I vuardians da la aghe

No podeve jessi relegade dome a petizions e scrits. Si scugnive realizâ alc che al restàs a future memorie di ducj. E par chest, al tocje ringraciâ il zovin regjist furlan Giulio Squarci che al à vût la idee brilante di cheste produzion. O stin fevelant dal documentari “I Custodi dell’acqua-La Carnia si ribella”, une opare di sessante minûts che e à il valôr e il presi di une testemoneance storiche su une des bataiis plui sintudis dai cjargnei tai ultins agns. Un filmât, chel presentât in anteprime a metât di Març a Çurçuvint, che al fâs prese subit pe cualitât cetant alte des sôs imagjins, in gracie di une cure maniacâl dai detais des ripresis. In dut chest, si inserissin in maniere perfete lis vôs di vecjos e zovins che a contin cence tancj sgherlifs i cuintrisens di dut il percors che, planc a planc, al à puartât ae centralizazion dal servizi idric in mont. Il biel al è che tra i pinsîrs e lis rasons da la int, il documentari al lasse il timp par rifleti, cul jutori di senaris un grum evocatîfs, fats dal cidin des monts, dal rumôr de ploie o des sofladis dal aiar. Un film che al partìs di lontan, dal 2009, cuant che ancje in Cjargne si à tacât a gjavâ ai comuns la gjestion des aghis, dai acuedots e des fognaduris, par fâ nassi une societât comprensoriâl clamade a cjapâ in man dut il sisteme dal servizi idric integrât.
E di senari in senari, di borc in borc, Squarci al osserve, al regjistre, al fâs cjacarâ e sfogâsi, al ten iniment dutis lis manifestazions che a son stadis fatis in chei agns di bande dai diviers comitâts dal teritori nassûts pe ocasion, di Paluce a Tumieç, dulà che la int e je lade pe strade e in place par denunziâ une situazion simpri plui mal sopuartade.
A dut chest, si tache la conte de bataie nazionâl cuintri la privatizazion da la aghe che e à puartât al referendum dal Jugn 2011, cuant che plui di 27 milions di talians a son lâts a votâ par pretindi che la aghe, ben comun, no vegnis svendude. No je stade dismenteade nancje la vuere che, in particolâr, trê piçui comuns de Cjargne, Çurçuvint, For di Avoltri e Liussûl, a àn provât a combati par podê continuâ a gjestî in propri il servizi idric dai lôr citadins, dimostrant di podê rivâ a tignî bassis lis boletis da la aghe che, invezit, di dutis chês altris bandis a jerin cressudis ancje dal 400 par cent.
Un filmât che dal sigûr al varà sucès, che al dovarà jessi fat zirâ pes scuelis e pai paîs e che o sperìn che al coventi par evitâ che la aghe de mont e finissi in maniere definitive intes mans dai forescj. ❚
David Zanirato