35 agns di Onde Furlane

Interviste a Pauli Cantarut, president de Cooperative di Informazion Furlane, editôr di Radio Onde Furlane che chest an e fâ 35 agns.
__
Al jere ai 2 di Fevrâr dal 1980. Ce ricuardaiso di chê dì alì?
Nuie, parcè che nissun de radio Onde Furlane di vuê al jere in chê volte, cualchidun nol jere nancje nassût! Il ricuart pai plui al è peât ae prime storiche trasmission “Friûl che al vîf”, condusude di Federico Rossi, publicade tal inovâl dai 5 agns suntune casselute audio (preistorie). Le vin metude in onde propit ai 2 di Fevrâr di chest an.
Ce che o ai dit al pues subite dâ une idee di ce sorte di evoluzion che e à vût Onde Furlane in chescj 35 agns. Stant daûr ae rivoluzion tecnologjiche e mediâl che e à gambiât in profonditât il mût di fâ informazion, ai mudaments de societât furlane, taliane, europeane e globâl. Cjalant dut chest traviers i voi de nestre culture e contantlu traviers la nestre lenghe, esercitant un fondamentâl dirit linguistic e critic. Al è stât pussibil parcè che Onde Furlane e je stade inclusive, dant vôs e microfon aes parts vivis dal Friûl, soredut i zovins che a àn contribuît a lôr volte a trasformâ Onde Furlane, rindintle simpri frescje e sorprendente.
__
Ce no varessiso mai pensât di rivâ a fâ e invezit sêso stâts bogns di otignî?
Intun ciert sens al jere dut di fâ e dutis lis sfidis a someavin impussibilis: fâ informazion par furlan e plurilengâl, meti adun il prin sît internet e la prime trasmission televisive par furlan, produsi imprescj linguistics informatics fondamentâi come il vocabolari e il coretôr, produsi musiche, libris,  documentaris, organizâ in Friûl cunvignis e events di spetacul internazionâls come “Suns/Liet”, stiçâ la creativitât dai zovins come cul Premi Friûl e il fenomen plui positîf de culture furlane di vuê, la “gnove musiche furlane”.
Se e je une robe che nus da fastidi a son chei che a son cuintri la aspirazion a une incressite dai dirits di chei altris, e in Friûl a ‘nd è stâts e a son ancjemò tancj, cence rindîsi cont che plui dirits al è miôr che mancul dirits, e al è miôr par ducj. Al è stât un plasê cu la nestre ativitât coionâ ducj i lôr: “no se pol, meglio l’inglese che il friulano, lingua essenzialmente di poesia, piccola patria, a casa non a scuola” e vie indenant.
__
E ce invezit us mancjal ancjemò di fâ?
O speri che noaltris o continuarìn a fâ l’impussibil par no viodi l’incredibil, ma Onde Furlane no je avonde. Al covente che la int si svei dal insium capitalistic e consumistic e che si cjali ator: il teritori devastât dal ciment e des grandis oparis, l’assalt aes risorsis come la aghe, la coruzion fate politiche e sisteme, l’atac ae specialitât e aes autonomiis di ogni sorte a son za incredibii.
Noaltris o fasìn la nestre part, stant che a son i argoments al ordin dal dì tes nestris trasmissions ma a coventaressin mobilitazions, ativisim sociâl, rinassite de cussience identitarie, come dopo il taramot cu lis esperiencis di autogjestion svilupadis tes tendopolis, cuant che lis istituzions statâls e regjonâls a àn scugnût dâ rispuestis concretis par distudâ o tignî sot control la “cuistion furlane”.
__
Secont voaltris, cuâl isal il plui grant contribût che e à dât la Radio in chescj agns ae comunitât furlane?
