La nestre “cuintristorie” de prime vuere mondiâl. Une grande tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf. O contìn lis storiis che la retoriche dai Stâts nazionâi no à mai contât. (11e pontade. FIN)✒ Redazion
E ce sucedial dopo? Une volte che i esercits si son smobilitâts, che i siôrs de vuere a àn firmât i tratâts, che i muarts a son stâts sepulîts e lis lagrimis des maris suiadis? Ce aie lassade al Friûl cheste sflandorose, epiche, declamade “Vuere sacre ae Bandiere”, onorade dai siei erois, imbastide par difindi e par slargjâ i siei confins? Muarts, disperazion, fam. Ve chi, ce che al è restât. La bugade mortâl de Spagnole, la tremende influence che e à finît di copâ i plui debii, i vecjos, i denutrîts. Une tiere sledrosade dai cjamps di bataie, ruvinade dal sac e bandonade tal pustot. Paîs sdrumâts, disperazion, voie di scjampâ vie, a cirî “in lasimpon”, pai trois dal Mont, une pussibilitât che dopo tancj sacrificis imponûts no vignive concedude. Magari in France. O in Argjentine. In Canadà. E centenârs di fameis de Valcjanâl o des Vals, obleadis a bandonâ lis cjasis dai lôr vons, a sielzerin di trasferîsi in Austrie, in chel che al restave dal grant Imperi, preferint jessi dispatriâts ma pûr simpri intun paîs tant plui civîl di chê Italie che ju voleve masanâ intune culture e intune societât che no rivavin a ricognossi tant che la lôr. Nol baste. Une sdrume di soldâts, di casermis, di guarnigjons in monture a forin inviadis di dute Italie a presidiâ i confins chi di nô. Un mût par agjevolâ i matrimonis fra talians! Une azion di snazionalizazion cidine e strissant, al dîs cualchidun. A inventâsi la retoriche dai monuments, dai sacraris, là che i vues insanganâts dai muarts a saressin deventâts, intune liturgjie macabre di muart, l’esempli par chei fîs che di li a pôc, a pene cualchi an, a varessin vût di metisi ancjemò une volte in monture par murî in Grecie, Jugoslavie o in Russie. Ce grande bufule, ce straordenarie coionade, lusint di medaiis, paradis, memoreazions. Iscrite intune sdrume di patachis, di poesiis fatis recitâ a memorie di plui di cualchi mestre masse ubidiente ae corone, di contis ispiradis a dute cheste propagande insopuartabile e esagjerade. Ator di chei monuments, e nasseve di fat la retoriche dal Fassisim, la esaltazion de “biele muart” pe patrie, il sacrifici des maris, l’imolâsi dai fîs. E vie a cambiâ il cognon des fameis, il non dai paîs, par che a fossin il plui talians pussibii. Massime chei sclâfs. Si che duncje, Zabnice (non sloven che come in furlan al volarès dì “tiere di ‘savis”) al devente, inte ridicule traduzion taliane, Camporospo. Ma stant che nol pâr bon, ve il plui patriotic “Camporosso”, ven a stâi tiere rosse di sanc imolât par une bataie juste. Chê scombatude cuintri i turcs tal ‘400 magari: ma simpri buine par ricuardâ che un bon cristian al sa ben che la anime spandude cul sanc e je plui gradide al cîl, come che a zighin i capelans militârs cuant che a benedissin i canons. Il tratât di vuere (che nol fo gran di pâs, viodudis lis sôs conseguencis) nus à duncje definitivementri glotûts inte panze di un stât incjocât di nazionalisim, di prejudizis raziâi, cetant grivi e bacanot, une vore convint di sburtâ chel procès di snazionalizazion etniche, culturâl, sociâl tacât tal 1866, cuant che il tricolôr pe prime volte al à svintulât tal cîl di Udin, e rilançât tal 1919. Crudelmentri, in plui di cualchi câs. Conseguencis? O sin stâts presidiâts, militarizâts, trasformâts intun gredei di poliziots, maressiai e doganîrs. Une situazion che cul timp si è ancje complicade, si che duncje di une tiere intal “cûr” di Europe o sin deventâts il “cûl” de Italie, presidi ultin di un stât che al à fat une grande fature, simpri, a ricognossi la nestre specialitât. O vin paiât insome un presit cetant alt, e o lin indenant a paiâlu. Par chest, il “centenari” de vuere nus à parût une bufule in plui. Une comedie tragjicomiche, une burlete che nus ingomee ancjemò prime che e scomenci. Nol fossial ancje dome par ducj i beçons che a son stâts metûts sul plat, in cheste ete di crisi e di dificoltât. E no podìn restà cussì, cence pandi il nestri pinsîr, libar, eretic, cuintritindince. O vin di oponisi ancje intal non di chei vecjos, di chei muarts, di chês feminis, di chei fruts, di ducj chei mats che in chestis pirulis o pensin di vê almancul un fregul riscatât. Il segn che le vin fate gruesse a son lis vôs che i benpensants nus àn indreçadis par convincinus che cheste nestre rubriche e va cuintri il spirt patriotic de nazion. Benon. Ma di cuale nazion? No di sigûr de nestre. Cualchidun nus à dit che o vin ofindude la monture, la memorie, la storie di tancj zovins che le àn puartade murint par fâ il lôr dovê. O volarès podê domandâ a ducj chei zovins che a son stâts crevâts di une granade, o fusilâts dai carabinîrs, o che si son pierdûts par simpri intal pantan di une trincee, se chê monture ur è stade comude cuant che, blestemant o preant o maledint re e bandiere, a son crepâts pensant ae famee, ai fîs, ai vecjos che no ju varessin mai plui viodûts. Nus àn ancje dite che chest nestri at di libare cussience al riscje di dividi, di meti malepâs, di sgarfâ tal turbit, cuant che invezit o varessin dibisugne di pacificazion e di concuardie. E invezit, o vin continuât a insisti. A vierzi la plaie. Parcè che al vâl di plui un dolôr responsabil che une mancjance di pinsîr incocalide. E une cussience che e rimuardi al è il segn di un spirt che no si lasse dislidrisâ come che al fos une jerbe triste. Ma che al ten dûr cu lis ongulis e cui dincj, magari pierdint dut ma di sigûr no la fam di libertât. La dignitât di un popul che di simpri al sburte dì par dì une vite di fadie, ma libare e braurose de sô libertât. Cualchidun nus à ancje dit che divuardi se cheste serie di schiribiçs e ves di jentrâ intune scuele. Ma il compit di un insegnant no isal chel di dismovi la cussience? Di stiçâ il confront? Di fâ viodi il mont cun voi clârs, libars di ogni fumate? Se la bestie e vuache al è segn che je stade colpide. E duncje a bon pro! De pâs e de libertât di ogni popul di chest mont. ❚
Angelo Floramo
