Friûl tiere di pâs (?)

Timp di crisi, ma no par ducj. Cjalant cierts cjapitui di spese, al somearès che cualchidun se passedi miôr. Il riferiment al è ae spese militâr, nostrane ma no dome. Dopo la colade dal mûr di Berlin tal 1989, al someave che la fin da cuintriposizion dai blocs militârs e ideologjics e varès vût di vierzi une gnove ete, indulà che il nemì nol esisteve plui. A distance di cuasi 25 agns, nol somearès cussì. La Costituzion taliane, tal articul 11 e à zontât che si pues lâ ator pal mont a difindi i interès nostrans, a discrezion dal Parlament; o vin un esercit di professioniscj che a mantegnin la “pâs” ator pal mont cu la sclope, e che a fasin lambicâ i politics ogni sîs mês par cjatâ fûr i bêçs par paiâju; dôs puarteavions; di resint un impegn bipartisan (PDL+PD) par comprâ novanteun F35 dai Stâts Unîts, par tredis miliarts; doi sotmarins de Gjermanie, siet miliarts par fâ sù dodis gnovis nâfs di patuliament. Ultime, cjariesute su la torte, la notizie dal rinovament di avions des Frecis Tricolôrs: “dome” 100 milions di dolars di invistiment. Se o vessin di meti suntun liste i zeros des cifris, a ’nt saressin tancj. Come che in tancj a son convintons de utilitât di ducj chescj mieçs, par dâi cuintri al terorisim, aes minacis, ma cence savê par ciert cui che al è il nemì. Magari dismenteant che un terorist si môf cence sunâ trombis. Il discors al è cetant articolât e al meretarès un numar monografic su La Patrie par jessi disberdeât par ben. La cuistion e je sì economiche, ma ancje politiche, etiche, sociâl e di vison future: un che al à une sclope in cjase prin o dopo le doprarà.
Par cuistion di spazi, o fasarai un struc, une fotografie de cuistion su doi ponts che nus son tant dongje: Davian e la za citade PAN di Rivolt. Tal prin câs, bisugne dî che i timps di une societât licuide a valin par ducj. Pôcs agns indaûr si fevelave di une riduzion de base americane in regjon, par podê continuâ il slargjament NATO viers est, coinvolzint paîs dal ex bloc di Varsavie. La crisi in Medi Orient e tal Nord Afriche e à savoltât chestis tindincis. Il stivâl talian al somee propit just par jessi une base naturâl pal control di chestis zonis cjaldis. Cussì, la base di Davian no si è ridusude e, anzit, e je stade potenziade cu la zonte rinfuarçade di chê di Vicence, cul trasferiment de Gjermanie dai parecjadutiscj americans. Dutis lis incursions su la Libie e sui Balcans a partivin di chenti. Davian – no stin a dismenteâsi – al è ancje dipuesit di cirche une sessantine di bombis atomichis che a son presintis sul nestri teritori, ancje se i talians – par dôs voltis – a àn dite che no vuelin il nucleâr. Ma i militârs, come simpri, a son un cjapitul a part; se dopo a son americans ancjemò miôr: bastarès visâsi la storie juridiche dal Cermis. Davian e je dome la spice di un iceberg.

Provait a imagjinâsi tropis basis che a son in Italie di pertinence direte o indirete sot la bandiere a stelis e strissis… Cent e tredis (113)! Cinc dome in Friûl. No son pocjis, par un paîs che si pant “sovran”. Forsit dome la Gjermanie e à cussì tancj impegns cui americans, e no crôt che al sedi un câs.
La cuistion des Frecis, forsit, e je mancul macroscopiche ma no mancul direte. Par tancj, justificade de necessitât di mantignî alt l’onôr de bandiere a trê colôrs, dismenteant – e chi si tocjisi cun Davian – che ce che al ven invistît in chei zugatui alì, a son risorsis gjavadis al rest, un rest che si volte in servizis di ogni sorte, de scuele, ae sanitât, dai pompîrs ae polizie. Te nestre storie furlane lis servitûts militârs a son simpri stadis un dai grops che a impedivin un svilup economic e comerciâl, une vocazion naturâl par une tiere di confin, ma danazion pal stes motîf. La mozion dal clericât dal 1967 e fevelave clâr in chest sens. Vuê nol è compagn di îr, dut câs lis risorsis gjavadis al vivi ben de int no podin vê justificazions, no cuant che si viôt une crisi come chê chi che e riscje di fâ partî in curt une vuere tra puars, ignorant il grant bûs che al glot tancj bêçs. Imprescj che – al è il câs di dîlu, intune societât che spes e evoche i siei valôrs cristians – a son pensâts pe muart. Cussì, ator o sint a fevelâ dal scandul dai bêçs al furlan (di intindi tant che culture), dai imigrâts che a àn di stâ a cjase lôr; di chê altre bande, o pues scrupulâ che se doman la PAN e ves di fâ une manifestazion, in tancj a saressin presints a batiur lis mans… ❚
Mauro Della Schiava