Cul 70 % de programazion cuotidiane par furlan la radio e rapresente il principâl mieç di comunicazion in cheste lenghe. E prodûs une cuantitât di materiâi par furlan, plui di cualsisedi altri imprest informatîf, audiovisîf, digjitâl o su cjarte, e chest bielzà di prime des leçs regjonâl dal ’96 e statâl dal ’99. Ma no je dome cuistion di cuantitât, al è ancje cemût che la lenghe e je stade e e ven doprade in radio par contâ il Friûl e il mont; te informazion, te musiche, fin tai jingles e tai spots. Il contribût plui significatîf alore al è chel di vê incressût, in maniere trasversâl e intergjenerazion, la considerazion, il status de lenghe. Onde Furlane e je un laboratori permanent di creativitât e di iniziativis che a valorizin la lenghe e la realtât plurâl dal Friûl, cun produzions origjinâls e di cualitât che a àn ancje fat cressi professionalitâts.
Un episodi, un ricuart particolâr che o puartais tal cûr di chescj tancj agns di trasmissions.
Je une domande che e sarès di fâ ai centenârs di lôr che, in 35 agns, a àn dât vôs a Onde Furlane. E lis rispuestis forsit a saressin une vore diferentis. Jo par esempli no mi dismentei il mismàs che o vin creât intune setemane di colegaments video in direte cu la trasmission televisive de RAI “Cominciamo bene” condusude di Manuela Di Centa, a jerin i agns ’90. Il nestri studi al jere un casin di int che leve e e vignive cun cjacis e modons, bicicletis, furlans e africans che a fasevin discors murlacs. Ogni volte che si colegavin cun Onde Furlane la Di Centa e chel altri condutôr a levin in panic e no savevin di ce bande parâsi. Ancje il mitic critic dai media Gianluca Nicoletti al à analizât e comentât la nestre incursion mediatiche “gjeniâl”, intune pontade de sô trasmission “Golem”.
__
Ce novitâts vêso presentât par festezâ l’aniversari?
Un gnûf sît internet e la App che e permetarà di scoltâ «la radio libare dai furlans» di ogni bande dal mont cui smartphones e cui I-phones. Une iniziative impuartante, sostignude de ARLeF, pal dirit ae lenghe, pal dirit ae informazion e pal dirit ae radio, ancje pai furlans che a son pal mont.
Come che al à scrit il blog “Lidrîs e Butui” citant justementri Bob Marley: “Get APP, stand APP, stand APP for your RIGHTS”!
__
Cemût ise la situazion economiche de Radio?
No je buine, tai ultins agns i guviers talians a àn taiât i fonts e i rimbors pes testadis gjornalistichis e la regjon chei sul furlan, soredut chei su lis produzions radiotelevisivis. Cjale ce câs: al è interessant notâ cemût che l’assessôr Torrenti al sedi stât coerent cul so predecessôr De Anna.
A son tancj che a disin che chel che o fasìn al è un vêr e propri “servizi public”, ma dispès e je stade propit la istituzion publiche a no ricognossi chest rûl e chest servizi cuntune distribuzion, dai misars fonts destinâts, che je lade plui daûr dal umôr politic dal moment che no dal spirt e de letare de leç regjonâl 29/2007.
__
E chê dal personâl e dai colaboradôrs?
Informazion Furlane, la cooperative editore di Onde Furlane e à 6 dipendents cun contrat a timp indeterminât e cualchi desine di colaboradôrs. Par tancj al è dificil capî cemût che, cun cussì pôc personâl, o rivìn a produsi ogni dì materiâi radiofonics origjinâi e autoprodosûts e tal stès timp stâ daûr a dutis chês altris iniziativis. La spiegazion e je di une bande tal contribût dai colaboradôrs volontaris che al è simpri stât fondamentâl, di chê altre o met in evidence la motivazion fuarte di cui che al lavore achì, parcè che lavorâ a Onde Furlane nol è e nol varès di sedi come lavorâ intun cualsisedi altri puest.
La radio spiegade a un canai. OF e je…
… je une radio pirate, scoltile!
__
Cemût si viodêso ca di 10 agns?
A son cussì tantis lis voltis che, pes dificoltâts economichis, o vin fat fature a viodisi ca di un an che  o ribaltarès la domande ai letôrs de Patrie. Cemût viodêso, ca di 10 agns, un Friûl cence Onde Furlane. Miôr o piês? ❚
✒ Natascia Gargano