Luca Manfè e il frico che al à concuistade la Americhe

Cui lu varessial mai dit. Al è partît 10 agns fa dal so paîs – cu la bandiere dal Friûl te valîs – par cirî fortune. E vuê al torne in prime pagjine… cul frico.
Luca Manfè, 32 agns, di Davian, al è il gnûf MasterChef Usa. Ven a stâi, al è il vincidôr dal spetacul di cusine plui famôs dal mont: je à fate, passant lis selezions tra sessante mil concorints e batint vincj cogos no professioniscj inte trasmission condusude dai cetant sevêrs judiçs Gordon Ramsay, Joe Bastianich e Graham Elliot. Il plat che lu à puartât dret ae finâl? Il frico, just. La Patrie dal Friûl e à tignût par chest zovin furlan che al à puartât adalt la nestre cusine intai Stâts Unîts. Vuê Manfè, dopo vê incassât 250 mil euros e vê preparât un libri di ricetis a so non, al à un obietîf: vierzi un ristorant di cusine furlane a New York, dulà che al vîf. Tant par scomençâ, al à incassât une poie che e conte: Joe Bastianich, l’imprenditôr italoamerican che al à a pene viert il ristorant e B&B Orsone a Cividât (la mari Lidia e je nassude a Pola), al à dit di lui «o pensi che Luca al sedi un bon puartebandiere de cusine e de culture furlane intal mont». Intant Manfè nol piert timp e al organize avigniments di show cooking (www.lucamanfe.com) dulà che al fâs meti ai americans il grumâl Friûlpoint “Make frico not war”. Se no je promozion turistiche cheste!
Lu vin contatât vie Skype e ve ce che nus à contât (cuntun acent che – o sigurìn – plui davianot di cussì no si pues!).
Intant congratulazions di bande de Patrie! Prime curiositât: varessistu mai pensât di puartâ il frico in prime serade in tv?
«In realtât no je stade une mosse premeditade, ma plui che altri istintive: inte prove o vevi a disposizion un ingredient e cun chest o vevi di preparâ il plat che o vevi miôr. L’ingredient al jere il formadi (ancje se nol jere il Montâs) e il frico e je stade propit la prime robe in assolût che mi è vignude iniment. Lu ai rivisitât, servintlu insiemit cun involtins di vidiel cun formadi e salvie, fats sù inte panzete: cun chel plat o ai passade la selezion e o soi rivât in finâl».
Cemût lu fasistu tu il frico?
«Cu lis cevolis e lis patatis. O fâs dislidi la cevole, o zonti lis patatis crudis gratadis, e po dopo o amalgami une cuantitât compagne di Montâs fresc e vieri. La ricete e je chê imparade a cjase di mê mari Bruna e e sarà publicade intal gno libri, dutune cun altris ricetis furlanis».
Une mosse perfete di marketing teritoriâl…
«In efiets, cuant che o ai savût di jessi rivât in finâl, mi soi rindût cont che al sarès stât un biel colp ancje pe nestre regjon, une ocasion impuartante par fâle cognossi tal forest».
E cumò tu vuelis vierzi un locâl di cusine furlane intal Grant Miluç. A ce pensavistu in particolâr?
«Un dai miei progjets al è di lâ indevant a puartâ alt il non dal Friûl intal mont e di deventâ, un pôc tant che Joe Bastianich, ambassadôr de nestre cusine in Americhe».
Secont te, isal un gjenar di cusine che e pues plasê ai americans?
«Sigûr di sì. I americans si apassionaran ai plats de nestre tradizion. Cun di plui, la cusine furlane no je cognossude, e je une ufierte gnove sul marcjât: o soi sigûr che a saran contents di cognossi une gnove regjon».
Ce volaressistu intal menù dal locâl dal to siums?
«I gnocs di spinaze cun scuete fumade, il muset cu la broade, il frico e lis fritulis di mê none Anita. Grancj vins furlans e un mobil di len plen di sgnapis nostranis, cuntun lambic antîc in biele mostre. Mi plasarès un ambient che al ricuardi une des nestris ostariis, cun len, modons e trâfs a viste, di cumbinâ cuntune atmosfere zovine e dinamiche. E inovazion ancje in cusine, rispietant la tradizion».
Ce ti mancjal plui di dut dal Friûl?
«La famee, i amîs, la mont che o viôt dal zardin di cjase mê e un bon tai».
Ti tegnistu inzornât su chel che al sucêt chi?
«Ciert. O lei simpri i cuotidians in linie e o soi tant atîf cui miei familiârs, e cui zovins che o soi cressût, che cun lôr o ai mantignût un leam tant stret. Al gno matrimoni in New Jersey, par esempli, e jere une caravane di davianots! E dopo… o lei simpri La Patrie dal Friûl, che o soi abonât!». ❚
Natascia Gargano