La Cjargne di Spinotti

Si spetavisi un alc di particolâr, un documentari che al lassàs il segn, che al des la svearine plui che scjaldâ il cûr. Dome il distac che al à un che al è svolât di là dal ocean si pensave che al podès rivâ a contâ une Cjargne che e patìs e che no cate dut e va indenant a cjâf alt, dimostrant in no pocjis ocasions di rivâ a sorprendi. Si spetavisi une pelicule che e rivàs ancje a promovi il teritori sot diviers aspiets, di chel de nature a chê de cusine, dal artesanât al turisim. Ae fin si rive a 90 minûts di un filmât che sì, al è dut ce chi si sin dits… ma forsit no te miôr maniere pussibile.
Tes presentazions de vilie si diseve che l’obietîf di Spinotti al jere di cjapâ di une bande la bielece dal paisaç – e su chest nuie di meti in dubi stant lis cualitâts dal professionist che di mistîr al dirêç la fotografie des plui grandis oparis di Hollywood – e di chê altre i problemis dal spopolâment ma ancje chê dai zovins che a scjampin, dut câs contrastade de int e des realtâts che si stan ritaiant spazis no indiferents, sedi in economie che te societât.
I prins stacs de cineprese no deludin, visions di une tiere salvadie e uniche, dulà che crets, prâts, riui e cjasis a somein piturâts tun cuadri. Po dopo però cuant che tu tachis a scoltâ subit la vôs di politicants a àn fat il lôr timp e a son ancjemò chi a pontificâ…un tic ti ven di remenâti de cjadree.
A ruede just invezit partî dal discors di Damâr, la sô zone industriâl e je stade pardabon la bariere che in chescj ultims dîs agns e je rivade a frenâ un slac definitîf de Cjargne, la plui biele metafore di cemût che lis rivincitis e lis sodisfazions a son pardabon pussibilis. La Eurotech, la Stroili Oro, Gortani e lis sôs cisternis di Inox a son lis pontis di diamant di un grop di impresis che a stan mostrant ce che a san fâ a dut il mont.
Ancje il fat di fâ cjacarâ cui che al à decidût di vignî a stâ in chestis tieris, adiriture a Sauris, molant dut te citât e decidint di meti sù famee tai monts e je une altre metafore di sperance e cuintritindince. Nol rint tante justizie al mont dal artesanât invezi il passaç dal filmât su la farie di Davâr: emozionant il riclam al precedent documentari “La Carnia tace” dal 1980 par meti in lûs cemût che a son cambiâts i timps e cemût che al mancje il cambi gjenerazionâl ma se la economie cjargnele e je rivade a tignî par ducj chescj timps l’agrât al va dât propit aes milante piçulis aziendutis artesanâls che tal lôr piçul a àn savût inovâsi, slargjâ il proprit marcjât in dut il Friûl e garantî lavôr a cui che tes grandis fabrichis nol varès cjatât puest. Biele però subit dopo la storie dai fradis Leita de Val Pesarine che si son metûts in zûc cu la lôr passion comedant i fortepiano e struments musicâi.
Alts e bas ancje sul cjapitul dedicât ae energjìe rinovabile. Al sta dut l’esempli de centraline idroeletriche di Neariis de Secab, sinonim par spiegâ la impuartance di une societât che sfrutant une risorse naturâl dal teritori in maniere resonade, e je rivade a garantî la corint a cjasis e fabrichis de Val de Bût al 50 par cent di mancul di ducj chei altris. Ma subit dopo meti dongje ancje la centrâl a biomassis di Darte, soredimensionade e mâl studiade, che e à prodot plui straçarie che no calôr… par cui che al cognòs la storie di chel implant al risulte un vêr cuintrisens.
Soredut parcè che a metât il documetari al presente une des parts plui coragjosis, chê di denuncie. Come tal câs di cierts edificis o struturis costruidis tant ae grampe cence nissun resonament daûr, magari dome parcè che si vevin contribûts a disposizion. E à reson l’assessôr regjonâl Santoro a dî che forsit e je ore di tacâ a demolî alc.
Il viaç des intervistis fatis di Spinotti al va indevant su cheste strade, esemplis perfets di int vincente, di zovins in gjambe, e subit dongje altris câs di vôs che a podevin benon jessi evitadis.
In sostance, di là de sene de machine che e cor di buride fint a Tumieç, il difiet o la critiche di font dal documentari e sta tal no vê sielzût dutis lis veris ecelencis dal teritori e ducj i ponts di fuarce che la Cjargne e à a disposizion (par fâdoi esemplis di numar, ni il speck Wolf di Sauris ni lis Termis di Darte a son stâts nomenâts). E par contrari vê fat invezit cjacarâ masse cualchidun che se al stave cidin…al jere miôr. ❚
✒ David Zanirato