SPECIÂL 3 DI AVRÎL. No mûr la idee de autonomie in Cjargne

Come cumò, dîs agns fa, in dute la mont furlane, di Glemone, a Fors, a Tarvis, a Tumieç, si votave pal referendum pe creazion de provincie dal Friûl de Alte. Al jere ai 21 di Març dal 2004: a votâ a son lâts in cuasi 39 mil, poc plui de metât di chei che a vevin dirit. I SÌ a son stâts il 46%, i NO il 54%. La provincie e je saltade, e cun jê ducj i siums de Cjargne di jessi autonome, cussì come che e jere stade ai timps de sô republiche partigjane.
Dîs agns dopo, ce isal cambiât? Dulà sono finîts i autonomiscj che planc a planc a vevin cjareçât chel progjet fintremai a che son rivâts ae storiche votazion? “Forsit purtrop o sin rivâts masse adore cui timps”, al riflet Mario Gollino che, in chê volte, in plui di jessi president dai industriâi de mont, al jere il promotôr dal comitât dal SÌ. “Baste viodi ce che al è sucedût intai ultins agns. L’ultin fat dal Tribunâl al è emblematic, ma al è inutil cumò vaî e lamentâsi… Forsit chê volte no jerin rivâts a spiegâsi ben, e cussì i “podês fuarts” le àn fate francje”.
Di chê esperience a son restats in dì di vuê pardabon in pôcs: cualchidun al è passât a vite miôr, cualchidun al à bandonât il grup, i zovins a son sparîts. Ma Franco D’Orlando nol mole, e dopo jessi stât tal 1995 un dai fondadôrs de Union Autonomiste Alpine – nassude tant che cueste dal Moviment Friûl che in mont al veve vût dôs bandieris mai dismenteadis, vâl a dî Fausto Schiavi e Cornelia Puppini D’Agaro –, in ducj chescj agns al à cirût di mantignî vîf il sium autonomist.
Tal 2005, l’an dopo de delusion pal referendum, propit lui insieme cun altris – Carlo Cimenti, Gianni Gardel, Mario Gollino, Romano Lepre, Renzo Micoli, Umberto Pecol, Claudio Pittin, Daniel Spizzo, Alvise Stefani, Pierumberto Tolazzi – a vevin fondât il Comitât pe provincie de Cjargne, par no dispierdi chel 73% di cjargnei che a vevin votât SÌ.
I prins agns a son stâs une gnove Primevere: e je stade dissegnade la bandiere dal Cjargne, il mestri Giovanni Canciani al à scrit il Carnorum Regio, l’imni de mont. Tancj di chei problemis che vuê a stan fasint danâ la anime ae Cjargne, za chê volte a vignivin metûts sul plat: la aghe puartade vie dai forescj, i eletrodots, la sanitât.
Planc a planc però, devant des rispuestis de politiche che a continuavin a no rivâ, ancje chel moviment al è lât distudantsi. D’Orlando al à provât a jentrâ tes istituzions, al è stât elet a Tumieç in consei comunâl e di là dentri al à bataiât plui e plui voltis: “Nol è facil jessi autonomiscj in dì di vuê, cuant che ducj a disin di jessilu a peraulis ma tai fats dopo no fasin nuie par confermâlu. Di bande nestre, in dutis lis manieris o vin provât a tignî alte la bandiere, cirint di fâ capî a chei che a continuin a jessi sorts che – se o vevin la provincie – cumò il Tribunâl no lu tocjavin, l’Ospedâl nol sarès metût in discussion, su la energjie o varessin vudis lis spalis cuviertis”.
Però cumò a son propit lis provinciis a jessi metudis in discussion e la Regjon lis eliminarà. “E je vere, e propit par chest – al dîs ancjemò D’Orlando – o vin preparât un document che o vin consegnât al assessôr Panontin, dulà che – une volte scanceladis lis provinciis – si riformin lis Autonomiis locâls in maniere clare: la Regjon di une bande si fâs lizere, cuntun consei snel di massim trente personis, che si impegne su lis materiis di rilevance transfrontaliere; po dopo a son di creâ cuatri o cinc ariis omogjeniis, stîl Cjantons de Svuizare: Mont, Udin e dintors, Basse furlane, Pordenonês e Vignesie Julie, dulà che i citadins a votin par elezion direte i lôr rapresentants e cussì si gjestissin stradis, scuelis, oparis publichis cence lâ in concorence. I comuns plui piçui, duncje, ben planc si fondaran di bessôi tra di lôr”.
Altris aministradôrs locâi propit intes setemanis passadis a àn riclamât il concet di autonomie par sburtâ la Regjon a fâsi la sô societât energjetiche sul stamp di chê che si son fats in Trentin o te provincie di Bolzan. Fabio D’Andrea, sindic di Rigulât, Franceschino Barazutti, za sindic ai timps dal taramot e cumò rapresentant dai comitâts de Cjargne, e Luigi Cortolezzis, president de Secab di Paluce, a àn ben spiegât che par evitâ di cjapâle ancjemò tal comedon di Enel e Terna – che no son rivadis a garantî la corint tes cjasis pes neveadis di Zenâr e di Fevrâr –, e je rivade la ore di tacâ a gjestîsi la nestre energjie di bessôi, stant che tra l’altri a ‘nt vin in abondance.
In fin dai conts, ideis in mont a ‘nd è, voie di no molâ il vues ancje, ma – cemût che al dîs Mario Gollino – al coventarès “un alc, cualchidun che al spachi il sisteme e al puarti un tic di aiar gnûf”. ❚
David Zanirato