Il lat di chenti, tra marcjât complicât e ideis gnovis

“O voi a cjoli il pan e il lat”, si diseve une volte par dî che si lave a fâ la spese di corse. E pal lat,  tant che pal pan, pal sâl, o pai ûfs, nol coventave stâ a spiegâsi miôr: une volte dit trop – se mieç litri, un litri o plui -, al massim la sielte e jere tra lat fresc e lat a lungje conservazion – chel marcjât cu la sigle U.H.T., mancul saurît ma plui comut se si à pôre di no doprâlu subit e di straçâlu –.
In dì di vuê, invezit, la facende e je deventade un grum plui complicade: la evoluzion de tecnologjie alimentâr e, massime, lis inchiestis di marcjât voludis dal marketing, a àn jemplât i nestris negozis di un grum di sielte di mil variants dal stes prodot, par contentâ dutis lis esigjencis pussibilis. Il sâl si cjate normâl, jodât, o in coloradis varietâts esotichis; i ûfs a son marcâts par categoriis daûr di cemût che a vivin lis gjalinis, e il bancon dal lat si è slargjât par fâ puest a cincuante cualitâts e in diferentis confezions, de plastiche, al tetra pack, al veri.
Lat fresc e lat a lungje conservazion, ma ancje chel intîr e chel sbrumât, chel fresc di cualitât superiôr e chel a alte digjeribilitât, plui o mancul “depurât” di chê o chê altre proteine che a cualchidun i reste sul stomi. Fin a robis pardabon stranis, tant che il lat “rinfuarçât” cun altris sostancis nutritivis: chel plui stramp al è cui famôs “omega 3”, che a saressin elements gras che par solit si cjatin tal pes. Par no nomenâ dut il mont complicât – une vere sagre di vitaminis e sâi minerâi zontâts – dal lat specific pe alimentazion dai fruts piçui.
Une varietât che, par sigûr, a à i siei aspiets positîfs, se e jude il consumadôr a comprâ un prodot che al sedi just par se o plui comut di doprâ. Ma – di chê altre bande – dute cheste sience un tic e fâs pensâ a cuale che e sedi la divignince di chest prodot fondamentâl.
In timps li che si sta tornant a preseâ la idee dal “km 0”, vâl a dî prodots di divignince plui sigure e cence masse coscj ancje ambientâi di traspuart, e che za a nassin cuntune scjadince avonde curte, no si pues no considerâ che dute cheste ricercje sientifiche par “tornâ a inventâsi” un prodot che al pararès banâl – e di presi dut câs limitât – e impliche par fuarce grancj laboratoris di ricercje sul prodot e su la sô comercializazion, e une rêt di distribuzion une vore grande e articolade. Un model di svilup industriâl, in altris peraulis, che al va intune direzion dal dut diferente di chê de nestre tradizion locâl, dulà che la filiere dal lat e jere une vore curte: de stale ae taule, passant in pratiche dome pe latarie dal paîs o dal comprensori.
Par sigûr, tai ultins agns, lis cronichis nus àn contât di un marcjât dal lat, locâl e nazionâl, avonde complicât, cun tindincis di consum da la int, modis pompadis de publicitât e ricercje di cualitât che si instrecin cuntune grande voie di inovazion imprenditoriâl, ma ancje – purtrop – cun storiis no masse educativis di speculazions a diviers nivei.
I gjornâi nus àn contât dal scandul de plui grande marcje di lat dal Paîs, la Parmalat, prime considerade une ecelence nazionâl e che po dopo si è palesade tant che un grant pastiel finanziari, dreçât in estremis, juste in timp par jessi vendût ai francês di Lactalis. E nus àn contât de cuistion imberdeade des “cuotis lat”, un vêr davoi cun vacjis fantasimis, etolitris di lat abusîf, cualchi produtôr ruvinât e cualchi altri masse furp, e une multone di pôre pes sachetis di ducj i talians di bande de Comunitât Europeane.
E, par restâ plui dongje, o sintìn ogni doi par trê lis lagnancis sacrisantis dai nestris piçui arlevadôrs, ridots in miserie di introits che no stan ni in cîl ni in tiere. Che, se no fos une tragjedie, e somearès une barzalete, savê che par un litri di lat che nô o paìn in negozi ancje un euro e mieç, al paron de vacje i rivin sì e no 35 centesims, se al va ben….
Cussì come che o vin savût che nol è tant de situazion critiche di precarietât dai lavoradôrs des nestris Latariis Furlanis, in dificoltât par colpe de crisi dal marcjât; ma ancje de storiate des iregolaritâts tai controi di cualitât che chest Istât a àn fat tribulâ la Cospalat, e al tocjarà spietâ il tribunâl par viodi cemût che e larà a finîle.
Ma se dutis chestis storiis a lassin il consumadôr avonde interdet, almancul chi in Friûl cualchi segnâl un cimi plui consolant al reste. Prime di dut, la presince simpri plui capilâr dai negozis gjestîts dai nestris consorzis di produtôrs locâi, che simpri plui dispès si stan organizant par proponi in maniere direte al consumadôr no dome il lôr lat fresc – ancje a presit plui convenient, cence dut chel tirepare di marketing ator -, ma che a son ancje daûr a provâ a diversificâ la lôr ufierte, metint dongje dal lat ancje scuete, spongje, jogurt e cualitâts diferentis di formadi a “km 0”, tornant di fat a riscuvierzi il model di chê che une volte e jere la vendite de latarie. Forsit dome un tic tornade a inventâ in maniere plui moderne, par esempli metint un lat crût fresc furlanon te opzion tecnologjiche dal distributôr automatic a gjetons. Par vê il savôr di stale a dutis lis oris, ancje tal cûr de citât. ❚
✒ Margherita Timeus