Professor D’Aronco, batisi pal Friûl e je une fature: si à di sei un pôc «erois», ce pensial?
No mi visi cui che al à scrit «Beâts i paîs che no àn erois»; o crôt Brecht. Tal 1945, tornade la democrazie, nol coventave jessi erois par batisi in politiche; ma un pôc di coraç chel sì, stant che noaltris autonomiscj o sin stâts clamâts titins e fintremai naziscj, e che, tal Lui dal 1947, e je stade ancje butade une bombe tal zardin di cjase Tessitori, il nestri leader. No jerin fats pe politiche fondade sui patizaments e sui compromès, e di fat i cjâfs di partît nus cjalavin cun suspiet.
Nol jere un eroi Antonio Porenzoni, l’autôr dal prin repert di leterature in lenghe furlane che pal moment si à cjatât, il componiment in viers «Piruç myo doç inculurit». Lui al pierdeve timp scrivint poesiis daûr dai ats notarîi…
Eroi no, ciert: se al vûl, poete a timp libar, e poete di meti dentri tra i continuatôrs de liriche «cortese», rindude famose in France e di li in Italie. La sô famee e vignive de Lombardie, daûr dal patriarcje Raimont de Tor. Tai ats si firmave «Antonius de civitate Austria». «Piruz miò doç», de metât dal ‘300, al è cun altris dôs cjançons une piere miliâr de leterature furlane. L’ambient culturâl di chê volte al è chel che o ai tratinât intun contribût su «Studi neolatini e volgari» di Pise tal 1992. Chel altri grant patriarcje dal timp, Bertrant di Saint-Geniés, al vignive di Tolosa, e al jere amì di poetis provençâi. Chi di nô al cirì di imparonâsi dal furlan – al scrîf il so biograf plui atent – , discuvierzint cualchi someance cul ocitan.
Daspò dal Patriarcjât si passe ae dominazion di Vignesie e duncje di furlans e di lenghe furlane si fevele dome sotvie, platâts: la Storie (dai vincidôrs) nus ai fâs dome intuî. Si puedial dî che al è alc che nol è inmò finît nancje in dì di vuê?
Cui che al comande al à simpri il curtìs de bande dal mani. E i nobii furlans, vâl a dî i potents grancj e piçui, in gjenar si adatarin o timp o tart a Vignesie, e par oportunitât o par oportunisim si faserin rispietôs de Serenissime. Indi cjaparin tra l’altri il dialet venit, che e jere la fevele dai siôrs, mentri che al popul i restà il furlan. Ancje vuê, tai centris plui grancj, il venit si perpetue te classe borghese, cuasi par diferenziâsi dai rancs plui bas.
Lui al fo tra i fondadôrs dal Moviment popolâr furlan, che a jerin dentri ancje il senatôr Tessitori e Pasolini. Cui altri jerial aes vuestris riunions, cemût e dulà si fasevino? O ai savût che lui al rivave cu la moto…
La idee dal Moviment popolâr furlan (M.P.F.) – che mal lassi dî – e je stade mê. A aderirin daurman altris, e tra chei Chino Ermacora e Pier Paolo Pasolini, che a sotscriverin il manifest (Zenâr dal 1947). L’an dopo, tal mês di Mai, o vin nomenât president Tessitori (za fondadôr tal Lui dal 1945 de Associazion pe autonomie furlane) e vice president Guido Hugues di Gurize. I plui atîfs a forin in chei agns Aurelio Cantoni, Luigi Ciceri, Piero Marcotti, Etelredo Pascolo, Gaetano Perusini, Ottavio Vidoni, intant che Giuseppe Marchetti, si ben che al fos il nestri protetôr, si ocupà cuasi dome de «Patrie dal Friûl», che – come che o savês ben – dal Fevrâr dal 1946, al scriveve cuasi dute lui. Si cjatavin in gjenar in cjase di un o di chel altri: massime di Pascolo e di Marcotti. No ziravi in moto, ma ben cul motorin (puartât vie a un gno fradi plui grant), e plui dispès in biciclete. In biciclete, di Istât o vin fate cualchi zirade: mi visi une memorabil viers Cividât, cun Marchet, Marchi e Pascolo, naturalmentri ducj in borghês. Te ostarie o disfidarin la parone a segnâ cui che al fos fra di nô il predi in segret, e jê mi mostrà me.
