L’orcolat de stampe in Regjon al cambie il sisteme de informazion

Si leiarà di mancul, i gjornâi a saran ancje in crisi, ma la opinion de int e je dal sigûr influençade di ce che al ven fûr su la stampe. No esist, e che si metin il cûr in pâs i moraliscj, une stampe indipendente. L’editôr al comande, il diretôr al ubidìs, i gjornaliscj i ubidissin al diretôr: cheste, sclete, e je la leç. Se il diretôr nol è plui dacuardi cu la linie editoriâl, al va vie o al ven mandât vie. Cussì, ancje pai gjornaliscj che no vegnin licenziâts ma che a àn di stâ cucjos, se a àn voie di fâ cariere e di no finî a corezi comunicâts.
No je simpri cussì: int coragjose e di caratar si cjate ancjemò, ma si scuen vê un biel curriculum, jessi cognossûts, vê une firme in sumis, par podê gjoldi di cheste indipendence. Al è plui un privileç che no un dirit.
Se cheste e je une considerazion gjenerâl, chi di nô al esist un probleme plui sensibil ai condizionaments forescj: la cuistion furlane. E tocje l’aspiet istituzionâl par chel che al rivuarde la autonomie, la unitât dal Friûl e il rapuart cun Triest, ma ancje chel culturâl, cul ûs de lenghe in prin plan.
Duncje, par chei che a àn a cûr e si batin pal destin dal Friûl, pal interès dai furlans ducj, l’estri di un gjornâl viers chescj problemis al è impuartant.
La linie che e ten un grup editoriâl si viôt subite: se si dopre e trop la marilenghe tes pagjinis, se si calcole la unitât regjonâl un dogme, se Gurize nol è Friûl, se al è plui impuartant insegnâ l’inglês, se dôs Universitâts a son masse, e vie indenant.
Atenzion: no si scuen scrivilu neri su blanc, al è avonde fâlu capî tra lis riis, cuntun titul pluitost che cuntun altri, cu la sielte des peraulis. Dut in non de obietivitât e de imparzialitât des gnovis.
Viodìn duncje la impuartance di ce che al sta sucedint cumò te stampe locâl.
Il Messaggero Veneto al cambiat diretôr: Omar Monestier al èl ât a Livorno, Tommaso Cerno al cjape il so puest in viâl di Palme.
Monestier al è stât un amì de Patrie: no je stade une volte che un nestri comunicât, une nestre iniziative no vedi vût spazi tal so gjornâl. Di plui, il libri dai Gnognosaurs di Dree Venier, stampât de Patrie, al è vendût tes ediculis in gracie de colaborazion propit cul Messaggero. Ma no sin stâts dome noaltris: al à sostignude la bataie di Onde Furlane e di chei altris mieçs di informazion furlane cuintri i tais de Regjon, al à puartât la rubricute in marilenghe dai Cjastrons ogni dì in prime pagjine. In furlan a son ancje un pâr di blogs sul sît internet. Par ultin, il so blog, une palestre, no simpri di nivel, dulà che lis cuistions dai autonomiscj a vevin cjatade une valvule di scaric.
La notizie dal so gnûf incaric e je rivade cualchi dì daspò che al veve dit che al varès votât al referendum digjitâl pe indipendence dal Friûl: nol jere dacuardi, ma se nol fos stât par lui, forsit in tancj no varessin nancje savût de iniziative.
A son chei che a disin che al jere dome lusôr la sô furlanetât, che in realtât dutis lis sieltis de zonte Serracchiani cuintri il Friûl – dal scancelâ lis provinciis ai eletrodots, dal tribunâl di Tumieç ae riforme sanitarie e vie indenant – a àn simpri cjatât supuart. E chê promesse di cambiâ ancje il non “Veneto” de testade no je stade mantignude. Contraditori, sigûr: al reste il fat che si pronunzie pal referendum de indipendence e la dì dopo nol è plui in Friûl.
Al rive un furlan, pe prime volte un udinês, Tommaso Cerno. Une firme e une muse une vore considerade ancje a nivel talian. Si puarte daûr lis polemichis su la cuistion Englaro e su cualchi articul da “L’Espresso” che i àn tirât daûr lis maledizion di plui di cualchidun. Auguris.
Tal so prin editoriâl al ven citât par dôs voltis il non di Meloni, il plui impuartant diretôr dal Messaggero. Al pues jessi significant chest riferiment soredut pal troi seguitât di Meloni: di durissim nemì dal moviment autonomist a protagonist de bataie su la diferenziazion cun Triest daspò dal taramot.
Si pues duncje cambiâ opinion, “viodi il mont dal Friûl”, savint che il mont al à simpri cjalât al Friûl cuntun voli diviers, une vore plui favorevul, dal stât talian.
Ma nol è dut Messaggero, viodût che ancje in cjase dal secont cuotidian in Friûl al è sucedût alc di rimarchevul. Il grup roman Caltagirone, proprietari dal Gazetin, al à decidût di sierâ la redazion udinese: a restaran dome doi gjornaliscj, plui un a Triest a fâ la corispondence pe edizion di Pordenon. A peraulis, une edizion uniche pal Friûl, in realtât scjafoiade su Pordenon, une edizion di simpri plui leade al Venit che no ae provincie furlane.
Nol è dut: il Gazetin al jere ancje paron di Telefriuli, ma le à vendude a un grup che al à dentri la Danieli, la Associazion dai industriâi di Udin e l’editôr dal setemanâl “Friuli”, Zani Piasenzotto.
In ce direzion che e larà, dificil savêlu cumò: di sigûr l’inzegnîr Benedetti e i industriâi udinês no son mai stâts dongje, no disìn a un pinsîr autonomist, ma di sigûr nancje a une fuarte dialetiche tra Friûl e Triest, par difindi i interès dal prin.
Cussì, duncje, o varìn un Gazetin simpri plui venit, un monopoli dal grup Espresso su dute la regjon cu la cubie Messaggero e Piccolo, la Rai plui triestine che mai, e une Telefriuli votade ae “modernitât” dal marcjât.
E chi al torne Cerno e la cjarte che al podarès zuiâ in chest moment: cjalâ il mont no dal Friûl, ma cui voi dai furlans. In sumis, fâ l’interès di cheste tiere.
Il Piccolo, cun Triest al à simpri fat cussì.
Saraial pussibil se i doi gjornâi a son sot dal stes ‘cjapiel’? Starìn a viodi.
Di sigûr o spietin tal concret chê altre robe che Cerno al à scrit tal editoriâl: «Il Messaggero Veneto al sarà simpri inschiriât de bande de autonomie e de culture furlane, ma cuintri lis straçariis…».
O sin dacuardi cun lui: straçâ alc dal 0,02 % dal belanç regjonâl destinât al furlan, al sune tant che une blesteme. ❚
✒ D.Va.