Il patrimoni dal cjant spontanii furlan, contât di pre ‘Sef Cjargnel

Intes nestris plêfs di mont al è custodît un patrimoni storic inestimabil. Cjants antigons sorevivûts tai secui in gracie dal popul furlan. O fevelìn dal cjant patriarcjin, aquileiês, o “a la vecje”: ven a stâi, cjants liturgjics che a tornin indaûr al Patriarcjât di Aquilee e che a son rivâts oralmentri fin a nô, di pari in fi, passant pes glesiis dal Friûl. Cjants che vuê a vivin dome in cualchi isule gloriose che ju à conservâts. Pre Josef Cjargnel, di Remanzâs, ma di tant timp plevan di Guart (Davâr), cincuante agns indaûr al à cjapât sù un regjistradôr e al è lât ator pes cjasis a tirâ sù ce che al cjatave, massime dopo che al è rivât in Cjargne, dulà che la tradizion e jere inmò vive. Risultât? Une racuelte, forsit la plui impuartante de musiche liturgjiche furlane, che si cjate intal libri “Cjant patriarcjin de tradizion orâl”, publicât de associazion Glesie Furlane (inzornament di “Canti sacri aquileiesi della tradizione orale”). Lis melodiis patriarcjinis si puedin ancje scoltâ tal cd dopli “Cjantis di glesie dal Popul furlan”, repertori adat a compagnâ lis celebrazions di dut l’an, cjantât dal Coro “Rosas di Mont”, che Pre Josef al è diretôr.
____
Pre ‘Sef, ce aial discuviert cul so lavôr?
“Jo no ai scuviert nuie, par dîle vere. Chescj a jerin i cjants che si cjantavin in dutis lis glesiis fin ai agns ’60, prime de riforme dal Consei Vatican II: di chê volte indenant, a son jentradis lis lenghis vivis al puest dal latin e, ca di nô, la lenghe sielzude e je stade il talian. O vin cussì butât in aghe une tradizion nobil di secui e secui indaûr. Melodiis che la int si tramandave a vive vôs, par mieç di un grup di cjantôrs, che a jerin in ogni paîs. Une sorte di coleç deputât e ricognossût, depositari di une tradizion cuntune valence religjose liturgjiche, doprade massime a Pasche, Nadâl e pai Muarts. Cuant che al stave colant dut chest, jo o ai scomençade la mê ricercje, e infin o vin publicât un volum cun pre Pellegrino Ernetti, il grant scuvierzidôr di cheste particolaritât dai cjants di Aquilee”.
___
Cuale ise la specificitât dal cjant patriarcjin?
“Il cjant patriarcjin al à un caratar dongje dal gregorian; tantis di chestis melodiis a jerin su base modâl e no tonâl, come la musiche moderne. A jerin melodiis che si prestavin a jessi compagnadis a plui vôs in maniere spontanie, in particolâr compagnadis a tiercis paralelis. Cualchi volte, adiriture, a cuartis e cuintis consecutivis. La ritmiche no jere chê moderne dal ritmi misurât, ma e veve un ritmi libar, un pôc come il gregorian. Une musiche duncje profondementri religjose e cetant spirituâl che e rapresente une individualitât specifiche nestre: cuant che tu cjatis chei cjants alì, tu sâs dal moment che apartegnin a chê comunitât alì”.
___
Cuale ise la origjin dal cjant di Aquilee?
“Il cjant aquileiês al ven fûr di tradizions antigonis. Aquilee e jere une des plui grandis metropolis cristianis dai prins secui de Glesie e e veve madurît un rît propri, cui cjants pai salms, pe messe, e v.i. Cuant che Carli il Grant al à volût unî dute la Europe sot il so imperi, cul Sacri roman imperi de nazion gjermaniche, al à imponût une liturgjie uniche, ven a stâi chê romane, e al à dât il compit de unificazion a Sant Paulin di Aquilee. Ma la int e à continuât a cjantâ chei cjants achì, tant che alc al è rivât fin a nô: chest al è dimostrât de unitât stilistiche e di tocs de Istrie fintremai a Como. E no parcè che a son stâts scrits, ma dome tramandâts a vive vôs. Cheste tradizion e jere tant fuarte che i cjantôrs di glesie le tramandavin di pari in fi. Adiriture a Zoppè di Cjadovri un al à otignût la pussibilitât di cjantâ une lezion di Setemane Sante in Glesie di un altri, regalantji un cjar di fen e, a 1.500 metris, al è come il pan di mangjâ! Chest par dî trop che la int e jere tacade al cjant aquileiês”.
___
E cumò?
“Cumò cheste tradizion e je colade par pocje presince, pocje autonomie, pôc afiet. Dulà che le doprin ancjemò, i cjants a àn la lôr valence. Nô a Guart ju cjantìn siet voltis ad an e la int i pâr di tornâ a butâsi intune religjon sane, autentiche, nestre. Cun di plui, butant jù la cjase vecje, tancj no san plui dulà fâ sù chê gnove, cun chescj cjants tirâts fûr di sane plante. No si dîs di no fâ jentrâ i cjants gnûfs ma nancje di butâ vie ce che al jere inmò tal cûr de int, chest no. A son trê zonis dulà che si cjante ancjemò il patriarcjin a plen: a Guart, Çurçuvint e Rigulât. Cumò o vin la problematiche di cjantâ par furlan. Nuie di miôr: la lenghe furlane e je tant parint de lenghe latine, tant dongje, plui che no il talian, si pues cjantâ par furlan cu lis vecjis melodiis”.
___
Ise une similitudin jenfri il cjant aquileiês e la vilote?
“Lis vilotis a àn il stes ethos, la stesse poesie musicâl che si sintive cjantâ tes glesiis. Une volte no jerin lis radiutis, la musiche uficiâl si cjantave dome in glesie e lis vilotis si componevin cul stes caratar, cu la stesse maniere di armonizâ, cu lis stessis scjalis musicâls che a àn i cjants patriarcjins. Lis vilotis a son i cjants plui maraveôs che o puartìn ator pal mont: la spiritualitât e la contemplativitât de vilote a son fiis dai cjants patriarcjins”.
___
Cuâl isal il so auguri sul avignî dal cjant patriarcjin?
“O speri che la int e sedi stufe di chel nuie che al è stât metût al puest dai cjants patriarcjins. Chei cjants a vevin dignitât, la int ju cjantave sul seri. Cumò la int no si preste a cjantâ chei cocodè che si cjatin ator. Jo o ai regjistrazions che ti comovin fin aes lagrimis; cumò chest nol sucêt plui”. ❚
✒ Natascia Gargano