EDITORIÂL – La autonomie e je la fonde di cheste regjon

✽✽ E torne di mode la Regjon a statût speciâl, non dome parcè che o fevelìn dal aniversari de sô nassite tal nestri gjornâl, ma soredut viodût che a son simpri di plui chei che a volaressin scjafoiâ cheste autonomie in non e par cont des macroregjons. Al jere di timp che no si sintive ripeti tant che un “mantra” la peraule “trivenit”, une forme istituzionâl che par tancj di lôr e pararès buine di risolvi ogni cuistion. O volarès ricuardâ di trop che cheste idee r ven puartade indenant prime de Fondazion Agnelli e po dopo ancje tal dissen leghiste dal professôr Miglio.
✽✽ L’onorevul dal Pd, Morassut, pecjât pal cognon furlan, nol è duncje che la ultime vôs intal côr di chei che a son cuintri de specialitât.
E, disìnle dute, la elezion dal gnûf president de Republiche, il sicilian Matarella, no je di grant jutori ae autonomie, cemût che al crôt cualchidun, parcè ancje la isule e conte su cheste prerogative: la maniere che je stade doprade e puarte la aghe a chei che a viodin dome robariis e straçariis tai struments istituzionâi des minorancis.
✽✽ Pai furlans e reste duncje la domande se o vin di difindi cheste specialitât o no.
Se o cjalìn par esempli lis tabelis publicadis dal Messaggero su dulà che al ven produsût il Pil regjonâl e in bande i bêçs che a restin te sachete, o miôr in bancje, dai abitants dal Friûl – Vignesie Julie, o disarès: sigûr che no.
✽✽ No je nissune forme di produzion a Triest. Dutis in Friûl, ma ogni triestin al puarte a cjase plui bêçs di cualsisedi furlan. Di dulà rivie cheste ricjece e soredut parcè cheste disparitât?
✽✽ Parcè che la economie di cheste regjon e va indenant cul lavôr dal Friûl di une bande e cu la rendite finanziarie, cu la burocrazie statâl e regjonâl di chê altre. Cheste la veretât dai numars.
O voi indenant.
✽✽ E podarès lâ ancje cussì, ma la robe che no torne, falade e pericolose, e je che par mantignî cheste realtât si scuen vê un ecuilibri tal teritori: no si pues molzi la vacje e copâ il contadin.
✽✽ Su chest dualisim di interès e di podê si fondave, cuant che e je nassude, la nestre Regjon: un basament compromissori decidût dal Stât talian in non dai confins orientâi.
✽✽ Cumò che la tendine di fier no esist plui, nancje chê situazion di sotsvilup che cualchidun al zontave par vê la autonomie: la uniche reson par jessi speciâi e je chê des minorancis. Anzit, e forsit al è miôr sclarîlu par simpri, pe presince di un popul maioritari, il furlan, e des minorancis slovene e todescje.
✽✽ No ricognossi cheste particolaritât dentri dal stât talian, rimpinâsi sù pai spiei par cjatâ alc altri o inventâsi adietîfs “virtuôs” al è inutil e al fâs dome dams.
✽✽ Tal ultin al fa propit il zûc di chei che la nestre autonomie le viodin tant che inutile e antistoriche.
La storie invezit o sin noaltris e no dome di cumò. ❚
Dree Valcic