IL FERÂL. Universitât furlane: frignâ o cjapâ sù un racli

Chest àn si ricuardin i 35 agns de istituzion uficiâl de Universitât dal Friûl. Mi pâr interessant tornâ a lei ce che pre Antoni al scriveve l’an prime, dopo de racuelte des firmis e cuant che la leç si inmaneave. Al è un piçul tocut di storie e di clime che si viveve in chei agns. Come simpri no mancje la scletece e francjece di pinsîr e cence filet te lenghe dal pre Antoni ancjemò zovin plevan in Cjargne.
pre Roman Michelotti
Comel, cun chê sô fate di gjesuit lât lai, al someave che al vaìs di contentece cuant che il so paron Andreot al à spampanat, cun intono a la grande, ce che la Italie a veve savût fâ par chei cuatri macacos di Furlans. Par cualchi muart e cuatri claps, nus davin une autostrade, une ferade cun cuatri sinis, une mont sbusade fûr par fûr, 2.500 miliarts in cinc agns e une universitât!
I nestris «onorevui» (che onôr no ‘nd àn di vendint gran) a puedin stâ contents: o vin la universitât a Udin in gracie lôr. Sì, parcè che chê che a vevin domandât i furlans in 125.000 no je chê li, ma chê altre. Lôr nus dan chê che no fâs concorince a Triest. Anzit, par che Triest no se vedi par mâl, a rinfuarcin ancje la sô universitât. Si trate di cagneris («facoltà di scienze statistiche e attuariali, scuola superiore internazionale di fisica e matematica applicata, riconoscimento delle scuole interpreti e traduttori, riconoscimento del collegio del mondo unito, organizzazione dell’area per la ricerca scientifica e tecnologica), a preference di ce che nus dan a nô: lingue moderne e dell’Europa orientale, ingegneria ecologica e aziendale, scienze agrarie e dell’alimentazione. Trê facoltâts di nuie par nô e a Triest la zonte in plui di dutis chês facoltâts che a vevin prime.
In parlament no je ancjemò passade la leç, ma nol larà vie trop che e passarà a pat che i Furlans no si decidin une buine volte che e je ore di finîle di vaî e di porconâ te ostarie o sot la nape e che bisugne tornâ a cjapâ in man forcjis e palis e parâsi. Un popul, prin di murî, al à di tentâlis dutis, se al vûl murî almancul di om e no di coion.
O sin in plui di mieç milion e il nestri vôt al vâl. I politics dal arc a san che il curtìs lu vin nô almancul ogni cuatri-cinc agns. L’an che al ven a son lis regjonâls e democristians e comuniscj e socialiscj a san che se la int si ingomee, e je finide par lôr. Par chest al è cumò il moment di dâsi dongje ducj chei che a àn a cûr l’avignî dal Friûl. Se no nus dan cumò la universitât che nus covente e che, sacrement!, si meretìn, no le varìn mai plui e mai altri. Al è il moment di fâur pôre ai politics, di dîur in muse che, se a àn il coragjo di presentânus une universitât schifose come che nus e àn preparade, ju fasìn cori cu la forcje, dal prin al ultin. Si podaressin fâ nons, ma nol covente. Ducj a san che Tonut al à la bocje plui grande dal çurviel; che Toròs al à fat lâ in vacje la mozion dal clero dal ’67 par taponâ lis porcariis dal so partît catolic; che Berzanti al è imparintât cui plul grancj mangjons triestins; che Bressani, (cul so omonim galopin de curie, capelan de DC) nol à fat redenzie pal Friûl; che Comel si sbore di nô; che il Messagjero Venit al è tignût sù di une manie di int vendude a la mafie democristiane.
Ma no podaressino salvâsi cui cumuniscj? Cul onorevul Colombe, cun Baracêt e compagns? Ma lôr a àn altris problemis plui impuartants e no puedin pierdisi daûr cuistions di prestigjo, di nainis di cjampanîl e cetera. Lôr a son universâi: dal Cile a la Spagne. Ce ur interessie dal Friûl?
O sin dacuardi cul sfuei che al à mandât fûr il Comitât pe Universitât Furlane: Se il parlament nol ricognossarà il dirit sacrosant dai furlans di vê une universitât vere, nus tocjarà poiâ a plen, pes prossimis regjonâls e politichis, la liste furlane autonomiste. Che al vûl dî che i nestris vergognôs di parlamentârs e di conseîrs regjonâi no rapresentin il popul. E alore, fûr!
Patrie dal Friûl n. 4-5 dal 1977o par fâsi ridi ma nuie di plui”.
pre Antoni Beline