SLOVENIE. Revisionisim storic tal aniversari dai ‘domobranci’, ricuardâts a Rovte

Ai 25 di Avost stâts, a Rovte, paisut dongje di Logatec in Slovenie, si è tignude la celebrazion pal 70esin aniversari de fondazion des trupis dai ”domobranci” (”vuardians de patrie”) che, dilunc de seconde vuere mondiâl, a àn zurade fedeltât ae Grande Gjermanie “cuintri il comunisim, pe proprie patrie intune Europe libare”. Avigniment chest che – tant che l’an passât a Šentjošt, cuant che al è stât celebrât il setantesim aniversari de costituzion des vuardiis contadinis che lis fuarcis ocupantis talianis a àn incuadrât, daspò, intal ambit de Milizie volontarie anticomuniste e che di li a nasserin intal 1943 i domobranci – nol à mancjât di discjadenâ tantis polemichis e ancje une cuintrimanifestazion dongje di un monument ai muarts dilunc te Resistence. Soredut chest an, par vie de presince tant che oratôr di une figure istituzionâl slovene di ponte, val a dî l’ex prin ministri e leader dal maiôr partît di oposizion SDS (partît democratic sloven) Janez Janša.
Chel de organizazion “Slovensko domobranstvo” e dal rûl che e à zuiât dilunc de seconde vuere mondiâl, a son di fat argoments che continuin a dividi la opinion publiche. Tancj a van indevant a calcolâ i domobranci – par vie de lôr sielte di colaborâ cul invasôr todesc – traditôrs nazionâi, ma a cressin simpri di plui ancje i sfuarçs di assegnâur un rûl storic diviers. Al è cui che ju met sul stes plan di chei che a àn lotât cuintri il nazisim e fassisim, calcolantju tant che opositôrs valorôs e vitimis dal comunisim, che si son in realtât batûts pe proprie patrie.
Chest il test dal zurament recitât dai domobranci, in presince dal gjenerâl de SS Erwin Rösener, di chel che al jere il sorestant de glesie catoliche slovene Georgij Rožman e de vuide e fondadôr dai domobranci Leon Rupnik, intal stadi principâl di Lubiane ai 20 di Avrîl dal 1944, dì dal cincuantesim cuint complean di Adolf Hitler: ”O zuri devant di Diu Onipotent, di jessi fedêl, coragjôs, di ubidî ai miei superiôrs, e di compî i miei dovês inte lote comune cu lis fuarcis armadis todescjis, comandadis de vuide de Grande Gjermanie, cu lis trupis SS e cu la polizie cuintri i bandîts, il comunisim e i siei aleâts, pe mê patrie slovene, part di une Europe libare. In cheste lote o soi disponût a sacrificâ ancje la mê stesse vite. E che Diu mi assisti!”.
Il zurament al è stât ripetût ancje ai 30 di Zenâr dal 1945, intal vincjesim aniversari che a jerin lâts al podê i naziscj in Gjermanie.
Tra chei che a àn cirût, intai agns, di justificâ lis peraulis dal test dal zurament, ancje France Cukjati – po dopo deventât president dal parlament sloven – che, intal 2002, al à let il zurament dai domobranci dilunc di une sentade parlamentâr dedicade ae discussion de leç su lis tombis militârs. Secont Cukjati, i domobranci no varessin zurât fedeltât e ubidience a Hitler e ae SS, ma ai propris superiôrs, cun di plui il lôr obietîf declarât al jere la difese de patrie tant che part di une Europe libare. Tra lis argomentazions plui frecuentis e je ancje la tesi che il zurament al sarès a Diu e no a Hitler, o che al sedi stât prestât dome in aparence, scuindint i fins reâi dai domobranci.
In chest contest, al larès duncje citât ancje cualchi passaç dal intervent dal gjenerâl de SS Rösener inte dì dal prin zurament dai domobranci: ”Ai 24 di Setembar dal 1943 o ai dât l’ordin pe istituzion dal Slovensko domobranstvo (…) Di chês piçulis trupis di legjonaris clamâts ”biancogardisti” al è nassût cussì su gno ordin il Slovensko domobranstvo (…). Cul jutori dal Grant Reich todesc, us vin formâts, vistîts e armâts (…)”. E ancjemò: ”Vuê o vês zurât di combati cul esercit todesc, cu lis SS e la polizie par une Europe libare e nete”.
A scjaldâ ancjemò di plui il clime in Slovenie su chest argoment al à contribuît in maniere decisive il stes Janša cul so intervent ae cerimonie a Rovte. Il leader di SDS, pûr rimarcant cemût che a meretin rispiet ducj chei che si son oponûts al fassisim, al nazionalsocialisim e al comunisim (a Rovte si celebrave intal stes timp ancje la zornade europeane dedicade aes vitimis di ducj i regjims totalitaris e autoritaris), al à segnât intai comuniscj slovens i responsabii de vuere civîl dilunc dal secont conflit mondiâl. Secont Janša, i comuniscj slovens, ”dopo vê colaborât par doi agns sedi cun Stalin che cun Hitler, a son deventâts aversaris dai todescs par podê rivâ al podê, che no saressin mai rivâts a otignî midiant di elezions libaris”.
L’ex prin ministri al à definît il comunisim e il nazionalsocialisim tant che i doi grancj mâi dal vincjesim secul, zontant però che il nazionalsocialisim si è ispirât al marxisim e al comunisim. ”Il gjenocidi al è une invenzion dal marxisim. Cent agns prime di Hitler, al è stât propri Marx a condanâ ae eliminazion la nestre e chês altris popolazions slavis”. Janša al à zontât che la division tra il ben e il mâl vuê no consist inte lote tra domobranci e partesans, ma tra i simbui dal comunisim e dal stât sloven.
Al pâr dal dut palês, duncje, che lis tensions ideologjichis dal passât in Slovenie a sedin dut altri che passadis. Un ciert revisionisim storic, cussì come i acjadiments des ultimis setemanis, si metin intun clime di scuintri eterni fra lis parts politichis, che cence fal a puartin a celebrazions storichis dal dut oponudis tra di lôr. Al semee duncje clâr che in Slovenie, in mût simil a chel che al sucêt in Italie, al sarà dificil podê costruî in timps curts une memorie condividude dal periodi storic che plui di ogni altri al à savoltade la storie contemporanie de Europe. ❚
✒ Tjaša Gruden