MEDITANTLIS TAL SO CÛR. Il passaç di Pasche

Al è rivât ancje chest an il timp di Pasche, un timp di cincuante dîs di fieste che nus ricuarde la peraule di Nietzsche cuant che al dîs che lui al preferissarès viodi i cristians a gjoldi e a cjantâ invezit di cjatâju cu la muse lungje e pronts a sentenziâ.
Pasche e vûl dî «passaç»: passaç dal scûr de gnot a la lûs dal dì, de sclavitût a la libertât, de pôre che ti cope a la resurezion de vite.
Za la biele stagjon nus invide a fâ chest passaç: metìn alore un macetut di violis su la taule di cjase, vierzìn il balcon al soreli e, se nus è permetût, anìn a cjaminâ par un troi di campagne o tal bosc: li, dut nus vise che la vite e florìs. La creazion e rît, e gjolt, e va in amôr. E je cheste la prime Pasche, chê che inte filosofie greghe antighe si sa che e torne di necessitât an par an. Al è vêr: al è il cicli dal eterni tornâ, ma al è ancje un tornâ che al ven a dânus vite.
Cirî di gjoldi dal grant passaç de biele stagion al è za fâ Pasche.
Al è di pôc passât il trê di Avrîl cui festegjaments pal aniversari dal 1077, la date de indipendence dal Friûl. Mi domandi: «Ise Pasche pal nestri popul?». Ma! O dîs di sì e o rispuint di no. Il nestri Friûl al è come i poleçuts di cuant che o jeri frut. Intun recès de legnere la glogje e covave i ûfs; jo o levi cidin a scucuzâ e une biele dì o cjatavi i poleçuts a sgambetâ. Al è chest il popul furlan: poleçuts che a piulin e a sgambetin, intant che l’ucielat al vultuline in cîl par plombâ e sdranâ. Nô o stin scjavaçant il Mâr ros e o cjaminìn viers la Tiere promesse, ma o vin ancjemò dibisugne di fâsi fuarts intai dirits de persone umane e dai popui minoritaris.
La Pasche de glesie e la mê Pasche di predi e di om mi fasin tant pensâ. Di fat, al è facil fâ lis celebrazions dal Tridui di Pasche memoriâl dal passaç di nestri Signôr de muart a la vite; al è tant plui dificil vivi chel misteri grant e trement, tragjic e sflandorôs che se nol reste peât a la vite e a lis tragjediis di vuê al riscje di deventâ une pie ilusion, une devozion o un grant imbroi.
Ducj pues gjoldi de muart e de resurezion tôr di une crôs che e reste un toc di len o daprûf di un ceri che al è dome une cjandele; ma ce tant dure che e je fâ Pasche intes situazions di dolôr e di muart che o vin tor di nô savint, inte fede, che dome riscjant la nestre muart in chê muart, propit de muart e vignarà la vite. E fin culì, o ai avonde ce pensâ, scrutinâ e domandâ perdon par me.
Pier Pauli Pasolini al rimproverave a la glesie propit la incoerence di no vivi il misteri di Pasche e par chest, al diseve, e je destinade a murî: parcè che no riscje di murî a se stesse par salvâ il mont di vuê. O volarès sbaliâ: mi somee che la glesie e cjacare tant di Pasche, ma e reste sierade, no si vierç a un gnûf umanesim e a lis grandis concuistis che a dan anime a la nestre societât; no rive a fâ il passaç, no fâs Pasche.
Intant che o scrîf, un canarin al cjante; pre Antoni di sabide sante ju meteve in glesie a cjantâ dongje dal sepulcri dal Signôr; e jere la vite in compagnie de muart. E je cheste la Pasche: savê che in cualchi maniere, soredut tal dolôr, nuie al larà pierdût: la vite simpri e resurìs. E je cheste la utopie umane e la realtât cristiane. Par chest tocje cjalâ a la biele stagjon, ai poleçuts, a un canarin; tocje simpri tornâ a cjatâ il gust di ridi e di cjantâ. Ancje, forzit, cu lis feridis intes mans e tai pîts, come Crist.
pre Tonin Cjapielâr