“Rusticitas” scozês: Nicola Sturgeon, la gnove leader vincidore des elezions

Cui ise Nicola Sturgeon, la gnove leader dal SNP buine di cjapâ sù la ereditât pesante come chê di vignî dopo di Alex Salmond, il leader che al à rivât a puartâ la Scozie al referendum pe indipendence, e rivâ a vê intun an risultâts miôr di lui?
ANTI-TATCHER
Nassude intal 1970 intune citadine industriâl dal distret dal açâl, di zovine e à podût viodi l’efiet de crisi dal setôr cu la esplosion de disocupazion in gracie des politichis de Tatcher. E al è propit chest che, a 16 agns, le puarte al impegn politic, cuant che e sune il campanel de cjase di un ativist dal SNP disintji “Puedio dâ une man?”. Ancje timp dopo, e declararà che la Tatcher al è stât il sburt pal so impegn: “La Tatcher e rapresente dut chel che o odei in politiche”. Lis dôs feminis a àn però ancje cualchi trat in comun: Sturgeon e je une persone dal caratar ruspi, preparade, di comunicazion sclete e cence fotis: maridade cuntun altri leader dal partît, Peter Murrell, cence fîs, la sô vite e somee dedicade dome al partît, tant che i gjornaliscj no cjatin nuie ce dî di jê al di là de ativitât politiche. Cu la Tatcher e à ancje in comun la opinion che “Jo no ai par fuarce chê di plasê a ducj”. Par chel che al rivuarde il “look”, invezit, e somee vê in comun sartôr e piruchîr cun la Merkel.
“UNDERSTATEMENT”
Al inizi, in Scozie a vevin pôre che la sô intransigjence, a pet dal plui “empatic” Salmond, e varès frenât il SNP, ma probabilmentri il so “understatement” al jere chel che al coventave intun moment politic schizofrenic: grande esaltazion par jessi rivâts al referendum cun biei risultâts, ma delusion par vêlu pierdût. Sturgeon e je rivade a fâ di chescj sintiments une sintesi buine di puartâ a un risultât mai vût prime e nancje imagjinât.
Un esempli dal so caratar si lu à vût ae Conference de Vierte dal SNP a Glasgow, ai 28 di Març: denant di une grande platee di 3.000 sostignidôrs entusiascj, cuant che e je montade su la sente e la int e à tacât a bati lis mans e à dit “Ce spetacul!”, che in Scozie e je plui une espression di disaprovazion che no di maravee.
LA PRIME FEMINE
Cun dut che e sedi la prime femine ae vuide dal Scottish National Party, la sô sucession a Alex Salmond no je stade une sorprese: i doi a àn vude une colaborazion salde fin dal 2004, cuant che Sturgeon e à rinunziât ae sô candidature tant che leader dal partît par poiâ chê di Salmond cuintri de sô amie Roseanna Cunningham, poiade dal ex leader SNP John Swinney. In chê ocasion, la Sturgeon e dimostrà caratar, sveltece di decision, cjapade in 24 oris, e – daûr dai judizis dai gjornaliscj – capacitât di “zuiâ sporc” se al covente.
LIS IDEIS
Par chel che al inten lis sôs ideis politichis, si considere une socialdemocratiche, convinte che e coventi plui ecuitât sociâl, ma ancje che no esist pussibilitât di ecuitât sociâl cence disvilup economic, che al permet di destinâ bêçs a di chel cantin. Cun di fat, te sô idee di indipendence plui che meti l’acent sul discors identitari, si dîs convinte che la Scozie e à di jessi bessole par miorâ lis sôs cundizions economichis. In cheste femine, dut al somee fevelâ di scletece e concretece. Si fâs par mût di dî: se si ves di vierzi il “Premi Maqôr Rusticitas” ai forescj, Nicola Surgeon e podarès jessi une candidade ideâl… ❚
Radeschi e Dree Venier