Il so al è un discors pragmatic, sul stîl dal Moviment: “Dut câs – al rimarche – bisugnarès scrutinâ cemût che a son stâts spindûts fintremai achì i bêçs e cuai risultâts concrets che a àn dât: se a son bogns si pues resonâ. Se a son stâts dâts finanziaments, dome par fâ un esempli, par fâ libris che no si doprin, intant che tes scuelis no so i bêçs par fâ lis fotocopiis, si à di tornâ a riviodi l’implant”. In continuitât cun chest resonament, une altre atenzion: “Intune ete di crisi, si à di fâ sieltis. La prioritât no pues jessi chê di cambiâ la cartelonistiche bilengâl se prin no vin comedadis lis busis tes stradis”.
Tai siei resonaments, Galluccio al ricuarde plui voltis che lui “al è chel che al à lassât un lavôr sigûr par tornâ a cjase” e propit par chest ce che plui al volarès che si capìs al è che “o sin une regjon siore di diversitâts. Ma no stin a doprâlis par dividisi l’un di chel altri. Fasìn in maniere, invezit, che a sedin la cole des nestris comunitâts”. ✒ Antonella Lanfrit
__________________________________________________________________________
Debora Serracchiani, 42 agns. E je nassude a Rome ma e vîf a Udin. Parlamentâr europeane e cor pe presidence de regjon, sostignude di PD, Slovenska Skupnost, Italia dei Valori-Lista Di Pietro, Sinistra Ecologia e Libertà, Cittadini per Debora Serracchiani Presidente.
“Ce che al è par me il Friûl? La rispueste par gno cont e je avonde clare: il Friûl e je cjase mê, la tiere dulà che o ai sielzût di vivi, e dulà che o vîf une vore ben, di plui di vincj agns. Al è il puest dulà che o soi vignude a stâ adun cun chel fantat che al è deventât il gno om, e dulà che vuê a vivin ancje i mei gjenitôrs”. Debora Serracchiani e pant un sclet amôr par cheste tiere ancje se la sô divignince no je furlane: e chest argoment al è un dai plui doprâts cuintri di jê in campagne eletorâl. Ma di bande sô la critiche e jentre di une orele e e jes di chê altre, parcè che e ven fate di chei “che purpûr jessint furlans di nassite a àn disvuedât il Friûl di ogni autonomie, come che e dimostre la vicende dai 370 milions che Tondo al à regalât a Tremonti e Berlusconi pal federalisim fiscâl che no si è mai fat. Beçs strassâts, che a jerin dai furlans e a son finîts inaltrò. Pe Serracchiani e je ore di finîle cun cheste “autonomie a pierdi”: al covente “tornâ a jessi speciâi”. Dulà che la specialitât e je intal Dna di cheste tiere: “une tiere che e à savût trasformâsi, mudâ piel e, di une aree puare e aretrade dal Paîs, e je stade buine di deventâ regjon svilupade, avanzade, model par dut il rest di Italie, in gracie de tempre dai furlans e de lôr capacitât di no molâ mai, di vê simpri fiducie intes lôr risorsis”. Che ur àn permetût di risurî di un taramot cussì fuart di fâ mil muarts, e po di deventâ une des locomotivis produtivis de Italie, un laboratori di inovazion, ecelencis e savê fâ. Merit de int ma ancje di un sisteme fondât su la formazion (par sigûr la Universitât e à sburtât in cheste direzion) e su la solidarietât, sul spirt di cuarp e la voie di judâsi un cul altri che di simpri e ten dongje il nestri popul che nol à di pierdisi daûr a dualisims cun Triest ma di esaltâ chest so caratar.
La plui distintive des carateristichis dal popul furlan e je dut câs la lenghe. E pe Serracchiani no bisugne mai dimenteâsi che “il furlan no je la uniche des lenghis de nestre Regjon ma al è un toc fondamentâl di che identitât plurâl che e segne di simpri cheste tiere”. Furlan, todesc e sloven si incuintrin dome achì di noaltris in dute la Europe, e chest par sigûr al è un fat che nol è mai stimât avonde. “Il Friûl Vignesie Julie come che jo lu cognòs e lu presei – e dîs – al è une Regjon dulà che la pluralitât linguistiche e culturâl e po pandisi in maniere sclete e braurose. Dome une Regjon che e rispiete lis sôs lenghis e po clamâsi pardabon une Regjon europeane”.
Si trate di fat di un tesaur in tiermins di specialitât e di competitivitât. Ancje parcè che i vantaçs di chel “Friul difarent” che si distache di chel ortodossamentri talian a son tancj, a partî de marce in plui che il plurilinguisim al po regalâ ai nestris zovins che a àn la possibilitât di imparâ plui lenghis, par rivâ a ducj i leams che si podaressin imbastî cu lis altris Regjons di Europe in gracie di cheste nestre identitât multilengâl. Ma la reson fondamentâl par fevelâ furlan al è che al è nestri: “e je la lenghe che plui dispès mi capite di sintî dongje dal talian. E une lenghe ancjemò fuarte tal pandi une identitât. Al covente tignîle di cont”. ✒ Antonella Lanfrit
