La Patrie dal Friûl e je aromai passe di un an che à inviât la sô pagjine Facebook. Un imprest par difondi il gjornâl, ma ancje par incuintrâ e dialogâ cui letôrs e cu la int che e baline pal social network. E cussì al capite di incuintrâ cualchi realtât interessante…
2000 adesions (i “mi piace”) in pôc plui di trê mês, une alte percentuâl di difusion dai contignûts (i “ne parlano”), une partecipazion vivarose de bande dai letôrs: “Mandi amata Carnia” e je la pagjine Facebook a teme Friûl che e à vût la plui grande incressite tai ultins timps. La formule? Une pagjine li che si fasin viodi imagjinis de Cjargne: fotos di epoche o di paisaçs (di une volte o di cumò), cence tancj coments. Lin a viodi cui sono i ideatôrs, cuntune interviste coletive.
✽✽✽
Mandi, …amata Carnia! Cui aministrie la pagjine e cemût ise nassude la idee?
O sin Stefano Giacometti, nassût a Palme, doi fîs, di pari cjargnel e cuntun grant amôr par chê tiere che cumò al vîf e al lavore a Formigine (MO), Maria Teresa Chiussi nassude a Tumieç, doi fîs, che e je a stâ a Dimplan, e Alberto Soravito nassût e che al è a stâ a Liariis di Davâr, fotograf. Ducj insiemit o ministrìn la pagjine cun impegn, cun chel pôc timp che o vin a disposizion, e cun tante sodisfazion.
La pagjine Mandi Amata Carnia e nas di un progjet che Stefano al tacât agns fa in ricuart dal pari Renzo, che nus à lassâts masse adore. Tal imprin al jere un sît web e dopo si è trasferît su Facebook par rivâ a plui int. Il spirt dal progjet al è cirî di pandi, cu lis imagjinis e i suns, i sintiments che une tiere come la Cjargne e je in grât di regalâ a cui che le vîf o che le à vivude in cualsisei mût, in cualsisei moment. Une fotografie de Cjargne e rive adore di stiçâ, in cui che le rimire, vôs, colôrs, ombris lontanis, sgrufuiadis in fonts dal cûr, ma no dismenteadis. Opûr cuant che o leìn alc scrit par cjargnel, nus ven di fâ bocje di ridi ancje cuant che o sin lontans centenârs di chilometris de Cjargne. O volevin fâ sinti ducj a cjase, cu la int che tu âs simpri vût dongje e tu i âs simpri vulût ben, parmîs dai lûcs che lôr a àn simpri batût.
–––
O sês rivâts a tirâ dongje tante int che us jude a meti foto e ricuarts, cognosseviso cualchidun al inizi o sono rivâts dongje cul passeperaule?
Tal imprin a son stadis cjamadis fotos di periodos estîfs e di vacance, imagjinis nestris, fotos scatadis torseonant pe Cjargne. Po dopo, cul lâ dal timp, i “amîs” de pagjine a àn tacât a contribuî lôr al progjet mandant ogni dì materiâl e coments. Determinant al è stât l’apuart di Maria Teresa: in gracie des sôs fotos su la vecje Cjargne la pagjine e à vût un biel sburt, e nus ripuarte ducj a la memorie dai timps lâts. Alberto, invezit, autôr di fotos bielonis, nus ripuarte a la Cjargne di vuê, come che e je, arude, e chest nus plâs une vore.
–––
Ce aial plui sucès: lis foto di epoche, i paisaçs, notiziis…
Dal sigûr lis fotos di une volte a àn plui sucès di ches altris. No par nuie la plui part di chei che nus seguissin a àn une etât jenfri i 34 e i 64 agns, ancje se tai ultins timps o vin un biel 8% di zovins fra i 26 e i 34 e un 5% di visitadôrs di 18 a 24 agns interessantonon. Lis feminis, nancje a dîlu, a son il 54% dal totâl, ma ce volêso fâ… no si pues vê dut!
–––
Mi contaiso di une robe che e à vût sucès e no si spietavis?
Chê robe e je propit “Mandi Amata Carnia”, che je nassude cence pretesis ancje se nus à dât un biel riscuintri. Forsit però dentri di nô o speravin di rivâ al centri dai sentiments, dal cûr, de emozion. Il pandi il ricuart traviers lis imagjinis e cjatâ un cussì bon acet, nus à scaturîts e o ringraziìn pardabon di cûr ducj par chest grant regâl.
–––
Mi someee che la partecipazion par cheste pagjine e testemonei un grant amôr pe Cjargne, che invezit e ven trascurade de istituzions, voaltris ce idee si sêso fats de situazion?
In chest spazi si ocupìn dome di emozions, no fasìn riferiment a nissune cuistion socio-politiche, no sin bogns e dut câs nol è chest che o volìn fâ. Al reste il fat che cui che nus seguìs al pant un profont amôr pe sô tiere e o crôt che chest al vedi di fâ rifleti i cui che al à cierts compits.
–––
O doprais pôc il furlan, o dut câs la variant cjargnele, parcè?
In cont dal furlan, Stiefin al alce lis mans: vie di tant dal Friûl, si cjate miôr cul dialet emilian. Maria Teresa par solit te descrizions e dopre la lenghe taliane parcè che i ven plui naturâl e plui facil. Se al covente o se alc al è dificil di rindi par talian, e dopre il furlan cence fastidis, che dut câs e reste la sô lenghe dai afiets.
–––
Seont voaltris Facebook e i social puedino judâ lis piçulis lenghis?
Dal sigûr! Stiefin di cuant che al è su Facebook al è rivât a rispuindi a cheste interviste cun domandis par furlan cence vê bisugne dal vocabolari. Ancje par Teresa al è util parcè che l’imprest al è sempliç e imediât tant che une cjacarade fra amîs e duncje al devente naturâl esprimisi come che si pense: par furlan, juste apont. Cun cualchi amì che al è lontan jê e comuniche dome par furlan e al è biel.
Mandi a ducj! Maria Teresa, Stefano e Alberto ❚
Dree Venier
