Come ogni Istât a rivin Avostanis

Puntuâls, tant che la Vierte e la Sierade, a rivin Avostanis, un apontament zaromai fûr di pupîl, tratant che o sin a la edizion numar 22.
Ogni an a presentin un fîl condutôr par resonâ intor a la culture, par riscjâ propuestis, par proponi alc di “diferent” rispiet a altris manifestazions dal teritori. Nol è facil, ma Federico Rossi e la sô scuadre a àn savût in ducj chescj agns creâ aspetativis e apaiâ, il plui da lis voltis, lis curiositâts culturâls dai tancj che a àn frecuentât il curtîl e la lobie dai Colonos di Vilecjasse. E, come simpri, o varìn, in plui di une melting pot (messedance) une sorte di boiling pot, une pignate che e bol. A dî, dongje da la frescjece e origjinalitât dai ticiaments culturâi che a saborin riflessions, o vin lis colaborazions e lis sinergjiis cun altris realtâts culturâls. Al è il câs dal teatri comic furlan di Claudio Moretti, metût intune disfide cun chel calabrês. Ce vignaraial fûr?
Il probleme da lis minorancis linguistichis al jentre intune traduzion par furlan, fate di Carlo Tolazzi, di “L’ùali di Diu”, une tragjedie scrite di Miklos Hubay. Une disfide ancje cheste, ma ancje une prove, che no coventave, che dutis lis lenghis a podin vê valence culturâl e artistiche. E, in plui, e je une denuncie che la pierdite da lis lenghis “piçulis” e je une “tragjedie” ireparabil pal patrimoni culturâl e storic di dute l’umanitât. Tai confronts dal regjist ongjarês il Friûl al à, par chest, un grues debit di ricognossince.
Tal cartelon no podeve mancjâ une riflession sul moment storic, sociâl e economic che o sin daûr a vivi. Tacant di un pinsîr di Einstein: di une crisi si po gjavâ oportunitâts par batile, par vignîi fûr.
A scombataran su chestis prospetivis, intune sorte di lote tra benandants, Sergio Cecotti e Franco Fabbro: ideis su lis teoriis da la catastrofe o gambiament radicâl di paradigmis? Starìn a sintî.
Po, e al è un biel colp cognossint la autore, e sarà la presentazion dal’ultin libri di poesiis di Ida Vallerugo, destinade, cun merit, ancje jê a rivâ i sucès di Pierluigi Cappello.
No mancjaran i laboratoris artistics cun ritrats digjitâi par grancj e piçui, la musiche a sbreghebalon cu la companie dai bandarots, la premiazion dal romanç “In trê riis”, mostris cun materiâl “fragjil, anzit resistent”, esperiencis “scuasit siums” par vignî fûr da la crisi, un viaç ta lis danzis e cjantis da la vilote furlane.
Come simpri, il cartelon al previôt la “top star”, la presince di Philippe Daverio. Il professôr-critic al provarà a proferî soluzions par vignî fûr di cheste crisi dai modei sociâi e economics in chest moment di gambiaments epocâi. Vie par lis etis ogni gjenerazion e à vût di frontâ lis sôs disfidis, lis sôs crisis e, ancje mediant da la creativitât, a àn rivât a vincilis.
Un cartelon cun 13 apontaments, dai 29 di Lui ai 10 di Setembar, che, tal intindiment dal so diretôr artistic, a varessin di sghindâ il pericul di colâ tal banâl o tai lûcs comuns.
Insom, nus pâr di rimarcâ che cundut che la fuarpe regjonâl e vedi sbridinât vie i finanziaments, cun ce che e i reste, la Associazion i Colonos e je rivade a meti dongje un program svariât, ticiôs, di atualitât e di propuestis culturâls pardabon buinis. ❚
✒ Gotart Mitri