Lidrîs cuadrade di crisi, ven a stâi il “Cecotti & Fabbro-pinsîr” par frontâ chest moment storic

Ducj a pensin che la miôr situazion pussibile in nature, inte societât, in economie e inte politiche e sedi l’ecuilibri. E la “crisi”, il moment di instabilitât che o stin vivint, e je dome la violazion di chest ecuilibri. Ducj si iludin duncje che prin o dopo dut al tornarà a puest, parcè che la condizion che o crodìn plui naturâl e je la armonie. Chest resonament al è deventât pe culture ocidentâl un “paradigme”, une di chês ideis dominantis che a son duris a murî parcè che a deventin clâfs par podê lei dute une classe di fenomens in maniere logjiche e razionâl. Dut câs no simpri un paradigme al resist ae confutazion.
Intun biel incuintri li dai Colonos te suaze di Avostanis Sergio Cecotti e Franc Fari a àn provât a dimostrâ che la crisi no je dome une situazion di grant disecuilibri, ma ancje une ocasion par tornâ a dissegnâ la nestre maniere di cjalâ il mont. E lu àn fat ancje ribaltant dal dut la prospetive. Cecotti di fat al à dimostrât che il “paradigme dal ecuilibri” nol è realistic, e lu à fat doprant une metafore sientifiche che plui furlane no si pues, il “teoreme de pignate”: ven a stâi che cuant che o scjaldìn une cite, la sô temperature e crès. E somee une ovietât, ma no ducj i cuarps tal univers si scjaldin cuant che si ur zonte energjie. Cecotti al à fevelât di un câs dulà che chest nol sucêt: lis busis neris. Alì il cjamp di gravitazion al è cussì penç che al glot dute la materie e la energjie che i capitin dongje, ma – al à dimostrât Stephen Hawking – cence mai cressi di temperature.
Al baste un câs cussì par sdrumâ secui di conclusions masse sveltis. Al dimostre di fat che “la condizion plui naturâl no je chê dal ecuilibri – al à rivât a concludi Cecotti – ma la normalitât e je la crisi, e duncje l’ecuilibri al è dome une ecezion”. Al covente duncje cambiâ il nestri mût di pensâ: l’ecuilibri nol è par fuarce ni stabil, ni positîf, ni necessari, e lis robis no tornin a puest di bessolis. Al covente doprâ vueli di comedon, e vivi e lavorâ “cul cûr cussient di cui che al vîf dome dentri de storie”, al à dit citant Pasolini. Il destin, insome, si drece cul fâ e no cul spietâ: e la nature, la vite e la storie a son fatis di ponts di roture, no di ricomposizion. Ancje se la situazion e somee chê di une transizion continue che no puarte di nissune bande (come in chescj ultims 20 agns), no par chest bisugne “fâ di mancul di cirî di vivi une vite eroiche” al à dit Franc Fari. “Ancje se il mont al somee sburtâ di une altre bande, al covente tignî a ments che il mût di vivi tradizionâl de int furlane fat di virtûts come la voie di lavorâ e la onestât nol à di jessi bandonât intal non de furberie e de frode, de vanitât e dal egoisim. Une vite eroiche e je chê – al à spiegât – di chei che no passin il timp che a àn a disposizion tant che indurmidîts, lacchè o paiazos”. Situazions che di solit a son une vore stabilis: “la stabilitât e fruce la vite” al à dit Cecotti, “la crisi e puarte dolôr ma – al à dit citant il “teoreme di Strizzolo” – nol è mai un mâl che nol sedi un ben”. L’ecuilibri al puarte viers la stasi e viers la muart, che e je la condizion di ecuilibri perfet e mai plui alterabil: invezit la crisi e je vite, magari fadie e marum, ma vite.
Pal nestri mont al è automatic considerâ inevitabil un ciert numar di catastrofis, ma cence la roture dai ecuilibris no je evoluzion, nol è progrès: “no par chest dutis lis crisis a son buinis”, al à zontât Cecotti, ma al reste il fat che “vivi al vûl dî preparâsi a la crisi di doman, parcè che une volte comedade une situazion al rivarà simpri un gnûf tiron a crevâ la tele che o vin imbastide”. La conclusion dal sindic-fisic e va daûr di une famose massime di Platon: “dome i muarts a àn viodût la fin de vuere”, e cussì “dome i muarts a àn viodût la fin de crisi”. Par chest, cuant che nus fevelin di riprese par cunvincinus che dut al sta par metisi in sest e par lâ viers il miôr, al covente visâsi che dome lis azions concretis che ognidun al puarte indevant a puedin dâ la misure dal sô “vivi eroic”. E bandonâsi aes previsions profetichis nol zove: lis cronachis dal avignî no son inmò possibilis. “Nus pues judâ dome la distribuzion des probabilitâts – al à sierât il sienziât Cecotti – ven a stâi cjalâ ce che seont lis informazions che o vin al podarès sucedi intun periodi avonde lunc tal timp”. Ma nol è cussì facil, e lis previsions “interessadis” no comedin lis crisis, ma parfin a rivin a discjadenâlis. ❚
Walter Tomada