La nestre “cuintristorie” de prime vuere mondiâl memoreade chest an. Une grande tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf. O contìn lis storiis che la retoriche dai Stâts nazionâi no à mai contât. (4e pontade) ✒ Redazion
“Cui che al è fat presonîr al à pecjât cuintri la Patrie, cuintri la Anime e cuintri il Cîl”. Cussì al scriveve, enfatic come simpri, sul “Corriere della Sera” Angelo Rapagneta, miôr cognossût tant che Gabriele D’Annunzio, la vôs plui sfolmenade e mate, che però e interpretave ben lis gnovis diretivis dal Stât Maiôr talian. Che par scuindi la sô incompetence e la matetât dai siei uficiâi, clarementri al faseve colâ dute la colpe di ogni disfate sui soldâts. Tresinte mil presonîrs dismenteâts dome tai cjamps di Mathausen e di Theresienstadt. Contant chei di ducj chei altris cjamps in Stirie, Boemie e Bulgarie, si rive adiriture a sîscent mil soldâts. Cence vê iniment chei che a son sclopâts di frêt e di fadie e di bastonadis inte marce a pît viers chei lûcs di torture. Ducj di dismenteâ, secont la opinion e il dictat dal Stât Maiôr. I pacs di mangjative o di vistîts inviâts des fameis al Comant, a vignivin blocâts e mandâts indaûr, cun parsore lis scritis: “Viva sempre l’Italia, morte all’Austria e a tutte la canaglie tedesche: mascalzoni; viva l’Italia, viva Trieste italiana; a morte le canaglie”. Un at criminâl che nissun altri stât in vuere al à mai fat cuintri i siei soldâts in presonie tal forest. Dal moment che chei soldâts no si meretavin nuie. La lôr colpe? Chê di no jessi muarts. Parcè che no vevin imolade la lôr vite ae bandiere. Fâsi cjapâ presonîrs pai comandants fanatics al voleve dî jessi traditôrs. Purtrop, nissun ploton di esecuzion talian al podeve fâ justizie: e alore, che a crepassin lontan! Cussì, stant aes testemoneancis gjavadis fûr des letaris aes fameis di chei disperâts, daûr di chês rêts che a saressin deventadis cetant plui famosis inte seconde vuere mondiâl, a ’nt murivin di fam e di frêt cincuante, sessante in dì, cence scjas, cence notizie, cence boletins, fotografiis, memoriâi. Ve chi la testemoneance gjavade fûr dal diari di un di lôr: “Cualchi zornade fa, intune barache, vie pe gnot al è muart di frêt e di sfiniments un puar soldât. Nissun si è comovût. I àn platât il cjâf te paie sporcje dal jet e a àn tasût. Cussì almancul chei dongje a podevin mangjâ la sô razion. Dopo trê dîs, la puce di muart e à fat scuvierzi il zûc”. O ancjemò: “Tal cjamp a son busis là che si svuede ogni gjenar di scovace. Aghe nere e pantan, e jenfri chel brût scussis, crodiis, scarts. Un piçul grup di soldâts presonîrs, involuçâts intune cuvierte, i vistîts a sflics, lis scarpis scloteadis e viertis, a son jentrâts dentri chê buse, par cjapâ sù chei scarts, mangjantju come che a fossin un bon gustâ!”. Par lôr e pes lôr fameis no retoriche, ma dome vergogne. Tant che, tornant a cjase, a vuere finide, no àn mighe podût jessi libars! A son stâts puartâts in altris cjamps, cheste volte comandâts dai talians, là che a son stâts interogâts e tratâts tant che disertôrs, cul pericul di jessi fusilâts. Come chei altris disgraciâts, che invezit a forin brincâts sul lûc des operazions militârs, striçâts jenfri une logjiche repressive doprade come strument par obleâ i soldâts a fâsi copâ dal nemì, pluitost che cjapâ lis sclopetadis dai plotons di esecuzion. I tribunâi di vuere a lavorarin cun grande passion. Fin dal principi. Cent mil procès cuintri chei che no si son presentâts ae clamade; tresinte setante mil cuintri i emigrâts tal forest che no son tornâts in Italie, magari par cjoli la sclope e lâ a sbarâ cuintri il lôr paron o chei che lavoravin cun lôr vie pes Gjermaniis. Tresinte cuarante mil soldâts a àn subît un procès par disubidience. Numars che nus contin benon la falsetât di dute la retoriche militâr e militariste che e volarès fânus crodi di soldâts contents di lâ a murî pe patrie! Cuatri mil soldâts a forin fusilâts par “diserzion”, dopo di une sentence emetude di un tribunâl. No si savarà mai il numar (ancjemò plui alt) di chei che a son stâts copâts dal moment sul cjamp, o in trincee, che ur à sbarât un uficiâl, o un carabinîr, dome pal suspiet di no jessi avonde svelts a vignî fûr de trincee. O di chei decimâts, no impuarte se soldâts valorôs o adiriture interventiscj convints o, come che al sucedeve plui dispès, puare int che e sperave dome di viodi finide la vuere par podê tornâ a cjase, ae famee e al lavôr. I lôr nons, come chei dai presonîrs di vuere muarts tal forest, no si cjatin in nissun elenc uficiâl dai muarts talians inte prime vuere mondiâl. Parcè che bisugne dismenteâju. Tant che no fossin mai esistûts. Il libri documentât di Maria Rosa Calderoni, “La fucilazione dell’alpino Ortis” (Mursia), e il maraveôs spetacul “Çurçuvint”, gjavât fûr dai scrits di Carlo Tolazzi e interpretât di Riccardo Maranzana e Massimo Somaglino, nus contin une di chestis tragjediis. Cun inteligjence e passion, a restituissin onôr a chei cuatri furlans: Basilio Matiz di Timau, Giobatta Corradazzi di Fors, Angelo Massaro di Manià, e Silvio Ortis di Paluce. Fusilâts il prin di Lui dal 1916 a Çurçuvint, sparniçant une magle nere ancje sui lôr dissendents, stant che i lôr nevôts no podin nancje fâ domande par jentrâ tai Carabinîrs o te Vuardie di Finance, par chel pecjât origjinâl dai lôr vons! La compagnie alpine che e ocupave la ponte dal mont Celon, dopo une cjarie gjenerosissime par coraç e fuarce di volontât, ai 25 di Jugn si jere refudade di tornâ fûr de postazion, considerant che e sarès stade une stragje spaventose. Par ducj a àn paiât chei cuatri, dopo un procès tignût te piçule glesie di Çurçuvint e une rate di sclopetadis cjapadis tal cjamp parsore il cimitieri dal paîs. Par une Italie che e restave, pai furlans, un paîs mai cognossût, se no pes tassis, la vuere, la jeve militâr; che si visave di lôr dome par cjoli, mai par dâ, stant che par cjatâ di lavorâ a vevin di jessi migrants vie pal mont. Ortis al veve dôs medaiis al valôr militâr: une cjapade in Libie, tal 1912, chê altre al principi de vuere, tal 1915. Un viliac? Un disertôr? Nus pâr propite che viliacs e disertôrs a forin chei che lu àn copât. E in cheste Italie vergognose, nol è nancje pussibil sperâ intune riabilitazion uficiâl dai fusilâts. Daûr l’articul 683 dal codiç di procedure penâl, la domande e à di jessi presentade dal diret interessât! Viva l’Italia. ❚
Angelo Floramo
