ATUALITÂT – Libri vert pe sanitât

Trentecinc pagjinis par fevelâ dal avignî dal sisteme sociosanitari dal Friûl Vignesie Julie: chest l’obietîf dal Libri Vert su la situazion e la cualitât de sanitât publiche di chenti, prontât de Zonte regjonâl, che dentri di cheste Istât e varà di fâ bon il plan pai agns dal 2010 al 2012. Il titul dal document al è «La vite sane te societât responsabile»: te introduzion, l’assessôr ae Sanitât Vladimir Kosic al marche cemût che i ospedâi de regjon a àn simpri sigurât la universalitât dal acès, zontant che al è rivât il moment di cjapâ dentri plui sogjets pussibii par decidi cemût lâ indenant par miorâ lis rispuestis aes esigjencis dai citadins. Par chest a son viertis, fintremai ai 30 di Avrîl, «consultazions publichis» li che professioniscj dal setôr, associazions e ducj i citadins, a puedin inviâ contribûts, sedi midiant il sît internet  www.libroverde.regione.fvg.it, sedi scrivint ae direzion di pueste eletroniche  libroverde@regione.fvg.it, o pûr cuntune letare ae direzion Libro Verde, c/o Agjenzie Regjonâl de Sanitât, vie Pozzuolo 330, 33100 Udin.
Par fevelâ dal gnûf Libri Vert o vin volût sintî la opinion di Guglielmo Pitzalis, miedi responsabil dal Servizi di medisine sociâl dal Dipartiment di prevenzion de Aziende pai servizis sanitaris numar 4 dal Friûl di Mieç.
Dotôr Pitzalis, ce idee si isal fat dal Libri vert su la sanitât regjonâl?
Al è un document che al à dentri cetancj dâts interessants, dut câs al à ancje masse retoriche, biei principis che nissun nol olsarès dineâ, come ecuitât, cualitât, sostignibilitât, responsabilitât, e vie indevant. Tai tredis ponts che si fâs riferiment – une sorte di cjapitui che a tocjin i diviers cantins de sanitât in regjon, tant che lis rêts dai ospedâi e la valorizazion dal personâl – , si cjatin dute une schirie di domandis pe plui part interlocutoriis: su tancj ponts, par gno cont, il Libri vert nol met ben in clâr cence pôre lis cuestions e lis sieltis plui dificilis.
Duncje,ce saressial stât miôr fâ?
Rispuindi in maniere sclete a ciertis domandis come: «Trops puescj di medisine gjenerâl coventino in Friûl?», o ancje: «Ce fasìno dai ospedâi di perifarie?». Par esempli, o crôt che i piçui ospedâi a varessin in primis di stâ daûr aes dibisugnis veris des comunitâts locâls.
Cumò l’assessôr Kosic al à di tirâ dongje i esperts dal setôr e di scoltâju par rivâ aes conclusions a pro dai malâts.
Secont lui, cemût ise la cualitât dal setôr sanitari in Friûl?
O sin a nivei une vore alts; e po o vin personâl che al crôt tal so lavôr e te sanitât publiche.
Di agnorums, lui al sburte pal ûs des lenghis minoritariis tal mont sanitari. Si fevelial di chest cantin tal Libri vert?
Magari cussì no, il document nol fâs peraule di chest aspiet e nancje nol trate la cuestion di cemût svicinâsi ai pazients, cjalant aes lôr culturis e aes lenghis diferentis. Si pues dî che mal spietavi, dut câs o resti convint che une lenghe come il furlan, lenghe dal cûr, e sei impuartantone par fâ sintî miôr il malât, svicinantlu ai miedis e ai infermîrs.
ALESSIO POTOCCO