Un psichiatre pal Friûl

Il Friûl al fasarès ben a cirîsi un psichiatri, se al vûl evitâ consecuencis piês. Ce isal daûr a sucedi? Sempliç: Pordenon, in fibrilazion ancje pes modifichis dai assets istituzionâi (la sparizion des Provinciis cul stop aes prossimis elezions dal Friûl ocidentâl, ma ancje lis vôs di cancelazion de presince di cualchi istituzion sul so teritori), al reagjìs a chês che al sint tant che “menacis”, cirint in maniere juste di “ritaiâsi” un gnûf rûl e un gnûf spazi, ma cun reazions e cun “leturis” de realtât che cualchi volte al somee che a lenzin la manie di persecuzion, inte miôr des ipotesis.
Il cjamp principâl di contese al è chel de economie, dulà che intes ultimis setemanis il scuintri si è spiçât. E, in maniere paradossâl, al è Udin chel che al finìs inte smire. O cjapìn il câs di Confindustrie. Intant che Triest e Gurize – dulà che la presince dal manifaturîr industriâl “regjonâl” e je cuasi simboliche (o escludìn la Fincantieri di Monfalcon, che e je a ducj i efiets une aziende di Stât e che, cjale il câs, e esprim il president di Confindustrie F-VJ Giuseppe  Bono) – a àn dât za vite a une agregazion des dôs associazions teritoriâls, Pordenon al refude la idee di rivâ a une sole realtât regjonâl dai Industriâi, sostignût di Udin, e al anunzie di cjalâ invezit a une ipotesi dal Nordest. Cundut che Udin al rapresenti cuasi la metât dal tiessût produtîf regjonâl e, insiemi cun Pordenon, e sedi la sole provincie là che il setôr des manifaturis al tiri. Il “dinei” di une aleance – che come intal câs dai Industriâi al sarès motivât di plui grandis economiis e de razionalizazion di servizis – al rivuarde ancje il setôr fieristic, dulà che Pordenon al met “palets” a une fusion cun Udin. La “linie dure” dal Friûl ocidentâl e je sostignude dal president di Unindustria Pordenone, Michelangelo Agrusti,  e di chel de Fiere di Pordenon, Alvaro Cardin: no sigûr dai biâts, stant che a son su la sene politiche regjonâl di ben prime di Tangjentopoli… Unic setôr che al moment nol somee tocjât des polemichis al è chel di Unioncamere F-VJ, stant che – cemût che al jere previodût par altri di timp dai acuardis – propit di pôc si è regjistrât il passaç des consegnis di Giovanni Da Pozzo, Udin a Giovanni Pavan, president dal Ent de cjamare pordenonese.
Tornant ae idee di une fusion di dutis lis associazions teritoriâls intune uniche Confindustrie regjonâl, Agrusti – che ciertis vôs a volevin che al ves sotscrit a so timp un acuardi cun Bono par une “stafete” ae vuide de Confindustrie F-VJ (chest prime che il Tribunâl di Pordenon al declaràs falide la Onda communication, che a Agrusti i faseve riferiment, e prime che al sclopàs il câs des furniduris a Generali) – al à plui voltis dit di cjalâ a une dimension soreregjonâl. Nuie di gnûf: no je la prime volte che Pordenon al fâs sieltis che a cjalin plui a Ovest che a Est: il distret des mobiliis de Livence e je une simbiosi venete-furlane, pes furniduris energjetichis i Industriâi di Pordenon za in passât a vevin sielt aleancis cun altris provinciis dal Venit e il stes al è sucedût sul front dai finanziaments aes impresis, viôt par esempli Confidi. Tant par citâ dome cualchi câs. Si podarès zontâ che, ancje par motîfs dome logjistics, par esempli, Pordenon nol sint propit tant che “regjonâl” l’aeropuart di Roncjis di Monfalcon. E dopo, disìnsal: intai rapuarts tra Diestre e Çampe dal Tiliment la sindrome de “mari-marastre” fin cumò no je passade… E cussì, tra lis tentazions dal Venit di viodisi ricognossude une autonomie di statût speciâl e lis tentazions (confessadis da râr in maniere vierte) di plui fuarcis politichis di “cancelâ” invezit la specialitât dal F-VJ, la “boutade” dai pordenonês di scometi su gnûfs assets istituzionâi indulà podêsi viodi assegnât un plui grant “pês specific” e podarès ancje paiâ. Cuissà. Al è però di domandâsi a ce presit pal teritori dal F-VJ, stant che la Storie – chê cu la S maiuscule – nus à dât za une dimostrazion di cemût che il Venit al interpreti i siei rapuarts cu la proprie… “campagne”. Mancje une classe dirigjente previdente? Nol isal un ricambi gjenerazionâl? Stino sentâts te ombre dai cjampanii spietant che alc al sucedi? Vino gust di fâsi mâl di bessôi? Dotôr Freud, che nus judi. ❚
Linux