Cun Pepe Coròngiu, fasint il pont su la politiche linguistiche in Sardegne

Gjornalist e di agns impegnât inte promozion de proprie lenghe nazionâl, il sart, Giuseppe Corongiu, o miôr Pepe Coròngiu di Làconi (OR), al è stât par 8 agns diretôr dal Servìtziu Limba e Cultura Sarda de sa Regione Autònoma de Sardigna.
Autôr dal libri Il sardo: una lingua “normale” (2013, edizions Condaghes www.condaghes.com),che secont cualchidun al sarès la cause dal so slontanament dal rûl di responsabil regjonâl dal ufici pe lenghe e la culture sarde, Coròngiu cumò al lavore intun comun in provincie di Casteddu, ma al continue la sô bataie pai dirits linguistics dal popul de Sardegne dentri dal Coordinamentu pro su Sardu Ufitziale.
–––
Intal XXI secul si pues pierdi il lavôr par vê scrit un libri?
“No lu sai, o pensi però che il libar pinsîr al sedi simpri un esercizi pericolôs. Il fat di no avalêsi plui de mê professionalitât, di là de cuistion personâl, al è stât un segnâl negatîf de Regjon viers dal Moviment linguistic. I fats sucessîfs dopo lu àn dimostrât cun evidence”.
–––
Cui Lu aial contrastât e cuale ise stade la acuse?
“Il mont academic no mi à perdonât mai il stop ai finanziaments causât dal lôr dinei a doprâ il sart tant che lenghe veicolâr inte formazion dai insegnants. E un ciert mont folcloristic dialetâ no si è sparagnât in ofesis gratuitis di nature cjampanilistiche e ignorante. Acusis no ‘nd è, dome argomentazions ridiculis. E je mancjade plui che altri la politiche: miôr vê dirigjents neutris che no visin ogni moment al politic i siei oblics viers dal sart”.
–––
Nus fevelial di Limba 2.0 (www.salimbasarda.net), il diàriu de su movimentu linguìstico?
“Al è un blog scrit dal dut in sart là che o cirìn di esprimi lis posizions di cui che al è favôr de standardizazion unitarie e là che o cirìn di dâ notiziis su la politiche linguistiche. E je une iniziative volontaristiche che si fonde sui contribûts dai partecipants. Al è un lavôr fat intal timp libar e inte fin de setemane. Nus stan tant daûr i militants e o soi tant sodisfat. In pôcs mês o sin deventâts il sît in sart plui clicât”.
–––
AI 8 Di Dicembar a Cagliari si è fate la Cunferentzia Natzionale de sa Limba Sarda: cemût ise nassude la iniziative?
“Il Guvier Regjonâl intal 2014 al à taiât ducj i fonts (plui o mancul 3 milions) relatîfs ae politiche linguistiche. Cun di plui, al à soprimût un apontament obligatori previodût par leç, la Conference Anuâl de sa Limba Sarda là che i aministradôrs a son obleâts a confrontâsi cui operadôrs. Alore le vin fate nô ativiscj in maniere polemiche. Tant che Coordinamentu Sardu Ufitziale o vin cjapât il puest, di brâfs citadins, di un podê public che nol à fat il so dovê”.
–––
Sono stadis reazions dal mont istituzionâl?
“Cidin totâl. Promessis di intervent e di finanziament butadis li aes solitis animis cjandidis par vuadagnâ timp. Dopo e je rivade la Finanziarie 2015 cu la propueste de Zonte di tai di dute la politiche linguistiche e o disìn che e je stade la rispueste che si spietavin. La politiche in Sardegne e je stade comissariade dai academics. I academics chi a son i nemîs de lenghe, ergo…”
–––
Un dai temis che al à dismovût plui interès al è stât l’insegnament de lenghe di minorance a scuele: cemût ise la situazion de lenghe sarde?
“E je piês di chê dal furlan, ma cu la leç 3 dal 2009 o sin rivâts a sigurâ in maniere graduâl la presince dal sart intal orari curicolâr in plui di 200 scuelis. Lis fameis a lassin di doprâ il sart cui fruts a un ritmi impressionant, fûr che in cualchi zone centriorientâl de isule. Magari cussì no, i segnâi che a rivin de Regjon vuê no son confuartants. Anzit, la mê pôre e je che si passi di une politiche di normalizazion a une di folclorizazion e di dialetizazion. Nus volaressin tancj bêçs”.
–––
Dilunc dai lavôrs de Cunferentzia Natzionale de sa Limba Sarda a son stâts une vore intervents dal public cetant ‘sintûts’ e caraterizâts di une cussience identitarie impuartante: il teme isal une vore sintût de popolazion?
“Al è sintût, ma nol cjate une sô composizion. Al è un probleme democratic interni plui che di pression di un altri grup linguistic: lis élites che a guviernin no nus crodin e a remin cuintri, invezit che a pro. A difondin ancje une idee de lenghe fate di prejudizis e stereotips che e confont la popolazion. Il Moviment Linguistic al è ferbint e organizât e al lote salt pe difese dai dirits linguistics. O soi otimist: o pensi che ae fin, dopo cualchi an di soference, si ricjaparà strade”.
–––
Ce an saraial il 2015 par sa limba sarda?
“Di resistence. Al larà cussì par un pôc di timp fin che la ruede no zirarà e al cambiarà il senari politic”. ❚
✒ Christian Romanini