SPECIÂL SAPADE. Plodn tal pantan dal Parlament Talian

“Ich bin ein Plodar”. Parafrasant Kennedy, intun so storic discors te capitâl de Gjermanie dividude, probabilmentri ancje lôr a scomençaressin cussì la lôr poie ae cause. Un jutori bipartisan, in ordin sparniçât: dal president de provincie di Udin, Pieri Fontanin, di altris leghiscj dal Nordest in gjenerâl (dal ex president dal Consei F-VJ Maurizio Franz al segretari provinciâl di Belun, Diego Vello), dal conseîr regjonâl de regjon Venit (de Federazion di çampe) Pierangelo Pettenò, dal ex conseîr Udc, il triestin Edoardo Sasco, dal ex parlamentâr Ferruccio Saro, che al jere stât daûr ae vicende cuant che al jere sentât a Rome sui scagns dal Pdl. La parade dai ex: “O sin ducj sapadins”, cence fufignis. Il probleme, achì, al è che la fufigne le àn fate lôr stes, chel sisteme che o cognossìn ben de politiche, che al rispuint ae logjiche dal rimandâ, dal “no je la prioritât in chest moment”, dal cambi dal guvier e de fin de legjislature (cuant che ce che al jere stât fat al ven ribaltât tant che une fertaie, se no ancje dismenteât). Tant piês: l’iter de leç ordenarie che e puartave Sapade in Friûl si è fermât pe conclusion de legjislature, che e determine il colâ di ducj i proviodiments in at. Dut di tornâ a fâ, almancul par ce che si riferìs al “bocon” roman.
E cussì, ancje la cuistion di Sapade che e semeave che e deventàs furlane di une dì a chê altre e je colade in dismentie. Fin cuant che une butade (o batude) dal gnûf vicepresident de zonte regjonâl, Sergio Bolzonello, une falope rimangjade tal zîr di 24 oris, e à vût il merit di rinfrescjâ il probleme. Nol è un mâl che nol sedi ancje un ben.

Bolzonello al fâs une declarazion ai microfons Rai. E il so cjandit: “Sapade? E pues restâ in Venit”, al scjadene un burlaç propit cuant che la politiche, par sô abitudin e costituzion, e sta par jentrâ te fase balneâr che e scomence par solit dopo la aprovazion dal sestament di belanç. Bot e sclop, a plovin lis reazions. E cuntun iter che al varès di jessi concludût di un pieç, dant acet aministratîf a Sapade in Friûl, si pues imagjinâ il parcè. Si che duncje, il stes assessôr pordenonês (nomenât, tra l’altri, par vê clamade fûr la sô citât de aree furlanofone) al à subit coret il tîr, scjafoiant sul nassi il suspiet di une ciert “niet” de gnove Zonte Serracchiani ae cjosse in cuistion: “No je une oposizion de Regjon – al à declarât e confermât ancje a nô, Bolzonello -. Nô o saressin ben contents di dâi acet a cualsisedi comunitât che e vueli vignî in Friûl Vignesie Julie, ma a àn di jessi lis cundizions juridichis. Chest al è un pont. No je une contrarietât, te maniere plui assolude. O vuei jessi clâr: i passaçs a son chei juridics, duncje se dut al larà a bon fin, sperìn che Sapade e jentri. Diviersementri, nol è che si puedi fâ altri: nol è che jo o puedi lâ di là, cjapâle e puartâle di ca cu la fuarce”. “Al è il stes câs di Cint – al zonte il vicepresident -, e di ducj chei comuns dal Venit che a fasin part de diocesi di Concuardie-Pordenon, che e je une diocesi uniche. Se cualchi comun al volès tornâ in Friûl o saressin ben contents di chest, però no scugnìn ni jessi contraris ni acelerâ. Si trate di jessi corets: lis robis a àn di fâ il lôr cors, nô o sin achì”.
***
Sc Iter lent
Ma lafè sì, ce lentece chest iter. La roture e je stade segnade di un referendum pal passaç. Al puarte la date dai 9 e 10 di Març dal 2008. A àn votât “sì” in 860 sapadins, ven a stâi il 95% (al seç a son stâts 903 eletôrs, il 75,3% di chei che a vevin il dirit). Tal Jugn dal 2012, il consei dal Venit al veve dât acet ae unanimitât a une mozion e a une risoluzion che a impegnavin la Zonte Zaia a intervignî sul Parlament par dâi une sburtade al procediment legjislatîf. Stesse robe a àn fat il Consei regjonâl dal FVJ e la provincie di Udin. Parê positîf ancje de Provincie di Belum. E jere pronte ancje la leç nazionâl, che se e ves vude la aprovazion in timps juscj e sierave il dossier. Invezit no. Invezit e je finide la legjislature, sedi chê taliane che chê regjonâl. E Sapade e je finide intun limbo istituzionâl: un crosere fate di scjadincis naturâls (e no) di ents di guvier e di lassisim de classe politiche che e veve di dâ rispueste al “sì” di Sapade/Plodn. “O vevin bielzà pronte la propueste di leç. Cumò a ’nt sarà imbastide une altre – al spieghe Danilo Quinz, puartevôs dal Comitât par Sapade in FVJ – e o contìn che dentri de legjislature la cuistion si puedi sierâ, cussì come che i citadins a àn domandât a gran vôs”.
***
Palaç Belgrât
A domandâ clarece di ategjament ae Regjon al è il president de Provincie di Udin, Pieri Fontanin, di simpri sostignidôr dal passaç tal so teritori di competence. Par Palaç Belgrât, il rispiet dal risultât referendari al ven prin di dut. “Si à di dâ continuazion ae volontât popolâr esprimude in maniere clare: si trate di une responsabilitât che dutis lis istituzions, a diviers nivei, a àn di cjapâsi sù”, si lei intune note. Il consei dal ent di mieç si jere za impegnât cuntun ordin dal dì par tignî sù dutis lis iniziativis e a intervignî in dutis lis sedis oportunis doprant chei imprescj a disposizion par realizâ cheste agregazion. Fontanin al spieghe che la “peculiâr colocazion gjeografiche di Sapade e impliche che il so naturâl disvilup socioeconomic si placi logjichementri te aree dal sisteme Cjargne – Val dal Dean; dal rest la interie aree cjargnele che e confine cun Sapade e fâs riferiment a chest paîs tant che vetôr di tîr dal pont di viste turistic. Duncje, une agregazion di Sapade ae provincie di Udin e larès a favorî ancjemò di plui il disvilup di un teritori, la Cjargne, che al sta traviersant cetancj disasis, e e podarès ancje sburtâ il svilup turistic di dute la Val dal Dean”.
Il moviment e la mozion de Patrie
Su la cuistion Sapade, il Moviment Cinc Stelis nol à mai fât savê une sô posizion. E pense “La Patrie” a stiçâ lis boris, clamant al telefon il conseîr regjonâl Cristian Sergo, di Palme. “Alore, che al scolti… mmmm… viodìn… cheste e je une cuistion che jo no savarès disi, cumò… Chi al è un discors plui gjenerâl che al va fat cui grups dal Venit, di Belum e de Cjargne. Chi te Basse, no savarès, no ’nt vin mai tratât. Fasìn cussì. Mi informi e o verifichi se e je une posizion za cjapade e i fâs savê”.
E passe mieze ore. E Sergo al torne a clamâ. “La cuistion e je fûr dal nestri program semplicementri par vie che Sapade za e varès di jessi in Friûl! E pal stes motîf de cuistion no vin mai fevelât tes nestris riunions. Par nô, cun chest percors za avanzât, e je une robe scontade”. Po il conseîr M5S al zonte: “Chi o vin fatôrs storics e religjôs: il paîs al fâs part de diocesi di Udin, e si è simpri sintût Friûl. Po dopo, nô o zontìn une motivazion turistiche. Il moviment al ponte cetant sul turisim e sedi di chest pont di viste, che di chel economic, Promotur za di agns e à metût dentri chel centri di schi te sô ufierte. Po dopo, al è za un vôt dal Consei e … ve ca ce che i pues anticipâ. O stin valutant se intervignî cuntune mozion”. Une mozion? E par di plui daspò di une domande di sclariment su la vuestre posizion? “O stin valutant se movisi a nivel regjonâl o nazionâl. Tal prin câs, e je nestre intenzion impegnâ la gnove presidente a fâsi sintî a Rome par che e deti une acelerazion al procès”. Se e larà cussì, un merit lu varà ancje il nestri gjornâl. Friaul über alles.
***
Diplomazie al lavôr
I sherpa diplomatics a son za al lavôr. Tant in Venit che in Friûl, il pressing no si ferme. Ai 27 di Jugn, il gnûf president dal Consei de regjon Franco Iacop al à dât acet a une delegazion dal Comitât Civic pal passaç di Sapade al FVJ (i puartevôs Danilo Quinz e Riccardo Breusa e il segretari Alessandro Mauro), e cun chê e à fat il pont de situazion. Cun lôr al jere apont ancje l’ex conseîr Edoardo Sasco, che te legjislature passade al presentà une mozion a pro dal passaç, mozion che l’emicicli di plaçâl Oberdan al votà a largje maiorance. Iacop – ricuardant che il percors par chest obietîf al jere stât inviât ancjemò dôs legjislaturis za fa cuant che al jere Assessôr aes autonomis locâls, sot dal governadôr Illy – al à rimarcât che il pronunciâsi dal Consei regjonâl al è stât esplicit e si è impegnât a informâ la Zonte des solecitazions dal Comitât. La vie ordenarie e domande une gnove propueste di leç, che di Sapade a fassin savê che e je za pronte. Ma al coventarà ancje cualchi parlamentâr disponibil a puartâle a Rome. In Friûl si fâs il non de senatore Pd Isabella De Monte.
Dîs dîs prime, il stes Comitât si jere cjatât cui responsabii de Leghe di Belum, il segretari provinciâl, Diego Vello, e il vicesegretari Andrea Rusalem e la senatore Raffaela Bellot, che e àn pandût interès a tornâ a presentâ la leç ordenarie pal passaç. Vallo al à ribadît il concet di “autodeterminazion dai popui”, teme cjâr ae Leghe. Par chest, al à ricuardât: “la sielte fate dai sapadins e varà di jessi rispietade. E al sarà nestri impegn continuâ a poiâ ogni azion che e puarti a tiermin il cambi di regjon”.
Cussì Sapade. Ma di Cint? L’ultin paîs de provincie di Vignesie prime di rivâ in Friûl al è intune vuate ancjemò piês. Cuntun referendum, tal 2006, il 65% dai votants al domandave il passaç a Pordenon. Duncje, cambi di Regjon. Ai 7 di Setembar dal 2011, un risoluzion te Regjon Venit a prime firme dal assessôr Daniele Stival (de Leghe Nord, resident tra l’altri tal vicin comun di Pramaiôr) al impegnave la Zonte Zaia a metisi in vore in Parlament pal passaç. Dibatiment in Aule e, ancje in chest câs, la poie e je stade bipartisan. Ma si è pierdude a Rome. E cumò che il sindic di Cint al è colât, cu lis dimissions di mieç consei comunâl, e che al rive dongje un comissari pe ordenarie aministrazion, la vicende e sarà ancjemò plui grivie. ❚
Oscar Puntel