Un dai vuestris al fo Felix Marchi, il fondadôr de nestre riviste. Mi pâr che al sedi une des figuris plui impuartantis ma plui dismenteadis de storie politiche furlaniste resinte…
Marchi al jere un stamp unic, plen di energjie e di vivôr, fer te dedizion al Friûl, disdegnôs cui clips, intransigjent cui aversaris. Il vêr Friûl al jere chel che al veve lui tal cjâf: dome Marchet al rivave, par mût di dî, a domâlu. Al jere un spirt indipendent tant che pôcs. In realtât, tal so concet di autonomie e jere un pocje di anarchie. E se al fo integralist, al fo tal câs par masse amôr pal Friûl. Marchi al jere un che al cjapave sù adesions in maniere eficace, come pûr abonaments e inserzions ae «Patrie»: al rivà cussì a mandâ indenant par un pieç il periodic; o intint dî che al fo in pratiche l’aministradôr. Al tignì tancj contats cui emigrants massime di Americhe, e al istituì une «Fradaie internazionâl dai furlans», cuntune rubriche tal gjornâl: «Doi milions di furlans pal mont». Nol jere maleabil, anzit, ni tenar cun nissun; nol cognosseve lis viis di mieç. Cun lui al jere un continui «braç di fier», e al vinceve simpri, almancul sul moment. Marchet (dut di une altre paste e spessôr) al fo bon di tirânt fûr la bande miôr. Se nol fos stât Marchi, Marchet al varès fat dal sigûr alc altri, ma no la «Patrie». In cont dal M.P.F. – che al veve une aministrazion a part, o miôr cualchi debit – si leve indevant cun piçui ufiertis. Cualchi volte mê mari mi deve i bêçs par spedî circolârs e letaris, che se di no a restavin là. Vint di lâ a Aoste par invît dal president Severino Caveri tal Otubar dal 1947, gno pari mi à imprestât un so biel vistît grîs adat a une manifestazion uficiâl, e o ai fate biele figure. Cualchi aderent al jere vignût in socors pal viaç. No ai mai nomenât cierts di chescj amîs che nus judarin in plui ocasions. O varès gust di vê indiment cun ricognossince almancul i siôrs Crivellini e Pagani (a vevin une drogarie in place XX Settembre), Lidio Trevisan (cuntune buteghe di machinis di scrivi in vie San Francesco), Pietro Vittori (cu la distilarie a Aquilee).
Cun lui, a fondâ La Patrie dal Friûl al fo Josef Marchet; nus puedial contâ ancje di chest grant inteletuâl?
Ancje Marchet al jere un di chei unics: forsi, o cence forsi, il furlan plui eminent dal secul passât. Ind ai fevelât variis voltis: te «Antologia», in «Friuli regione mai nata», tal curâ la riedizion dal so «Friuli: uomini e tempi», te cunvigne che i è stade dedicade a Glemone tal Avrîl dal 2006. Poete, critic, linguist, filolic, studiôs di storie e di art, autôr di contribûts fondamentâi tant che la «Grammatica friulana», «Chiesette votive», «La scultura lignea», la «Cuintristorie dal Friûl», al à mostrât un inzegn multiformi, la origjinalitât des interpretazions, l’anticonformisim des tesis. Ma al reste soredut ancjemò vuê la colone puartante, anzit la fonde dal Friûl che nô o volìn. Pal Friûl si è sacrificât, passant lis gnots lavorant e tignintsi dismot cul cafè. So fradi mi spià che plui di une volte il jet al jere restât fat.
Puedial dînus dôs peraulis su pre Toni Beline, che al cole il tierç aniversari de muart ai 23 di chest mês? Di resint, e je daûr a inviâsi une polemiche par obleâ Glesie Furlane a permeti di tradusi i tescj di pre Toni par talian, robe che e gjavarès ogni sens ae bataie di Beline che al voleve fâ sù un piçul tesaur pal so popul. Covential dome il talian par jessi valorizâts tant che autôrs?
Ancje pre Beline al jere un om ecezionâl. Al jere un predi discomut, che nol veve dûl par cierts coleghis, ma miôr di tancj. Al baste passâ i siei libris. Lis sôs prosis a son sunadis di trombe, che a varessin di dismovi ducj i furlans: cheste maiorance masse cidine, masse umile, masse rassegnade, pronte a domandâ par plasê cuant che inaltrò a ocupin lis autostradis, lis feroviis, i palaçs dal podê. No vin vût plui ni un Tessitori, ni un Marchet, ni un Beline, ni (o zonti) un Placerean. Pre Antoni, tant che ogni scritôr preseabil, al va let tal test origjinâl.
