Zornade internazionâl de Lenghe Mari: la Provincie e met in vuaite

“Il pericul di estinzion pe lenghe furlane al è simpri plui dongje”. La denunzie e je dal president de Provincie di Udin Pietro Fontanini in ocasion de Zornade internazionâl de lenghe mari istituide tal 1999 de Unesco par prudelâ il pluralisim linguistic e culturâl dal mont, in memorie dal riviel popolâr che al sclopâ ai 21 di Fevrâr dal 1952 tal Pakistan di bande de minorance linguistiche “bangla”. “Al displâs verificâ che la impuartance de marilenghe, fevelade di 700 mil personis – al spieghe Fontanini – fonde, insiemi ae minorance linguistiche todescje e slovene, dal statût di autonomie, no vegni capide e e vebi pocje atenzion. La nestre specialitât e je basade su lis minorancis linguistichis e su chê furlane par prin stant che e je la plui numerose. No cate chest leam une vore fuart, il furlan al paie fuartis penalizazions che a ‘nt metin in pericul la vitalitât e la sussistence”. Par fermâ chest declin inevitabil, Fontanini al ponte une vore sul contribût che i gjenitôrs a puedin dâ pe sorevivence de lenghe e ancje ae didatiche in marilenghe che si davuelç a scuele. “O invidi maris e paris che a fevelin furlan tra di lôr ma no cui lôr fîs – al dîs Fontanini – a cambiâ regjistri. Pai fruts e sarà une ricjece, di sigûr no un probleme. Studis resints di neurolinguistiche a disin che l’insegnament fin di piçui di plui lenghis al permet di disvilupâ une flessibilitât e une facilitât di aprendiment plui grande; par chest o ai simpri poiât la validitât di iniziativis finalizadis al insegnament pai plui piçui ancje dal inglês o di altris lenghis forestis. A chê etât al è facil e imediât”. “ Mi auguri che ducj i gjenitôrs a pensedin – al zonte Fontanini – parcè che un patrimoni cussì impuartant di manieris di esprimisi ma ancje di pensâ, une raritât preseade dai auditôrs che e nas di une precise cussience identitarie, si consolidedi intun numar simpri plui grant di fameis”. La Provincie e continuarà a impegnâsi in cheste direzion poiant, par esempli, il progjet Clil inviât in cualchi scuele superiôr di Udin dulà che la marilenghe e ven doprade come lenghe veicolâr, in cualchi câs integrade cun intervents in lenghis forestis za presintis tal curriculum scolastic (inglês e todesc) pal insegnament di cualchi materie. No dome. “Tal program de fieste de Patrie dal Friûl che e vignarà celebrade ai 6 di Avrîl a Cividât – al finìs Fontanini – o rinovìn il concors dedicât a lis scuelis maternis, elementârs e mediis organizât cul ufici scolastic regjonâl che al domande a lis scuelis che a partecipin di realizâ progjets e lavôrs secont i temis de Fieste: identitât, storie, culture, lenghe, valôrs, tradizions. Une esperience che ogni an e à un grant sucès e partecipazion tra i plui piçui, un entusiasim vêr tai confronts di cheste lenghe, dai siei suns e dai tancj mûts di dî che mi auguri al cjapi ancje maris e paris”. ❚