FRIÛL EUROPE. Tal mês di Lui ancje la Cravuazie e jentrarà te Union Europeane dopo dîs agns

A tacâ dal prin di Lui i Stâts de Union Europeane a saran vincjevot. Di in chê volte la Cravuazie e jentrarà inte Union e si sierarà il percors inviât in maniere formâl cu la domande di adesion fate indenant de republiche ex jugoslave ai 21 di Fevrâr 2003, cul ricognossiment dal so status di Paîs candidât ai 20 di Avrîl dal 2004 e cul Tratât di adesion firmât ai 8 di Dicembar dal 2011.
Il gnûf slargjament de UE al è il spieli des contradizions che a tocjin il procès di integrazion europeane in chescj ultins agns. Di une bande la jentrade inte UE de Cravuazie e mostre che la Union in tiermins concrets e la idee de unitât europeane a àn ancjemò atrat e, in cualchi maniere, fuarce. In chest sens un bon segnâl al è stât propit il sucès dal referendum dai 22 di Zenâr dal an passât, cuant che passe il 67% dai citadins cravuâts che a jerin lâts a votâ a vevin dit di sì ae Union, cun dut che la situazion economiche e politiche de “Europe dai 27” e fos za marcade de crisi.
Di chê altre al è propit il rivoc di cheste clime chel che si sint in chest gnûf slargjament. Al baste pensâ al fat che a chel referendum a jerin lâts a votâ nancje la metât dai cravuâts (dome il 44%): un probleme de UE, de Cravuazie o de democrazie partecipative in gjenerâl? Par no fevelâ des dificoltâts che il Tratât di adesion al à cjatât te sô ratifiche de bande di chei altris Stâts, a tacâ de Slovenie, che il so ategjament in cont de jentrade de Cravuazie inte UE al è stât condizionât a fuart des cuistions ancjemò viertis tra i doi confinants: prin di dut lis codis dal faliment de Ljubljanska Banka. Cun di plui, ancje la Gjermanie si à cjapade i siei timps e il vôt a pro de bande dal Bundestag al è rivât dome ai 17 di Mai stâts. Al contrari la Italie e à vût an ategjament positîf, ancje se – si podarès dî – un pôc “a talian vie”, stant che si à fevelât di “jentrade de Cravuazie in Europe” (Parcè? Jerie su Marte?) o di “anession” ae UE, nancje che a fossin tornâts chei des “tieris irendentis”.
Pal Friûl e par Triest chest slargjament al vierç gnovis prospetivis di colaborazion, scambi e disvilup. Simpri che no sedin dome afârs par cualchidun e dosis di retoriche par chei altris. ❚
✒ Marco Stolfo