Une des grandis bataiis che a àn viodût finalmentri a vinci il Friûl e je stade chê pe universitât dal Friûl: lui, ce contats vevial cun Petracco e cul grup che al puartà indenant cheste rivendicazion?
Ve ca: a proposit di erois, un di lôr al è stât Tarcisio Petracco, che al à dât dut se stes ae nassite de universitât. «Eroi» lu à clamât il retôr Furio Honsell, e l’arcivescul Battisti al à sostignût: «al è ciert che, cence il prof. Petracco e il Comitât che lui i jere a cjâf, il Friûl nol varès vût la sô universitât. A bastaressin dîs o vincj furlans tant che Tarcisio Petracco par scjassâ il Friûl e par tirâlu sù di une cierte apatie e indiference, che i fâs pierdi la memorie dal so passât gloriôs e lu fâs sotan di un consumisim malsan, che i robe la sô culture, la sô anime plui vere». Jo, se o podès, lu fasarès Beât: par chescj e par altris siei merits, pe limpidece cristaline dal so operâ, pe gjenerositât, pal sacrifici. E pensâ che no i àn nancje dade la lauree «honoris causa».
Tancj oms che si son batûts pe Patrie furlane a vegnin dal Moviment Friûl. Par lui, cui sono i plui rimarchevui?
O ai za vût indiment i plui autorevui: o zonti cumò («last but not least») Fausto Schiavi, che al è di ringraziâ massime lui pe fortune dal Moviment Friûl, nassût tal 1966 (il Moviment popolâr al jere sparît). Purtrop, muart ancje lui prime dal timp, il Moviment Friûl si è tant che poiât, ridusintsi a comitât eletorâl dongje des elezions. Onôr a Fausto Schiavi.
Lui al è stât president onorari de Lega Nord Friuli e po dopo al à rinunciât ae carghe. In curt, che nus disi il parcè de adesion e de jessude de Lega Nord. E cui dai leghiscj aial savût jessi plui eficaç a pet des rivendicazions furlanistis?
Come che o ai spiegât publichementri a so timp, mi semeave che la Lega si fos bemplanchin justade ai partîts, pierdint a man a man il caratar fondamentâl di moviment federalist. Si ben cun agrât a Pietro Fontanini che mi veve clamât ae presidence onorarie, metût lui stes di bande par une dade dai amîs nemîs, mi soi gjavât ancje jo de Lega, stant che al jere restât pôc di furlan te azion politiche. Cumò e je tornade fûr, e mi indalegri cun Fontanini che al è tornât a scombati, che al è un furlan che al dîs cence pôre la sô, e al lavore ben a cjâf de Provincie di Udin e de stesse Lega regjonâl.
Al di là di chescj partîts teritoriâi tant che MF e Lega, cuâl isal un politic che al à savût lavorâ pal Friûl al interni dai partîts talians?
O nomeni dome Tessitori: un vêr politic furlan, tal sens che al è stât un creatôr di politiche, no un politicant adatât al normâl cabotaç. Al è par mert di Tessitori se o vin vude la Regjon: purtrop juliane furlane, e no furlane, come che e veve proponût la Sotcomission de Costituente tal Dicembar dal 1946.
Par sierâ: e il furlanist dal avignî cui saraial?
O speri dome tai zovins. Tal Comitât pe autonomie e il rilanç dal Friûl o vin oms che a valin, e cierts che a valin fintremai une vorone. No si fasin indenant cuissà ce i zovins. O speri dome che tra chei cualchidun al vegni fûr: o vin dibisugne di colaboradôrs disinteressâts, no di aspirants aes carghis. O vin une dibisugne estreme di un gnûf leader.
Dree Venier
Apontaments / Tarcint, Vinars 6 di Setembar aes 18, Presentazion dal libri “Feminis furlanis fuartis” di Erika Adami te terace de Biblioteche Comunâl
Redazion
L’apontament si tignarà doman, Vinars ai 8 di Mai, aes 18, te terace de Biblioteche Comunâl, vie Divisione Julia a Tarcint. La Aministrazion Comunâl di Tarcint cun la Comision de Pari Oportunitât nus invide ae presentazion dal libri di Erika Adami “Feminis furlanis fuartis” che viodarà la partecipazion di une protagoniste dal libri e de […] lei di plui +
L'EDITORIÂL / LETARE AL GNÛF VESCUL. LA LEZION DI AQUILEE NO VA DISMENTEADE
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
L’EDITORIÂL / Letare al gnûf Vescul la lezion di Aquilee no va dismenteade
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin
Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +