Une pagjine goliardiche, ma che covente par pandi alc di plui seri

Cul gnûf an, La Patrie dal Friûl e à inviât la sô pagjine Facebook. Un imprest par difondi il gjornâl, ma ancje par incuintrâ e dialogâ cui letôrs e cu la int che e frecuente il social network. E cussì al capite di incuintrâ cualchi realtât interessante…
Il non al sarà un tic volgarut, ma cun su par ju 6500 “like”, la pagjine Facebook “Brute di muse, biele di buse” e je une des plui viodudis dal social network che i plâs di plui ai talians (e ai furlans). La formule e je semplice: fotos e vignetis umoristichis, mûts di dî par furlan, link di notiziis dal Friûl, cualchi “status” cun domandis o provocazions. Pe plui part fats in marilenghe, come lis rispuestis ai letôrs che al dà il gjestôr, che o vin intervistât.
–––
Mandi “brute”, o forsit o varès di dî “brut”: cui sêstu, ce fâstu?
O soi Pieri (nol vûl meti il cognom, n.d.r.) di Udin, o ai 22 agns e o studi leç a Triest.
–––
La tô pagjine mi pâr che e ven fûr de esperience di une atre par furlan: “A vûl bighe e no cjavei”, isal cussì?
Vere: par un periodi o soi stât un dai aministradôrs di “A vûl bighe e no cjavei” (che o jerin plui di 20), ma mi soi stufât parcè la pagjne e je discjadude: masse tetis e cûi e masse politiche tratade in maniere superficiâl e partesane. O ai sielzût il non “Brute di muse, biele di buse” propite par vie dal sucès di “A vûl bighe”. Il non al è un tic volgarut, ma a ‘nt volevi un che al atiràs la atenzion e al fasès fâ une ridade, ancje se i post che o publichìn no son tant volgârs. O dopri il plurâl parchè che dentri de pagjine o sin in 5, jo e altris 4 (3 de provincie di Udin e une di Gurize), che mi dan une man, massime cuant che o soi vie.
–––
Trop timp ae la tô pagjine e in trop timp atu tirât sù passe 6000 adesions?
La pagjine la ai fondade il 6 di Avrîl di chest an, duncje o vin une medie di 50 “mi plâs” in dì (se no ai sbaliât i conts).
–––
Cemût selezionistu lis batudis o i link? Cuâl aial vût plui sucès?
Tantis voltis no fâs altri che cjapâ alc che mi plâs e voltâlu par furlan, altris voltis a son invenzions “origjinâls”. Di sigûr il post che al à vût plui sucès al è stât la cjartute de Europe viodude dai furlans; o vevi viodût un post simil “l’Europa vista da un veneto”, e o ai dite: “fasìn une cjartute ancje par nô furlans!”. O vuei precisâ che chel post alì, come ducj i miei post, no vuelin jessi ofensîfs viers di nissun, ma dome spiritôs o matarans.
–––
A viodi la pagjine, tu tu sês sensibil a lis problematichis dal Friûl, isal cussì?
O ai inviade la pagjne propit par vie che o volevi creâ un pont dulà incuintrâsi su internet pai furlans, cence colôr politic (une regole e je “no politiche!”): un cjanton par fâ dôs ridadis, ma ancje ogni tant par cjapâ cussince dai argoments impuartants pal Friûl, soredut la tutele de lenghe. Insome: cu lis monadis di ridi si otegnin i “mi plâs”, cussì che dopo, vint une base avonde largje di personis che ti seguissin, si puedin frontâ ancje argoments plui seris.
–––
Ce idee ti sêstu fat dai furlans, cjalâts di Facebook?
Propite viodint i coments de int (6500 personis ti dan une idee avonde clare de societât furlane di vuè) o ai gjavât fûr cualchi conclusion: 1) tancj furlans, soredut zovins, a àn voie di vê une identitât furlane e di fevelâ par furlan, plui di ce che si crôt; insome no je vere che no ur interesse 2) in tancj i tegnin a la tutele de lenghe e al insegnament a scuele, ancje se nol mancje mai cualchi “bastian contrari”. La mê impression e je che sui media locâi si da masse impuartance aes posizions anti-furlanis e pocje a chês pro-Friûl, che a son la plui part.
–––
No tu scrivis malon par furlan, dulà âstu imparât?
Jo o soi di marilenghe taliane. Il furlan lu ai imparât a scuele, al Stellini di Udin, in gracie dai compagns di classe che a vignivin dai paîs. A scrivilu, ancje se no ben a scuare ma purpûr avonde ben, o ai imparât di bessôl, leint libris in marilenghe (in particolâr “Prime di sere” di Sgorlon) e altris publicazions (come “Alc&cè” o lis pagjinis in marilenghe dal “Messaggero Veneto” e de “La Vita Cattolica”).
–––
A part la tô, cualis sono lis miôr pagjinis/profîi dai furlans su Facebook?
Di sigûr o met la vuestre “La Patrie dal Friûl”, che e à simpri biei articui e bielis fotos. Purtrop, ancje se ben struturade e pensade, no rive a vê ce tancj fans come la mê: par chest, come che o disevi prime, o ai adotât la politiche de “anime goliardiche”, cussì ti ven daûr la int. Il stes motîf parcè che “Natale in India” al tire sù plui bêçs di un film impegnât…
–––
Daûr de tô esperience, il furlan funzionial duncje ancje su internet?
Al funzione benon: tantis voltis miôr che no chel fevelât! Di fat a son in tancj (soredut zovins) che si interessin al furlan o lu stan imparant, ma che no olsin tabaiâlu in public par pôre di dî strambolots; une categorie di personis che e je largje, e pûr no fevelant e à gust di scrivi par furlan. Jo o cognòs diviers di lôr che no olsin cjacarâ par furlan, ma che su Facebook o vie sms mi scrivin simpri in marilenghe! In definitive, di sigûr Internet e Facebook a àn fat dome dal ben al furlan e, o torni a dîlu, massime tra i zovins. ❚
✒ Dree Venier