Chei siet galantoms che no son plui cun noaltris

Cuissà ce che a disaressin se in dì di vuê a fossin ancjemò in vite chei oms di spessôr uman e inteletuâl che si clamavin Antonio Bellina, Pietro Londero, Giuseppe Marchetti, Tarcisio Petracco, Francesco Placereani, Fausto Schiavi, Tiziano Tessitori, tal viodi in ce stâts che al è il ridot il Friûl, chê tiere che i àn vût dât tancj agns de lôr vite. Sicu vêrs galantoms furlans, a àn vût scombatût pal popul furlan cence vê torneconts personâi (l’unic che al jentrà tal Parlament talian al fo Tessitori, ma la sô intenzion principâl e jere chê di puartâ la nestre vôs a Rome; e Schiavi che al le cul stes intindiment in Consei regjonâl a Triest). La lôr grande sperance e jere chê di lassâ un Friûl unît ma autonom; cu la lenghe furlane ricognossude dal stât talian, libare di condizionaments, e finanziât il so insegnament tes scuelis. A varessin volût lassâ aes gnovis gjenerazions un Friûl moderni, competitîf, inovatîf, indulà che i puescj di vore a saressin lâts prime di dut ae nestre int. A crodevin tal resuriment culturâl dal popul intîr, des feminis, dai oms, ma soredut dai zovins furlans. Vonde cjapâ sù valîs par lâ a vore tal forest! Vonde cjapâ sù valîs par lâ a studiâ ator pe Italie! La inteligjence de nestre int e meretave il sacrifici inteletuâl di ducj lôr. Ducj lôr a àn amât cheste tiere plui di chel che cheste tiere ju à amâts lôr. Diviers furlans, tantis voltis, no capissin che cui che si bat par lôr, lu fâs dome pal lôr ben, pal ben di ducj i furlans.
L’inzegnîr Fausto Schiavi al sarès une vore avilît tal viodi che in cheste stagjon politiche, indulà che a son sparîts ducj i partîs talians storics, si va simpri plui pierdint tai elets cui vôts dai furlans il sens di apartignince ae nestre identitât di popul. Schiavi, in cûr so, al varès sperât che, a planc a planc, i furlans a varessin cjapât simpri plui cussience che, pal lôr progrès, al sarès stât fondamentâl vê un partît autonomist furlan, sicu chês altris regjons a statût speciâl. Invezit, o sin tornâts indaûr: lis fuarcis politichis e i ambients nemîs de identitât furlane si son metûts ducj di acuardi par anulânus, par sfracaiânus, par distirpânus, par fâ di noaltris puare int cence anime, int che no sa ni ce che e je, ni ce che e vûl. Tante confusion sparniçade ator in maniere sientifiche par confondinus, par dividinus e par scunînus.
Ancje Toni, Pieri, Bepo e Checo a saressin une vore imbilâts a viodi i tancj bastons che a cirin di meti jenfri lis ruedis dal cjaruç de lenghe furlane e che a tentin in dutis lis manieris di fâle deventâ un dai tancj dialets talians. Che cheste e sedi la strade che la politiche, movude di Rome e ben sburtade di Triest, e puarte indenant, no son dubis. Baste cjalâ lis declarazions che cualchi setemane indaûr al à vudis fatis ae stampe il diretôr de Sissa di Triest (une des tantis istituzions regaladis a Triest cu la leç de ricostruzion dal Friûl taramotât!), indulà che al à vût ripetût “le tre università giuliane”, intindint meti dentri chê furlane di Udin.
Il professôr Petracco al varès corût subit in tipografie e al varès jemplât il Friûl di manifestins par denunziâ a dute la int ce che a stan fasint parsot lis fuarcis (triestinis) nemiis de autonomie de universitât, volude di passe 125 mil furlans! Di bon che chei de Universitât dal Friûl a san il fat lôr e no lassin che Triest nus meti i pîts sul cjâf, e a van indenant cu lis colaborazions cu lis universitâts di Trent e Verone e cu la internazionalizazion dal nestri ateneu cu lis universitâts di Klagenfurt, Graz, Lubiane, lis inglesis Lancaster, Bath, St. Andrew, Birmingham e Londre, la australiane Swinburne, lis canadesis Ottawa e Windsor. E ancje in fat di ricercje e inovazion, Udin e je tra lis miôr de Italie. Ma bisugne che i furlans a stedin simpri cu lis orelis spiçadis, pronts a berghelâ se alc al ves di sclopâ!
Ancje il senatôr Tessitori al saltarès sù a viodi dutis lis propuestis di fusions che a intindaressin puartâ indenant par anulâ lis lidrîs de nestre int, a scomençâ cu la abolizion des trê provinciis furlanis, cu la abolizion e la fusion di tancj paîs furlans, des aziendis sanitariis, des aziendis des cjasis popolârs, des comunitâts montanis e di tancj altris organisims furlans. Taiâ dut in Friûl e puartâ dut a Triest! Une robone infame. A aprofitin dal moment economichementri dificil, cui puescj di vore che ogni dì che e passe a calin di numar, par fâ i lôr interès cuintri chei dai furlans.
Tocje ameti che chei siet galantoms nus mancjin. Cence di lôr, la grande part dai furlans e je cence ponts fers di riferiment: ducj noaltris si cjatìn plui puars e plui debii. In sumis, o sin intune fase delicade e pericolose. O vin di stâ unîts, di stâ in vuaite e denunziâ lis robis che a vegnin fatis cuintri il nestri popul. E, se al covente, o vin di tignîsi pronts ancje a lâ in place a protestâ. ❚
Roberto Meroi